Matta 14 bob
1 Sol waqıtta İysa haqqında xabardı Galila u'lkesinin' patshası Hirod ta esitip,
2 o'z xızmetkerlerine: – Bul adam – Shomıldırıwshı Yaqıya. Ol o'limnen qayta tirilipti, sonlıqtan da usınday ka'ramatlar islemekte, – dedi.
3 Bunnan burın Hirod o'z inisi Filiptin' hayalı Hirodiya sebepli Yaqıyanı uslap alıp baylatıp, qamatıp taslag'an edi.
4 O'ytkeni Yaqıya og'an: «Onı hayal qılıp alıwın' nızamg'a tuwrı kelmeydi», – degen edi.
5 Hirod Yaqıyanı o'ltirmekshi de bolıp edi, biraq xalıqtan qorqtı. Sebebi xalıq Yaqıyanı payg'ambar dep sanaytug'ın edi.
6 Al Hirod tuwılg'an ku'nin toylag'anda, Hirodiyanın' qızı jıynalg'an qonaqlardın' aldında oyıng'a tu'sip, Hirodtın' kewlinen shıqtı.
7 Sonın' ushın ol qız ne tilese de bermekshi bolıp, wa'de berip, ant ishti.
8 Qız anasının' ken'esi boyınsha: – Shomıldırıwshı Yaqıyanın' basın aldırıp, mag'an ha'zir tabaqqa salıp berin', – dedi.
9 Patsha bug'an qıynalsa da, o'zi ant ishkenlikten ha'm qonaqları sebepli, qızg'a sorag'anın beriwdi buyırdı.
10 Solay etip, patsha adam jiberip, qamaqta Yaqıyanın' basın kestirdi.
11 Tabaqqa salıp a'kelingen bas qızg'a berildi. Qız onı anasına aparıp berdi.
12 Yaqıyanın' sha'kirtleri kelip, onın' denesin alıp ketip jerledi. Sonnan son' barıp, İysag'a xabarladı.
13 İysa bunı esitkennen keyin qayıqqa minip, elsiz bir jerge jalg'ız ketip qaldı. Bul tuwralı esitken xalıq o'z qalalarınan shıg'ıp, piyadalap Onın' izine erdi.
14 İysa qayıqtan tu'skende sonshama xalıqtı ko'rdi, olarg'a janı ashıp, awırıwlarına shıpa berdi.
15 Kesh bolg'anda sha'kirtleri qasına kelip, Og'an: – Bul – bir elsiz jer, ku'n de kesh boldı. Xalıqtı tarqatıp jiber, olar awıllarg'a barıp, o'zlerine awqat satıp alsın, – dedi.
16 Biraq İysa: – Olar ketpewi kerek, olarg'a sizler awqat berin'ler, – dedi.
17 – Bizlerde tek bes nan menen eki balıq g'ana bar, – dedi olar.
18 İysa: – Olardı bul jerge, Mag'an alıp kelin'ler, – dedi.
19 Son'ınan xalıqqa sho'pli jerge otırıwdı buyırdı da, bes nan menen eki balıqtı alıp, aspang'a qarap Qudayg'a shu'kirlik etti. Nanlardı sındırıp, sha'kirtlerine berdi, olar xalıqqa u'lestirdi.
20 Ha'mmesi jep toydı, awısqan bo'leklerin jıynap alıp, u'lken on eki sebet toltırdı.
21 Al jegenler hayal ha'm balalardan basqa bes mın'day adam edi.
22 Bunnan son' da'rhal İysa sha'kirtlerine qayıqqa miniwdi ha'm O'zinen burın arg'ı jag'ag'a ketiwdi buyırdı. Al O'zi xalıqtı tarqatıp jiberdi.
23 Xalıqtı tarqatıp jibergennen son', İysa duwa etiw ushın jalg'ız O'zi tawg'a shıqtı, keshte de sol jerde jalg'ız qaldı.
24 Al sol waqıtta ten'izdin' jag'asınan uzaqlasqan qayıqtı tolqınlar soqqılay basladı, o'ytkeni ku'shli samal qayıqqa qarsı esip tur edi.
25 Erte tan'da İysa ten'izdin' u'sti menen ju'rip, olardın' qasına bardı.
26 Sha'kirtleri ten'izdin' u'sti menen kiyatırg'an Onı ko'rgende za'rreleri ushıp: – Bul a'rwaq, – dep qattı qorqıp baqırıstı.
27 Biraq İysa olarg'a da'rriw: – Jigerlenin'ler! Bul Men-g'o, qorqpan'lar, – dedi.
28 Petr Og'an juwap berip: – İyem! Eger bul Sen bolsan', mag'an suwdın' u'sti menen Senin' qasın'a ju'rip barıwdı buyır, – dedi.
29 İysa: – Kel, – dedi. Petr qayıqtan tu'sip, İysag'a qaray suwdın' u'sti menen ju'rip ketti.
30 Biraq ol samaldın' ku'shli ekenin ko'rgende qorqıp ketip, suwg'a bata baslag'anda: – İyem! Meni qutqar! – dep baqırdı.
31 İysa da'rriw qolın sozıp, onı tartıp aldı da, og'an: – Ha'y, isenimi az! Sen nege gu'manlandın'? – dedi.
32 Olar qayıqqa mingende, samal tınıp qaldı.
33 Qayıqtag'ı sha'kirtleri İysanın' ayag'ına jıg'ılıp: – Sen shınında da, Qudaydın' Ulısan'! – desti.
34 Olar ten'izdin' arg'ı jag'asına o'tip, Genesaret jerine kelip toqtadı.
35 Sol jerdin' turg'ınları İysanı tanıp, pu'tkil do'gerekke xabarladı ha'm awırg'an adamlardın' ha'mmesin Og'an alıp keldi.
36 Olar İysadan tek kiyiminin' shetine g'ana qol tiygiziwge ruxsat soradı. Qol tiygizgenlerdin' ha'mmesi shıpa taptı.
