Xabaqquq 3 bob
1 Payg'ambar Xabaqquqtın' jır menen aytılatug'ın duwası.
2 Jaratqan İye, dan'qın'dı esittim, Senin' islegen islerin'e tan' qaldım, Bizin' zamanımızda da sonday islerdi ja'ne isle, o, Jaratqan İye, Endi ha'mmege ma'lim bolsın neler isley alatug'ının'. Miyrim-sha'pa'a'tin'di umıtpa g'a'zeplengenin'de!
3 Quday ja'rdemge keledi Temannan, Muxaddes Quday keler Paran tawınan. Onın' ullılıg'ı qaplaydı aspandı, Og'an arnalg'an alg'ıs-maqtawlar du'nyanı toltıradı.
4 Onın' nurı jıldırımday jarqırar, Nur shashılar Onın' qollarınan, Ku'sh-qu'direti qollarında jasırıng'andur.
5 Ol O'zinin' aldınan kesellikler jiberer, O'ltiretug'ın obag'a izinen ju'riwdi buyırar.
6 Ol turg'anda jer silkinedi, Na'zer taslag'anda, xalıqlar titireydi. A'yyemnen kiyatırg'an tawlar qulap tu'sip, Burınnan bar bolg'an to'beshikler sho'gip, Og'an bas iyedi, Ma'n'gidur Qudaydın' jolları.
7 Kushan adamlarının' o'z shatırlarında qorqqanın, Midyan jerinde jasaytug'ın adamlardın' titiregenin ko'remen.
8 Jaratqan İye, saylarg'a ashıwlandın' ba? G'a'zeplendin' be da'ryalarg'a? Yamasa o'shin' bar ma edi ten'izde? Xalqın' ushın mindin' be jen'ilmes atların'a ha'm sawash arbaların'a?
9 Sen atıw ushın oq jayın'dı alasan', Oqların'dı atıwg'a tayarlaysan'. Jer ju'zin da'ryalar menen qaq bo'lip taslaysan'.
10 Titirep keter tawlar Seni ko'rgende, Seller tasıp, barlıq na'rseni juwıp keter, Ten'iz tu'pleri shırqırap, tolqınları ko'teriler.
11 Senin' oqların'nın' ushqan nurınan, Jıltırag'an nayzan'nın' jıltırawınan, O'z ornında qatıp qalar quyash penen ay.
12 Sen basıp o'tersen' jer ju'zin g'a'zep penen, Xalıqlardı qa'ha'rin' menen basıp ezersen'.
13 O'zin' tan'lag'an xalıqtı ha'm tayınlag'an patshanı qutqarıw ushın kelesen', Jawız eldin' basshısın tas-talqan etesen', Tolıq joq qılasan' jawız patshalıqtın' ku'shlerin.
14 Dushpan a'skerleri bizlerdi dag'ıtıw ushın quyınday bolıp keler, Buqqı taslap, ha'lsiz adamlardı talan-taraj eter, So'ytip, olar shadlanıp quwanar. Al Sen olardın' basshısın o'z nayzası menen o'ltiresen'.
15 Atların' menen ten'izdi basıp, Ullı suwlardı u'yir etip, aylandırasan'.
16 Bulardı esitkenimde, la'rzege keldi denem, Qaltırap ketti menin' erinlerim, Erip ketkendey boldı su'yeklerim, Da'rmansızlıqtan dizelerim titiredi. Biraq bizlerge hu'jim qılg'anlardın' apatshılıq ku'nin, Ku'temen men sabırlılıq penen.
17 Ha'tteki, a'njir ag'ashı miywelemey qalsa, Ju'zim ag'ashları ju'zim bermese, O'nim bermese de za'ytu'n ag'ashları, Atızlarda zu'ra'a't bolmay qalsa da, Qoy qoralar bosap qalsa da, Padada mallar qalmasa da,
18 Men ba'ri bir Jaratqan İyenin' sayasında shadlanaman, Qutqarıwshım Qudayıma quwanaman.
19 İyem, Jaratqan İye ku'shimdur menin', Ol ayaqlarımdı kiyiktin' ayag'ınday shaqqan qılar. Tawlardın' u'stinen meni ju'rgizer.Sazshılar basshısına: tarlı saz a'sbaplar menen aytıladı.
