Sefaniya 1 bob
1 Yahuda patshası Amon ulı İoshiya da'wirinde Xizkiya a'wladınan bolg'an Kushiydin' ulı, Gedaliyanın' aqlıg'ı, Amariyanın' shawlıg'ı Sefaniyag'a Jaratqan İyeden mınaday so'z tu'sti:
2 «Jer ju'zinen ha'mme na'rseni sıpırıp taslayman, – Deydi Jaratqan İye, –
3 Adamlardı, haywanlardı, Aspandag'ı quslardı, ten'izdegi balıqlardı, Azg'ıratug'ın zatlardı ha'm jawız adamlardı sıpırıp taslayman. Joq etemen jer ju'zinen adamzattı». Bul Jaratqan İyenin' so'zi.
4 «Men Yahudag'a ha'm Erusalim turg'ınlarına qarsı qol ko'teremen. Baalg'a tabınıwshılıqtın' izlerin, But ruwxaniylerinin' ha'm O'z ruwxaniylerimnin' atların o'shiremen.
5 Tamg'a shıg'ıp, aspan denelerine tabınatug'ınlardı, Mag'an da, Molox butına da birdey tabınıp, Menin' atım menen de, Moloxtın' atı menen de ant ishetug'ınlardı joq qılaman.
6 Olar Mennen ju'z burdı, izimnen ju'rmedi, Mennen ja'rdem de, jol-jorıq ta sorawdı qa'lemeydi».
7 Quday İyenin' aldında u'nsizlik saqlan', O'ytkeni Onın' hu'kim ku'ni jaqınlastı. Jaratqan İye qurbanlıq asın tayarlap, Miymanların mira't etti.
8 Jaratqan İye bılay deydi: «Sol qurbanlıq ku'ni, Ha'meldarlardı, patsha ulların, Jat xalıqtın' kiyimlerin kiygenlerdin' ha'mmesin jazalayman.
9 Bosag'adan atlap o'tetug'ınlardı, Zorlıq ha'm aldaw jolı menen, Xojayınlarının' u'ylerin baylıqqa toltırg'anlardı, Sol ku'ni jazalayman».
10 Jaratqan İye bılay deydi: «Sol ku'ni Erusalimnin' Balıq da'rwazasınan dad, Qalanın' taza bo'liminen pa'riyad, To'beshiklerden ku'shli wayrangershilik dawısı esitiledi.
11 Qalanın' bazar ta'repinde jasaytug'ınlar, pa'riyad shegin'. Barlıq sawdagerlerin'iz joq boladı, Aldı-sattı qılatug'ınlar qırıp taslanadı.
12 Sol ku'ni shıra menen Erusalimdi aralap izleymen, „Jaratqan İyenin' qolınan jaqsılıq ta, jamanlıq ta kelmeydi“, Dep o'zlerinshe oylag'anlardı, O'mirden zawıqlanıp, biyg'am ju'rgenlerdi jazalayman.
13 Olardın' baylıg'ı talan-taraj bolıp, U'yleri wayran etip buzıladı. Qurg'an u'ylerinde jasamaydı, Tikken ju'zimzarlarının' sharabınan ishpeydi».
14 Jaratqan İyenin' ullı hu'kim ku'ni jaqınlastı, Az qaldı, ol ju'da' tez kiyatır. Qulaq salın'! Jaratqan İyenin' ku'ni keldi, Jawıngerlerdin' dawısı ashshı boladı.
15 Sol ku'n Qudaydın' g'a'zep ku'ni! Qayg'ı ha'm azap ku'n, Qıyraw ha'm apat ku'n, Tas tu'nek ha'm qaran'g'ı ku'n, Bultlı ha'm gu'n'girtli ku'n boladı.
16 Sol ku'ni sawash ka'rnayları shalınıp, sawash dawısları shıg'adı, Qorg'anlı qalalar menen minaralarg'a qarsı shabıwıl jasaladı.
17 Jaratqan İye bılay deydi: «Adamlardın' basına apat keltiremen, Soqır adamday olar su'rnigedi, Sebebi olar Mag'an qarsı gu'na isledi. Olardın' qanı suwday ag'adı, Deneleri jerde qıy sıyaqlı shashılıp jatadı».
18 Jaratqan İyenin' g'a'zep ku'ni, Gu'mis ha'm altınları olardı qutqara almaydı. Jaratqan İyenin' qızg'anısh otı pu'tkil du'nyanı jandırıp, joq qıladı. Jaratqan İye jer ju'zinde jasap atırg'anlardın' ha'mmesin, Qorqınıshlı ta'rizde qıyratadı.
