Xaggay 1 bob
1 Patsha Dariydin'* patshalıg'ının' ekinshi jılının' altınshı ayının' birinshi ku'ninde Yahuda ha'kimi Shealtieldin' ulı Zerubbabelge ha'm bas ruwxaniy İosadaq ulı Eshuag'a payg'ambar Xaggay arqalı Jaratqan İyeden mınaday so'z tu'sti:
2 «A'lemnin' Jaratqan İyesi bılay deydi: „Bul xalıq Jaratqan İyenin' İbadatxanasın qaytadan quratug'ın waqıt ele kelmedi, dep aytıp atır“».
3 Sonnan keyin, Jaratqan İyeden payg'ambar Xaggay arqalı ja'ne mınaday so'z tu'sti:
4 «Bul İbadatxana wayran bolıp qulap atırg'an waqıtta, sizlerge ag'ashlar menen qaplang'an sulıw u'ylerde jasaytug'ın waqıt pa?»
5 Mine, endi A'lemnin' Jaratqan İyesi bılay deydi: «O'zlerin'izdin' tutqan jolların'ız haqqında jaqsılap oylanıp, tu'sinip alın'lar!
6 Ko'p ektin'ler, biraq az orıp aldın'lar. Sizler awqat ha'm sharap iship-jesen'iz de, toymadın'lar. Kiyim-kenshek kiysen'iz de, denen'iz jılımadı. İs haqın'ızdı alg'anın'ız benen, tesik shıjlan qaltag'a salg'anday boladı»
7 A'lemnin' Jaratqan İyesi bılay dep aytıp atır: «O'zlerin'izdin' tutqan jolların'ız haqqında jaqsılap oylanıp, tu'sinip alın'lar!
8 Tawlarg'a shıg'ıp, ag'ash alıp kelin'ler ha'm İbadatxananı qayta qurın'lar. Usılay etip, Menin' kewlim tolıp, atım ullılansın! Bunı Jaratqan İye bolg'an Men aytaman.
9 Mol zu'ra'a't alıwg'a u'mit etken edin'ler, biraq az jıynadın'lar. Awa, u'ylerin'izge ne alıp kelsen'iz de, olardı ko'kke suwırdım. Ne ushın? – dep Jaratqan İye bolg'an Men sorayman. Awa, Menin' İbadatxanam wayran bolıp jatırg'an waqıtta, sizler o'z u'ylerin'izdi salıwg'a juwırg'anın'ız ushın solay isledim.
10 Sonın' ushın da, aspan jawılıp, shıq tu'spedi ha'm jer o'z zu'ra'a'tin bermedi.
11 Eldegi tawlarg'a ha'm atızlarg'a qurg'aqshılıq jiberdim. Bunın' kesiri taza sharapqa, za'ytu'n mayına, jerdin' jetistiretug'ın barlıq o'nimlerine, adamlarg'a ha'm haywanlarg'a tiyip, islegen miynetlerin'iz bosqa ketti».
12 Sonda Shealtiel ulı Zerubbabel, bas ruwxaniy İosadaq ulı Eshua ha'm qalg'an xalıqtın' barlıg'ı Qudayı bolg'an Jaratqan İye jibergen payg'ambar Xaggaydın' so'zlerine qulaq salıp, Jaratqan İyege boysındı.
13 Keyin Jaratqan İyenin' xabarshısı Xaggay Onın': «Men sizler menen birgemen», – degen so'zlerin xalıqqa jetkerdi.
14 Solay etip, Jaratqan İye Yahuda ha'kimi Shealtiel ulı Zerubbabeldi, bas ruwxaniy İosadaq ulı Eshuanı ha'm qalg'an xalıqtın' barlıg'ın ruwxlandırıp, usı iske jigerlendirdi. Sonda olar kelip, Qudayı bolg'an A'lemnin' Jaratqan İyesinin' İbadatxanasının' qayta qurıw jumısın baslap jiberdi.
15 Bul patsha Dariydin' patshalıg'ının' ekinshi jılının' altınshı ayının' jigirma to'rtinshi ku'ni edi.
