Sanlar 18 bob

Ruwxaniyler menen lebiylilerdin' wazıypası(1-7),Ruwxaniylerdin' payı(8-20),Lebiylilerdin' payı(21-24),Lebiylilerdin' u'sirleri(25-32).

¹ Jaratqan İye Xarong'a bılay dedi: – Sen, ulların' ha'm pu'tkil Lebiy urıwı Muxaddes ma'kang'a qarsı islengen gu'nag'a juwapker bolasızlar. Al ruwxaniylik xızmetin'izge baylanıslı gu'na ushın tek g'ana sen ha'm ulların' juwapker bolasızlar.

² Sen ha'm ulların' buyrıqlar qoyılg'an shatırdın' aldında xızmet etkenin'izde, baban'ız Lebiydin' a'wladınan bolg'an tuwısqanların'ız da sizlerge ja'rdem beretug'ın bolsın.

³ Olar senin' juwapkershiligin' astında Muxaddes shatırg'a tiyisli xızmetlerdi orınlasın. Biraq olar muxaddes jerdin' buyımlarına yamasa qurbanlıq orıng'a jaqınlamasın, bolmasa olar da, sizler de o'lip qalasızlar.

⁴ Olar senin' menen birge Ushırasıw shatırına baylanıslı barlıq wazıypalardı orınlasın. Lebiylilerden basqa hesh bir adam sizler menen birge xızmet qılmasın.

⁵ Endigiden bılay, İzrail xalqına qa'ha'rlenbewim ushın, Muxaddes jerde ha'm qurbanlıq orında tek g'ana sizler xızmet qılasızlar.

⁶ Men izraillılar arasınan lebiyli tuwısqanların'ızdı sizlerge ja'rdemshi qılıp, tan'lap aldım. Ushırasıw shatırına baylanıslı xızmetti orınlawı ushın, olar Mag'an bag'ıshlang'an.

⁷ Degen menen, qurbanlıq orındag'ı ha'm perdenin' artındag'ı En' muxaddes bo'lmege baylanıslı ruwxaniylik xızmetti tek g'ana sen o'z ulların' menen orınlaysan'. Ruwxaniylik xızmetti sag'an sıy qılıp berdim. Sennen basqa kim de kim ol jerge jaqınlasa, ol o'ltirilsin.

⁸ Jaratqan İye Xaron menen bolg'an sa'wbetin bılay dep dawam etti: – İzrail xalqının' Mag'an ajıratqan muxaddes sıyların baqlawdı sag'an tapsırdım. Bulardı sizlerdin' ruwxaniylik xızmetin'iz ushın sag'an ha'm ulların'a ma'n'gige pay qılıp berdim.

⁹ Qurbanlıq orında Mag'an usınılg'an en' muxaddes sadaqalar, yag'nıy g'a'lle sadaqasının', gu'na ha'm ayıp qurbanlıqlarının' jandırılmaytug'ın bo'lekleri, sag'an ha'm senin' ulların'a tiyisli boladı.

¹⁰ Bulardı en' muxaddes zat sıpatında jewin'iz tiyis, sebebi bular ju'da' muxaddes. Bul sadaqa ha'm qurbanlıqlardan tek g'ana erkek adamlardın' jewine boladı.

¹¹ Ja'ne de, mınalar da sag'an tiyisli boladı: izraillılardın' alıp kelgen joqarı ko'terip usınatug'ın sıylarınan ajıratqan bo'leklerin sag'an ha'm senin' ul-qızların'a ma'n'gige pay qılıp berdim. Shan'arag'ın'dag'ı ha'r bir pa'k adam bulardan jewine boladı.

¹² Olardın' Mag'an, Jaratqan İyege alıp kelgen da'slepki o'nimlerin – za'ytu'n mayının', taza sharaptın' ha'm g'a'llenin' en' sapalı bo'legin sizlerge berdim.

¹³ Elde jetistirilgen da'slepki zu'ra'a'tlerden Mag'an, Jaratqan İyege alıp kelingenlerdin' ha'mmesi sizlerge tiyisli. Shan'arag'ın'dag'ı ha'r bir pa'k bolg'an adam olardan jewine boladı.

¹⁴ İzrailda Jaratqan İyege tolıg'ı menen bag'ıshlang'an ha'r bir zat sizlerdiki boladı.

¹⁵ İzrail xalqının' Mag'an alıp kelgen adamlardın' da, mallardın' da qarınnan birinshi shıqqanlardın' ha'mmesi sizlerdiki boladı. Biraq adamlardın' ha'm haram esaplang'an haywanlardın' birinshi tuwılg'an balası ushın qun alıwın' kerek.

¹⁶ Birinshi tuwılg'an ul bir aylıq bolg'anda, onın' qunı ushın bes shekel alasan'. Ha'r bir shekel Muxaddes orın o'lshemi menen jigirma geradan bolsın.

¹⁷ Biraq sıyırdın', qoydın' ha'm eshkinin' birinshi tuwılg'an to'li ushın qun almaysan'. Olar Men ushın arnalg'an. Olardın' qanların qurbanlıq orıng'a serpip, mayların Jaratqan İyege xosh iyisli sıy qılıp, tu'tetip jandırıp jiberesen'.

¹⁸ Bulardın' joqarı ko'terip usınılg'an to'si ha'm on' sanı seniki bolg'anı sıyaqlı, go'shi de seniki boladı.

¹⁹ İzraillılardın' Mag'an ajıratıp usıng'an muxaddes sıylarının' barlıg'ın sag'an ha'm ulqızların'a ma'n'gige pay etip beremen. Bul sen ha'm senin' a'wladın' ushın berilgen Menin' ma'n'gi buzılmas kelisimim boladı.

²⁰ Keyin Jaratqan İye Xarong'a ja'ne bılay dedi: – Xalıqtın' arasında sizlerdin' u'les jerin'iz bolmaydı, olardın' arasında hesh qanday payın'ız bolmaydı. Sizlerdin' izraillılar arasındag'ı payın'ız ha'm u'lesin'iz Men bolaman.

²¹ Lebiylilerdin' Ushırasıw shatırındag'ı jumısı ushın, İzrailda jıynalatug'ın barlıq u'sirlerdi olarg'a pay qılıp beremen.

²² Bunnan bılay izraillılar Ushırasıw shatırına jaqın kelmesin. Bolmasa, olar sol gu'nanın' jazasın tartıp o'ledi.

²³ Ushırasıw shatırına tiyisli jumıstı lebiyliler isleydi, shatırg'a qarsı islengen ha'r qanday ayıpqa olar juwapker boladı. Bul keleshek a'wladların'ız boyınsha ma'n'gi qag'ıyda bolsın. İzraillılardın' arasında lebiylilerdin' jer u'lesi bolmaydı.

²⁴ Bunın' ornına Men lebiylilerge izraillılardın' Mag'an, Jaratqan İyege ajıratıp bergen u'sirlerin u'les qılıp beremen. Sonın' ushın, Men: «İzraillılardın' arasında lebiylilerdin' u'les jeri bolmaydı», – dep aytqan edim.

²⁵ Jaratqan İye Muwsag'a bılay dedi:

²⁶ – Lebiylilerge mınanı ayt: «Menin' u'les qılıp sizlerge bergen u'sirlerdi izraillılardan alg'anın'ızda, alg'an u'sirlerdin' onnan birin shıg'arıp, Mag'an, Jaratqan İyege sıy qılıp berin'.

²⁷ Men sizlerdin' bul sıyın'ızdı qırmannan a'kelingen g'a'lle ha'm ju'zim sıg'atug'ın shuqırdan a'kelingen sharap sıpatında qabıllayman.

²⁸ Usılay etip, sizler izraillılardan alg'an barlıq u'sirlerden onnan bir shıg'arıp, Jaratqan İyege sıy qılıp beresizler. Usı sıydı ruwxaniy Xarong'a a'kelip berin'.

²⁹ Sizlerge berilgen barlıq sıylardın' en' jaqsısın, en' muxaddesin ajıratıp, Jaratqan İyege berin'ler».

³⁰ Lebiylilerge ja'ne bılay dep ayt: «Sıylardın' en' jaqsısın Jaratqan İyege ajıratqanın'ızdan keyin, qalg'anı o'z qırmanın'ızdan bolg'an o'nim yamasa sharap o'nimin'iz sıpatında o'zlerin'izge qaladı.

³¹ Bunı sizler shan'arag'ın'ız benen qa'legen jerde jewin'izge boladı. Sebebi bul – sizlerdin' Ushırasıw shatırında islegen xızmetin'iz ushın berilgen to'lem.

³² Eger onnan birden en' jaqsısın Mag'an, Jaratqan İyege ajıratıp usınsan'ız, o'zlerin'izge gu'na ju'klemeysizler. O'lip qalmawın'ız ushın, izraillılardın' usıng'an muxaddes sadaqaların haramlaman'lar».