Matta 13 bob
1 Sol ku'ni İysa u'yden shıg'ıp, ten'izdin' jag'asına barıp otırdı.
2 Onın' janına ju'da' ko'p xalıq jıynalg'anlıqtan, Ol qayıqqa minip otırdı, al xalıq jag'ada turdı.
3 Ol tımsallar menen olarg'a ko'p na'rselerdi aytıp, bılay dedi: – Bir ku'ni tuqım sebiwshi tuqım sebiwge shıg'ıptı.
4 Ol sepkende, tuqımlardın' geybirewleri jol shetine tu'sip, quslar kelip, olardı shoqıp jep qoyıptı.
5 Geybirewleri topırag'ı az bolg'an taslaqqa tu'sip, jer teren' bolmag'anlıqtan tez ko'gerip shıg'ıptı.
6 Biraq ku'n shıqqannan son' solıp, tamırsız bolg'anlıqtan quwrap qalıptı.
7 Geybirewleri tikenler arasına tu'sipti. Tikenler o'skennen son', olardı tunshıqtırıp taslaptı.
8 Al basqaları o'nimli jerge tu'sip, birewi ju'z eseden, birewi alpıs eseden, birewi otız eseden zu'ra'a't beripti.
9 Qulag'ı bar jaqsılap esitip alsın!
10 İysanın' sha'kirtleri qasına kelip, Onnan: – Xalıqqa ne ushın tımsallar menen so'ylep tursan'? – dep soradı.
11 İysa olarg'a bılay dep juwap berdi: – Aspan Patshalıg'ının' sırların biliw sizlerge berilgen, biraq olarg'a berilmegen.
12 Sebebi kimde bar bolsa, og'an ja'ne de mol etip beriledi, al kimde joq bolsa, onnan barı da tartıp alınadı.
13 Sonlıqtan da olarg'a tımsallar menen so'ylep turman. O'ytkeni: «Olar qarasa da ko'rmeydi, Tın'lasa da esitpeydi ha'm tu'sinbeydi».
14 İyshaya payg'ambardın' aldın ala olar haqqında aytqanı durıs keldi: «Tın'lap esitesizler, biraq tu'sinbeysizler, Qaraysızlar, biraq ko'rmeysizler!
15 Sebebi bul xalıqtın' kewli qaysar bolıp, Qulaqları pitip qalg'an, olar ko'zlerin de jumıp alg'an. Olay bolmag'anda, olardın' ko'zleri ko'rer edi, Qulaqları esiter edi, kewilleri tu'siner edi. Olar Mag'an qaytıp kelse, Men olarg'a shıpa berer edim».
16 Biraq, sizlerdin' ko'rip turg'an ko'zlerin'iz, esitip turg'an qulaqların'ız baxıtlı!
17 Sizlerge shının aytıp turman: ko'plegen payg'ambarlar menen haq adamlar sizlerdin' ko'rgenlerin'izdi ko'rgisi kelgen edi, biraq ko'rmedi. Esitkenlerin'izdi esitkisi kelgen edi, biraq esitpedi.
18 – Endi sizler tuqım sebiwshi tuwralı tımsaldın' ma'nisin tın'lan'lar.
19 Aspan Patshalıg'ı tuwralı aytılg'an so'zdi esitken, biraq onı tu'sinbegen adamg'a shaytan kelip, onın' kewline sebilgen so'zdi tartıp a'ketedi. Jol boyına sebilgen tuqımnın' ma'nisi usı.
20 Al taslaqqa sebilgen tuqım mınanı bildiredi: adam so'zdi esitken waqıtta-aq, onı quwanısh penen qabıl aladı.
21 Biraq tamırsız bolg'anlıqtan, turaqsızlıq etedi. So'z ushın azap shegiwge yamasa quwdalanıwg'a tuwra kelgende, tez isenimnen qaytadı+.Biraq tamırsız bolg'anlıqtan, turaqsızlıq etedi. So'z ushın azap shegiwge yamasa quwdalanıwg'a tuwra kelgende, tez isenimnen qaytadı.
22 Tikenler arasına sebilgen tuqım mınanı bildiredi: adam so'zdi esitedi, biraq bul du'nyanın' ta'shiwishleri ha'm baylıqqa aldanıw so'zdi tunshıqtıradı. Sonlıqtan ol zu'ra'a't bermeydi.
23 Al o'nimli jerge sebilgen tuqım mınanı bildiredi: adam so'zdi esitip, onı tu'sinedi ha'm birewleri ju'z eseden, birewleri alpıs eseden, birewleri otız eseden zu'ra'a't beredi.
24 İysa basqa tımsal keltirip, olarg'a bılay dedi: – Aspan Patshalıg'ı o'zinin' egislik jerine jaqsı tuqım sepken adamg'a uqsaydı.
25 Tu'nde, adamlar uyıqlag'an waqıtta dushpanı kelip, onın' biydayının' arasına haram sho'p egip ketipti.
26 Biyday ko'gerip masaq shıg'arg'anda, haram sho'p te payda bola baslaptı.
27 Sonda xızmetshileri xojasına kelip: «Xojayın! Siz egislik jerin'izge jaqsı tuqım seppegen be edin'iz? Onda haram sho'p qayaqtan payda boldı?» – depti.
28 Ol: «Bunı dushpan isledi», – depti. Sonda xızmetshileri: «Bizlerdin' barıp, olardı suwırıp taslawımızdı qa'leysiz be?» – dep soraptı
29 Ol: «Yaq, sizler haram sho'plerdi suwırg'anın'ızda, olar menen birge biydaydı da suwırıp alıwın'ız mu'mkin.
30 Orıw ma'wsimi jetkenshe, ekewi qatar o'se bersin. Orıw ma'wsiminde men oraqshılarg'a: „Da'slep haram sho'pti jıynan'lar ha'm bawlap o'rten'ler, al biydaydı telegime quyın'lar“, – deymen», – depti.
31 İysa olarg'a o'zge bir tımsal keltirip, bılay dedi: – Aspan Patshalıg'ı bir adamnın' o'z egislik jerine ekken qıshqıl tuqımına uqsaydı.
32 Ol tuqımlardın' ishindegi en' kishkenesi bolsa da, o'sip shıqqannan son' barlıq sho'plerden u'lkeyip, terek boladı. Shaqalarına aspan qusları ushıp kelip, uya saladı.
33 İysa olarg'a basqa tımsal aytıp: – Aspan Patshalıg'ı bir hayaldın' alıp, barlıq qamır ashıg'ansha, u'sh samar ung'a aralastırg'an ashıtqısına uqsaydı, – dedi.
34 İysa bulardın' ha'mmesin xalıqqa tımsallar menen ayttı. Tımsalsız olarg'a hesh na'rse aytpadı.
35 Solay etip, payg'ambardın' aldın ala aytqan mına so'zleri orınlandı: «Awzımdı tımsallar aytıw ushın ashıp, Du'nya jaratılg'annan beri jasırın bolg'anlardı so'yleymen».
36 Son'ınan İysa xalıqtı qaldırıp, u'yge kirdi. Sha'kirtleri Onın' qasına kelip: – Egislik jerdegi haram sho'p tuwralı tımsaldı bizlerge tu'sindirip ber, – dedi.
37 İysa bılay dep juwap berdi: – Jaqsı tuqım sebiwshi – Adam Ulı.
38 Egislik jer – du'nya, jaqsı tuqımlar – Aspan Patshalıg'ının' balaları. Al haram sho'pler – shaytannın' balaları.
39 Haram sho'plerdi sepken dushpan – shaytan. Orıw ma'wsimi – aqırzaman, oraqshılar – perishteler boladı.
40 Solay etip, haram sho'plerdi qalay jıynap alıp, otqa jaqsa, bul du'nyanın' aqırında da sonday boladı.
41 Adam Ulı perishtelerin jiberedi, Onın' Patshalıg'ınan olar barlıq azg'ırıwshılar menen nızamdı buzıwshılardı jıynap aladı da,
42 janıp turg'an oshaqqa taslaydı: olar sol jerde jılap, pushayman jeydi.
43 Sonda haq adamlar o'zlerinin' A'kesinin' Patshalıg'ında ku'n sıyaqlı jarqırap turadı. Qulag'ı bar jaqsılap esitip alsın!
44 – Aspan Patshalıg'ı egislik jerge jasırılg'an g'a'ziynege uqsaydı. Onı birew tawıp alıp, ja'ne jasırıp qoyıptı da, quwang'anınan barlıq malmu'lkin satıp jiberip, sol egislik jerdi satıp alıptı.
45 Ja'ne Aspan Patshalıg'ı hasıl hinjiler izlep ju'rgen bir sawdagerge uqsaydı.
46 Ol ju'da' qımbat bir hinjini tapqanda, o'zinin' barlıq mal- mu'lkin satıp jiberip, sol hinjini satıp alıptı.
47 – Ja'ne Aspan Patshalıg'ı ten'izge salınıp, a'lwan tu'rli balıqlar tu'sken awg'a uqsaydı.
48 Tolg'annan keyin, balıqshılar onı jag'ag'a su'yrep shıg'arıptı. Son'ınan otırıp, jaqsıların tan'lap ıdıslarg'a salıp, al jamanların ılaqtırıp taslaptı.
49 Aqırzamanda da solay boladı: perishteler kelip, jaman adamlardı haq adamlardan ayırıp alıp,
50 janıp turg'an oshaqqa taslaydı. Olar sol jerde jılap, pushayman jeydi.
51 Sonnan son', İysa olardan: – Bulardın' ha'mmesin tu'sindin'ler me? – dep soradı. Olar: – Awa, İyem, tu'sindik, – dedi.
52 İysa olarg'a: – Sonlıqtan Aspan Patshalıg'ınan u'yrengen ha'r bir diniy mug'allim o'z g'a'ziynesinen jan'anı da, go'neni de shıg'arıwshı u'y iyesine uqsaydı, – dedi.
53 İysa usı tımsallardı aytıp bolg'annan son', sol jerden ketip qaldı.
54 O'zi o'sken qalag'a kelip, sol jerdegi ma'jilisxanada xalıqqa ta'lim bere basladı. Xalıq tan' qalısıp: – Ol bunday danalıqtı ha'm ka'ramat islew qu'diretin qayaqtan alg'an?
55 Ol – ag'ash ustasının' balası emes pe? Onın' anasının' atı Ma'riyam, inilerinin' atları Yaqıp, Yusup, Simon, Yahuda emes pe?
56 Onın' ha'mme qarındasları da bizin' aramızda emes pe? Al bulardın' ha'mmesi Onda qayaqtan payda boldı eken? – dedi de,
57 Onı ta'n almadı. Sonda İysa olarg'a: – Payg'ambardın' barlıq jerde qa'diri bar, ol tek o'z watanı menen u'yinde g'ana qa'dirsiz, – dedi.
58 Olar isenbegeni sebepli, İysa ol jerde ko'p ka'ramatlardı islemedi.
