Matta 16 bob
1 Pariseyler menen saddukeyler İysag'a keldi de, Onı sınamaqshı bolıp, aspannan ka'ramatlı belgi ko'rsetiwin soradı.
2 İysa olarg'a juwap qaytarıp: – Keshte sizler: «Erten' ku'n ashıq boladı, aspan qızg'ısh-g'o», – deysizler.
3 Al tan' azannan: «Bu'gin jawın-shashın boladı, aspan qızıl ha'm tu'nergen», – deysizler. Sizler nege aspannın' rayın ayıra alsan'lar da, zamannın' belgilerin ayıra almaysızlar?
4 Jaman ha'm opasız a'wlad bir ka'ramatlı belgi talap etedi. Biraq og'an Yunustın' belgisinen basqası ko'rsetilmeydi, – dedi. Son' olardı qaldırıp, sol jerden ketip qaldı.
5 İysanın' sha'kirtleri arg'ı jag'ag'a o'tkende, nan a'keliwdi umıtıp ketken edi.
6 İysa olarg'a: – Abaylan'lar, pariseylerdin' ha'm saddukeylerdin' ashıtqılarınan saq bolın'lar! – dedi.
7 Sonda olar: – Nan a'kelmegenimiz ushın solay dep atırg'an shıg'ar, – dep o'z ara aytısa basladı.
8 İysa bunı bilip, olarg'a: – Ha'y, isenimi azlar, sizler nege o'z ara nan a'kelmegenin'izdi aytısıp tursızlar?
9 Ele de tu'sinbedin'ler me? Bes nan bes mın' adamg'a jetip, awısqanın jıynag'anın'ızda neshe sebet toltırg'anın'ız esin'izde joq pa?
10 Ja'ne de jeti nan to'rt mın' adamg'a jetip, awısqanın jıynag'anın'ızda neshe sebet toltırg'anın'ız esin'izde joq pa?
11 Menin' sizlerge nan haqqında aytpag'anımdı nege tu'sinbeysizler? Pariseylerdin' ha'm saddukeylerdin' ashıtqılarınan saq bolın'lar, – dedi.
12 Olar sonda g'ana Onın' nannın' ashıtqısınan emes, al pariseylerdin' ha'm saddukeylerdin' ta'liymatlarınan saq bolıwdı aytqanlıg'ın tu'sindi.
13 İysa Filip Kesariyasındag'ı u'lkege kelgende, O'z sha'kirtlerinen: – Adamlar Meni, Adam Ulın kim dep sanaydı? – dep soradı.
14 Olar: – Geybirewleri Shomıldırıwshı Yaqıya, geybirewleri İliyas, al bazıları Eremiya yamasa payg'ambarlardın' biri dep sanaydı, – dedi.
15 İysa olarg'a: – Al sizler Meni kim dep sanaysızlar? – dedi.
16 Simon Petr juwap qaytarıp: – Sen – Masixsan', tiri Qudaydın' Ulısan', – dedi.
17 İysa og'an: – Yunustın' ulı Simon, sen baxıtlısan'! Sag'an bunı adam balası emes, al aspandag'ı A'kem ashıp bildirdi.
18 Sag'an Menin' aytatug'ınım mınaw: sen – Petrsen', Men mına tastın' u'stine O'z ja'ma'a'timdi ornataman, onı dozaqtın' ku'shleri de jen'e almaydı.
19 Sag'an Aspan Patshalıg'ının' giltlerin beremen. Sen jer betinde neni baylasan', sol aspanda da baylanadı, ja'ne de, sen jer betinde neni sheshsen', sol aspanda da sheshiledi, – dep juwap berdi.
20 Sonnan son', İysa sha'kirtlerine O'zinin' Masix ekenligin hesh kimge aytpawların buyırdı.
21 Sol waqıttan baslap İysa O'zinin' Erusalimge barıp, aqsaqallar, bas ruwxaniyler ha'm diniy mug'allimler ta'repinen ko'p azap shegiwi ha'm o'ltiriliwi, biraq u'shinshi ku'ni qayta tiriliwi tiyis ekenligin sha'kirtlerine bildire basladı.
22 Petr İysanı shetke shaqırıp alıp, Og'an: – Quday saqlasın, İyem! Sag'an bunday bola ko'rmesin! – dep qarsı so'yley basladı.
23 İysa burılıp, Petrge: – Joq bol ko'zimnen, shaytan! Sen Mag'an kesent berip atırsan'. Sen Qudaydın' emes, al adamnın' islerin oylap tursan', – dedi.
24 Sonda İysa O'z sha'kirtlerine: – Kim de kim Mag'an ergisi kelse, o'zinen keshsin ha'm o'z atanaq ag'ashın arqalap, Menin' izime ersin.
25 O'ytkeni kim de kim o'z janın saqlamaqshı bolsa, onı jog'altadı. Al kim de kim o'z janın Men ushın jog'altsa, onı tawıp aladı+.
26 Adam pu'tkil du'nyanı iyelep alıp, biraq o'z janın jog'altsa, bunnan og'an ne payda? Ol o'z janı ushın qanday to'lem bere aladı?
27 Adam Ulı A'kesinin' saltanatında O'z perishteleri menen birge keledi. Sonda Ol ha'r kimge islegen islerine qaray qaytaradı.
28 Sizlerge shının aytıp turman: usı jerde turg'anlardın' geybirewleri Adam Ulının' O'z Patshalıg'ında keliwin ko'rmegenshe, o'lmeydi, – dedi.
