Matta 17 bob
1 Aradan altı ku'n o'tkennen son', İysa tek Petrdi, Yaqıptı ha'm onın' inisi Yuxandı qasına alıp, olardı bir biyik tawg'a ertip shıqtı.
2 Sonda olardın' aldında İysanın' tu'r-tu'si o'zgerdi: Onın' ju'zi quyashtay jarqıradı, kiyimleri jarıq sıyaqlı appaq boldı.
3 Sol waqıtta birden olarg'a İysa menen so'ylesip turg'an Muwsa ha'm İliyas payg'ambarlar ko'rindi.
4 Sonda Petr İysag'a: – İyem, bizin' bul jerde bolg'anımız qanday jaqsı! Eger qa'lesen', men bul jerge u'sh qos quraman: birewin Sag'an, birewin Muwsag'a, birewin İliyasqa, – dedi.
5 Ol ele so'ylep turg'anda, bir jarıq bult olardı qapladı. Bulttan: – Bul – Menin' su'yikli Ulım, Men Og'an ırzaman. Onın' aytqanın tın'lan'lar! – degen saza esitildi+.
6 Bunı esitken waqıtta sha'kirtleri qattı qorqısıp, bet-a'lpetinen jerge jıg'ıldı.
7 Biraq İysa jaqınlap kelip, olarg'a qolın tiygizdi de: – Turın'lar, qorqpan'lar! – dedi.
8 Olar ko'zlerin ashıp joqarıg'a qarag'anda, İysadan basqa hesh kimdi ko'rmedi.
9 Tawdan to'men tu'sip baratırg'anda, İysa olarg'a: – Adam Ulı o'limnen qayta tirilmesinen burın, bul ko'rgenlerin'izdi hesh kimge aytpan'lar! – dep buyırdı.
10 Sonda olar: – Nege diniy mug'allimler aldı menen İliyas keliwi sha'rt deydi? – dep soradı.
11 İysa olarg'a: – Durıs, aldı menen İliyas kelip ha'mmesin du'zetedi.
12 Al Menin' sizlerge aytatug'ınım: İliyas a'lle qashan kelgen edi, biraq onı adamlar tanımadı ha'm og'an qa'legenin isledi. Adam Ulı da olardan solay azap shegedi, – dep juwap berdi.
13 Sonda sha'kirtleri İysanın' Shomıldırıwshı Yaqıya haqqında aytıp turg'anın tu'sindi.
14 Olar xalıqtın' janına kelgende, bir adam İysag'a jaqınlap, Onın' aldında dize bu'kti de:
15 – İyem, menin' ulıma rehim ete go'r. Ol qoyanshıq bolıp awırıp, qattı azap shegip atır, jiyi-jiyi otqa da, suwg'a da jıg'ıladı.
16 Men onı Senin' sha'kirtlerin'e a'kelgen edim, biraq olar shıpa bere almadı, – dedi.
17 İysa juwap qaytarıp: – Ha'y, isenbeytug'ın, adasqan a'wlad! Men qashang'a deyin sizler menen birge bolaman? Qashang'a deyin sizlerge shıdayman? Onı Mag'an, bul jerge a'kelin'ler, – dedi.
18 İysa jinge buyrıq bergende, ol baladan shıg'ıp ketti ha'm bala sol waqıtta-aq shıpa taptı.
19 Sonda sha'kirtleri İysag'a awlaqta kelip: – Bizler nege jindi quwıp shıg'ara almadıq? – dep soradı.
20 İysa olarg'a: – İsenimin'iz az bolg'anlıqtan. Men sizlerge shının aytıp turman: eger isenimin'iz qıshqıl tuqımınday g'ana bolsa da, bul tawg'a: «Usı jerden ana jerge ko'sh!» desen'ler, ol ko'shedi.
21 Sizlerdin' qolın'ızdan kelmeytug'ın hesh na'rse bolmaydı, – dedi.
22 Sha'kirtlerinin' ha'mmesi Galilada bolg'anda, İysa olarg'a: – Adam Ulı adamlardın' qolına uslap beriledi.
23 Olar Onı o'ltiredi, biraq Ol u'shinshi ku'ni qayta tiriledi, – dedi. Bug'an olar qattı qapa boldı.
24 Olar Kaparnahumg'a kelgende, eki draxmalıq İbadatxana salıg'ın jıynawshılar Petrdin' janına kelip, onnan: – Sizlerdin' Ustazın'ız İbadatxana salıg'ın to'lemey me eken? – dep soradı.
25 Petr: – Awa, to'leydi, – dedi. Ol u'yge kelgende, İysa onnan burın: – Simon, sen qalay oylaysan'? Jer betinin' patshaları bajılar menen salıqtı kimlerden aladı? O'z balalarınan ba yamasa basqa adamlardan ba? – dep soradı.
26 Petr: – Basqa adamlardan, – dedi. İysa: – Olay bolsa, patshanın' balaları salıq to'lewden azat.
27 Biraq, olardı tu'sinbewshilikke salmawımız ushın, ten'izge bar da, qarmaq salıp, en' birinshi ilingen balıqtı al. Onın' awzın ashsan', to'rt draxmalıq bir gu'mis ten'geni tabasan'. Onı alıp, Menin' menen o'zin' ushın olarg'a to'le, – dedi.
