Sanlar 8 bob
1 Jaratqan İye Muwsag'a bılay dedi:
2 – Xarong'a ayt, ol jeti shıranı shıra qoyg'ıshqa ornatqanda, shıra qoyg'ıshtın' aldıng'ı ta'repine jaqtılıq tu'sip turatug'ın qılıp ornatsın.
3 Xaron aytılg'anday etip isledi. Jaratqan İyenin' Muwsag'a buyırg'anınday, shıralardı shıra qoyg'ıshtın' aldıng'ı ta'repine jaqtı tu'setug'ın qılıp ornalastırdı.
4 Shıra qoyg'ısh Jaratqan İyenin' Muwsag'a ko'rsetken u'lgisi boyınsha, ultanınan baslap, gu'llerine deyin altınnan sho'kkishlep islengen edi.
5 Jaratqan İye Muwsag'a bılay dedi:
6 – Lebiylilerdi İzrail xalqının' arasınan ayırıp alıp, olardı pa'klew ra'siminen o'tkiz.
7 Olardı pa'klew ushın bılay isleysen': pa'kleytug'ın suwdı olardın' u'stine serp. Olar shashları menen barlıq ju'nlerin qırıp taslasın ha'm kiyimlerin juwsın. Usılayınsha, olar pa'k boladı.
8 Keyin olar bir bug'a menen g'a'lle sadaqası ushın za'ytu'n mayı aralastırılg'an sapalı un alıp kelsin. Gu'na qurbanlıg'ı ushın sen de basqa bir bug'a alıp kel.
9 Lebiylilerdi Ushırasıw shatırının' aldına alıp kelip, barlıq İzrail ja'miyetin jıyna.
10 Lebiylilerdi Jaratqan İyenin', yag'nıy Menin' aldıma a'kelgenin'de, izraillılar olardın' u'stine qolların qoysın.
11 Jaratqan İyege xızmet etiwi ushın, Xaron izraillılardın' arasınan lebiylilerdi sadaqa sıpatında Mag'an bag'ıshlasın.
12 Lebiyliler qolların bug'alardın' basına qoysın ha'm olardın' gu'naları keshiriliwi ushın, bug'alardın' birewi gu'na qurbanlıg'ı ushın, ekinshisi jandırılatug'ın qurbanlıq ushın Jaratqan İyege usınılsın.
13 Lebiylilerdi Xaron ha'm onın' ullarının' aldında turg'ız. Olardı sadaqa sıpatında Jaratqan İyege, Mag'an bag'ıshla.
14 Lebiylilerdi basqa izraillılardın' arasınan usı ta'rizde bo'lip al. Lebiyliler Mag'an tiyisli boladı.
15 Sen lebiylilerdi pa'klep, sadaqa sıpatında bag'ıshlag'annan son', olar Ushırasıw shatırındag'ı xızmetin baslawına boladı.
16 İzraillılar arasında lebiyliler tolıg'ı menen Mag'an tiyisli. Sebebi qarınnan birinshi shıqqan barlıq ullardın' ornına olardı O'zime tan'lap aldım.
17 İzrail xalqının' arasındag'ı barlıq birinshi tuwılg'anlar adam bolsın, haywan bolsın – olar Meniki. O'ytkeni Men Mısırda birinshi tuwılg'anlardı joq qılg'an ku'ni, olardı O'zime ayırıp aldım.
18 Solay etip, İzrail xalqında barlıq birinshi tuwılg'an ullardın' ornına lebiylilerdi tan'ladım.
19 İzraillılar Muxaddes orıng'a jaqınlasıp, ba'lege duwshar bolmawı ushın, olardın' ornına Ushırasıw shatırındag'ı xızmetti islep, izraillılardın' gu'naların tazalaw ushın, lebiylilerdi Xaron ha'm onın' ullarının' qollarına tapsırdım.
20 Muwsa, Xaron ha'm pu'tkil İzrail ja'miyeti Jaratqan İyenin' lebiylilerge baylanıslı Muwsag'a bergen ha'r bir buyrıg'ın tolıg'ı menen orınladı.
21 Lebiyliler o'zlerin pa'klep, kiyimlerin juwdı. Xaron olardı Jaratqan İyenin' aldında arnawlı tu'rde bag'ıshladı ha'm olardı tazalaw ushın, gu'nalarınan pa'kledi.
22 Bunnan son', lebiyliler Xaron ha'm onın' ullarının' qol astında Ushırasıw shatırındag'ı o'zlerine tiyisli xızmetlerin orınlawg'a keldi. Solay etip, Jaratqan İye lebiylilerge tiyisli Muwsag'a qanday buyrıq bergen bolsa, İzrail xalqı sol buyrıqlardı orınladı.
23 Jaratqan İye Muwsag'a bılay dedi:
24 – Lebiylilerge tiyisli qag'ıyda mınaday: Jigirma bes ha'm onnan joqarı jastag'ılar Ushırasıw shatırındag'ı xızmetin baslasın.
25 Al eliw jasqa kelgende, sol xızmetinen bosap, artıq xızmette bolmasın.
26 Xızmetten bosag'an lebiyliler Ushırasıw shatırında xızmet etip atırg'an tuwısqanlarına ja'rdem beriwine boladı, biraq o'zleri artıq xızmet islemesin. Lebiylilerdin' wazıypaların usılayınsha belgilep ber.
