Matta 20 bob
1 İysa ja'ne bılay dedi: – Aspan Patshalıg'ı o'zinin' ju'zim bag'ına jumısshılardı jallap alıw ushın tan' azanda shıqqan u'y iyesine uqsaydı.
2 Ol jumısshılar menen ku'nine bir dinar to'lewge kelisip, olardı o'zinin' ju'zim bag'ına jiberipti.
3 Saat tog'ızlar shamasında shıg'ıp, bazarda jumıssız turg'an adamlardı ko'rip,
4 olarg'a: – Sizler de menin' ju'zim bag'ıma barın'lar, men sizlerge tiyisli haqıların'ızdı beremen, – degende, olar barıptı.
5 Ol saat on ekiler shamasında da, tu'sten keyin u'shler shamasında da shıg'ıp, tag'ı usılay islepti.
6 Keshki besler shamasında da shıg'ıp, ele jumıssız turg'an basqa adamlardı ko'rip, olarg'a: «Nege bul jerde ku'n boyı jumıssız tursızlar?» – dep soraptı.
7 Olar: «Sebebi bizlerdi hesh kim jallap alg'an joq», – dep juwap beripti. Ol: «Sizler de menin' ju'zim bag'ıma barıp, miynet etin'ler», – depti.
8 Ku'n kesh bolg'anda, bag'dın' iyesi o'zinin' basqarıwshı xızmetkerine: «Jumısshılardı shaqırıp alıp, miynet haqıların ber. En' son'g'ı kelgenlerinen baslap, en' aldın'g'ı kelgenleri menen juwmaqla», – depti
9 Sonda keshki besler shamasında kelgenler bir dinardan alıptı.
10 Al en' aldı menen kelgenler: «Bizler ko'birek alarmız», – dep oylaptı, biraq olar da bir dinardan alıptı.
11 İs haqıların alg'an olar u'y iyesine ton'qıldap:
12 «Mına en' son'ında kelgenler bir saat g'ana jumıs isledi. Al siz olardı ku'ni boyı azaplanıp, ıssıg'a ku'yip jumıs islegen bizler menen ten' ettin'iz», – depti.
13 Biraq bag'dın' iyesi juwap qaytarıp, olardın' birewine: «Ha'y, dostım, men sag'an a'dilsizlik etip turg'an joqpan. Sen menin' menen bir dinarg'a kelisken joq pa edin'?
14 Haqın'dı alıp, jo'nin'e ket. Men mına son'g'ı adamg'a da sag'an bergenimdey bergim keledi.
15 Menin' o'z aqsham menen qa'legenimdi islewime erkim joq pa? Menin' saqıylıg'ıma ishi tarlıq qılıp tursan' ba?» – depti.
16 Solay etip, son'g'ılar birinshiler, birinshiler son'g'ılar boladı.
17 Erusalimge baratırg'anda, İysa jolda on eki sha'kirtin awlaqta shaqırıp alıp, olarg'a:
18 – Minekey, bizler endi Erusalimge qaray ko'terilip baratırmız. Sol jerde Adam Ulı bas ruwxaniyler menen diniy mug'allimlerdin' qolına uslap beriledi. Olar Onı o'limge hu'kim etip,
19 Onı masqaralaw, sabaw, atanaq ag'ashqa shegelep taslaw ushın, basqa millet adamlarına uslap beredi. Biraq Ol u'shinshi ku'ni qayta tiriledi, – dedi.
20 Sol waqıtta Zebedeydin' ullarının' anası ulları menen İysanın' qasına keldi. Onın' ayag'ına jıg'ılıp, bir na'rse soramaqshı boldı.
21 İysa onnan: – Tilegin' ne? – dep soradı. Hayal Og'an: – O'z patshalıg'ın'da usı eki ulımnın' birewin on' jag'ın'a, ekinshisin sol jag'ın'a otırg'ızıwdı wa'de et, – dedi.
22 Al İysa juwap qaytarıp: – Sizler ne sorap turg'anın'ızdı bilmeysizler. Sizler Men ishetug'ın azap kesesinen ishe alasızlar ma? – dedi. Olar: – Awa, ishe alamız, – dedi.
23 İysa olarg'a: – Menin' kesemnen ishesizler. Biraq, O'zimnin' on' jag'ım menen sol jag'ıma otırg'ızıw Menin' erkimde emes. A'kem kimlerge arnag'an bolsa, solar otıradı, – dedi.
24 Bunı esitken on sha'kirti ag'alı-inili ekewine ashıwlanıp qaldı.
25 Biraq İysa olardı qasına shaqırıp alıp, bılay dedi: – Basqa milletler arasında hu'kimdarları xalıqqa zulımlıq etip, basshıları u'stemlik penen basqaratug'ının sizler bilesizler.
26 Biraq, sizlerdin' aran'ızda bunday bolmasın. Aran'ızda kim ullı bolg'ısı kelse, sol sizlerge xızmetshi bolıwı sha'rt.
27 Aran'ızda kim birinshi bolg'ısı kelse, sol sizlerge qul bolıwı sha'rt.
28 Adam Ulı O'zine xızmet ettiriwge emes, al O'zi xızmet etiwge ha'm ko'plegen adamlardın' qutqarılıwı ushın, O'z janın qurban etiwge keldi.
29 Olar Erixo qalasınan shıqqanda, ko'p xalıq İysanın' izine erdi.
30 Sonda joldın' shetinde otırg'an eki soqır adam İysanın' o'tip baratırg'anın esitip: – İyem, Dawıttın' Urpag'ı! Bizlerge rehim ete go'r! – dep baqırıstı.
31 Xalıq u'nlerin shıg'armawdı aytıp, olarg'a keyidi. Biraq olar onnan da beter qattı baqırısıp: – İyem, Dawıttın' Urpag'ı! Bizlerge rehim ete go'r! – desti.
32 İysa toqtap, olardı shaqırıp aldı da: – Menin' sizler ushın ne islewimdi qa'leysizler? – dep soradı.
33 Olar: – İyem, ko'zlerimizdi ashıwın'dı, – dep juwap berdi.
34 İysa olarg'a janı ashıp, ko'zlerine qolın tiygizdi. Sol waqıtta-aq olardın' ko'zleri ashılıp, Onın' izine erdi.
