Zexariya 11 bob
1 Ha'y, Lebanon, da'rwazaların'dı ash, Ot kedr ag'ashların'dı jag'ıp joq qılsın!
2 Ha'y, sa'rwi ag'ashı, dad sal! Kedr ag'ashı quladı, Ullı terekler joq boldı! Ha'y, Bashandag'ı emen ag'ashları, dad salın', Qalın' tog'aylar kesildi!
3 Qulaq sal, shopanlardın' shekken pa'riyadına, Olardın' a'jayıp jaylawları joq boldı! Qulaq sal, arıslanlardın' aqırg'an dawısına, İordan da'ryasının' boyındag'ı tog'aylıq joq boldı!
4 Qudayım Jaratqan İye bılay deydi: «Soyılıwg'a arnalg'an su'riwge shopanlıq qıl.
5 Su'riwdi satıp alg'anlar, olardı soysa da, o'kinbey ju'ripti. Qoylardı satqanlar bolsa: „Jaratqan İyege shu'kirler bolsın, bayıp kettim!“ – deydi. Shopanlar o'z su'riwlerine janı ashımaydı.
6 Men endi elde jasap atırg'an xalıqqa artıq rehim qılmayman, – deydi Jaratqan İye. – Men olardın' ha'r birin o'z qon'sı xalqına ha'm patshasının' qolına tapsıraman. Olar eldi ezedi, Men de xalıqtı olardın' qolınan qutqarmayman».
7 Solay etip, soyılıwg'a arnalg'an su'riwge, olardın' ezilgenlerine shopanlıq qıldım. Qolıma eki tayaq aldım, birewin «Irzashılıq», ekinshisin «Birlik» dep atap, su'riwdi baqtım.
8 Bir aydın' ishinde u'sh shopandı quwıp jiberdim. Menin' su'riwge bolg'an sabır-taqatım tawısıldı, olar da meni jek ko'rdi.
9 Sonda men su'riwge: «Artıq sizlerdi baqpayman. O'letug'ını o'lsin, nabıt bolatug'ını nabıt bolsın, aman qalg'anları birbirinin' etin jesin», – dedim.
10 Keyin «Irzashılıq» degen tayag'ımdı alıp, onı sındırdım. Usılay qılıp, Jaratqan İyenin' barlıq xalıqlar menen du'zgen kelisimin buzg'anın ko'rsettim.
11 Solay etip, kelisim sol ku'ni buzıldı. Meni gu'zetip turg'an su'riwdin' ezilgenleri bul istin' Jaratqan İyenin' jibergen xabarı ekenin tu'sindi.
12 Men olarg'a: «Eger maqul dep tapsan'ız, menin' is haqımdı berin', bolmasa bermey-aq qoyın'», – dedim. Sonda olar mag'an otız shekel gu'misti is haqım ushın o'lshep berdi.
13 Jaratqan İye mag'an: «Bunı gu'lalshının' aldına tasla», – dedi. Solay etip, o'zleri joqarı dep bahalag'an otız shekel gu'misti alıp, Jaratqan İyenin' İbadatxanasındag'ı gu'lalshının' aldına tasladım.
14 Keyin «Birlik», dep atalg'an ekinshi tayag'ımdı sındırdım. Usılay etip, Yahuda menen İzrail arasındag'ı tuwısqanlıq birlikti buzdım.
15 Jaratqan İye mag'an ja'ne bılay dedi: «Bar, ja'ne bir ma'rte shopanlıq qıl, nadan shopanday ha'reket et.
16 Elge sonday bir shopan jiberemen, ol nabıt bolıp atırg'anlarg'a qaramaydı, joytılg'anlardı izlemeydi, jaraqatlang'anlarg'a shıpa bermeydi, sawların azıqlandırmaydı. Al semiz qoylardın' go'shin jep, tuyaqların julıp taslaydı.
17 Ha'siret shegesen', su'riwdi ta'rk etetug'ın nadan shopan! Qılısh kelsin qolın'a ha'm on' ko'zin'e, Pu'tkilley qurıp qalsın qolın', Pu'tkilley soqır bolsın on' ko'zin'!»
