Matta 1 bob
1 İbrayımnın' urpag'ı, Dawıttın' urpag'ı İysa Masixtın' shejiresi mınaday:
2 İbrayımnan Isaq tuwıldı. Isaqtan Yaqıp tuwıldı. Yaqıptan Yahuda ha'm onın' ag'a-inileri tuwıldı.
3 Yahuda menen Tamaradan Pares ha'm Zara tuwıldı. Paresten Hesron tuwıldı. Hesronnan Ram tuwıldı.
4 Ramnan Aminadab tuwıldı. Aminadabtan Nahshon tuwıldı. Nahshonnan Salmon tuwıldı.
5 Salmon menen Rahabtan Boaz tuwıldı. Boaz benen Ruttan Obid tuwıldı. Obidten İshay tuwıldı.
6 İshaydan Dawıt patsha tuwıldı. Dawıt penen burın Uriyanın' jubayı bolg'an hayaldan Sulayman tuwıldı.
7 Sulaymannan Rehabam tuwıldı. Rehabamnan Abiya tuwıldı. Abiyadan Asa tuwıldı.
8 Asadan Eshofat tuwıldı. Eshofattan İoram tuwıldı. İoramnan Uziya tuwıldı.
9 Uziyadan İoatam tuwıldı. İoatamnan Ahaz tuwıldı. Ahazdan Ezekiya tuwıldı.
10 Ezekiyadan Manasiya tuwıldı. Manasiyadan Amon tuwıldı. Amonnan İosiya tuwıldı.
11 Babilong'a su'rgin etilgende, İosiyadan Exoniya ha'm onın' inileri tuwıldı.
12 Babilong'a su'rgin etilgennen keyin, Exoniyadan Shaltiel tuwıldı; Shaltielden Zerubabel tuwıldı.
13 Zerubabelden Abihud tuwıldı; Abihudtan Eliakim tuwıldı; Eliakimnen Azor tuwıldı.
14 Azordan Sadoq tuwıldı; Sadoqtan Axim tuwıldı; Aximnen Elixud tuwıldı.
15 Elixudtan Eliazar tuwıldı; Eliazardan Mattan tuwıldı; Mattannan Yaqıp tuwıldı.
16 Yaqıptan Ma'riyamnın' ku'yewi Yusup tuwıldı. Ma'riyamnan Masix dep atalg'an İysa tuwıldı.
17 Solay etip, ha'mmesi bolıp: İbrayımnan Dawıtqa deyin on to'rt urpaq, Dawıttan Babilong'a su'rgin etiliwge deyin on to'rt urpaq, Babilong'a su'rgin etilgennen Masixqa deyin on to'rt urpaq.
18 İysa Masixtın' tuwılıwı bılay boldı: Onın' anası Ma'riyam Yusupke atastırılg'annan keyin, olar qosılmastan burın, Ma'riyamnın' Muxaddes Ruwxtan ha'mledar ekenligi bilindi.
19 Onın' ku'yewi Yusup haq adam bolıp, Ma'riyamdı uyatqa qaldırmayın dep, og'an u'yleniwden jasırın tu'rde bas tartıwdı oyladı.
20 Ol usılay oylap ju'rgende, Qudaydın' bir perishtesi onın' tu'sine enip: – Ha'y, Dawıttın' urpag'ı Yusup! Sen Ma'riyamdı o'zin'e hayallıqqa alıwdan qorqpa. Onın' ishindegi Balası Muxaddes Ruwxtan.
21 Ma'riyam Ul tuwadı. Sen onın' atın İysa dep qoyasan', sebebi Ol O'z xalqın gu'nalarınan qutqaradı, – dedi.
22 Bulardın' ha'mmesi Qudaydın' payg'ambar arqalı aldın ala aytqan mına so'zlerinin' orınlanıwı ushın boldı:
23 «Mine, qız ha'mledar bolıp, Ul tuwadı. Onın' atın İmmanuel dep qoyadı»*. İmmanuel – «Quday bizler menen birge» degen ma'niste.
24 Uyqıdan turg'an Yusup Qudaydın' perishtesinin' buyırg'anın islep, Ma'riyamg'a u'ylendi.
25 Biraq Ma'riyam Ulın tuwg'ansha, Yusup og'an jaqınlag'an emes. Ol Balanın' atın İysa dep qoydı.
