Xabaqquq 2 bob
1 Men gu'zetshi minarasına shıg'ıp, Minaranın' u'stinde qarap turaman, Jaratqan İyenin' juwabın ku'temen. Menin' nalalarıma qanday juwap beretug'ının ko'remen.
2 Sonda mag'an bılay dep juwap berdi Jaratqan İye: «Taslarg'a anıq qılıp jaz sag'an ayan qılg'anlarımdı, Ha'r bir adam bir qarag'annan oqıy alatug'ın bolsın.
3 Bul ayan belgilengen waqıtta a'melge asadı, Sol waqıt tez arada keledi, bul ayan jalg'an emes. Eger de keshikkendey bolıp ko'rinse, sabır et, Ol a'lbette keshikpey orınlanadı.
4 Qara, menmen adam tuwrı joldan ju'rmegeni ushın o'ledi, Al a'dil adam Qudayg'a degen isenimi menen jasaydı.
5 Baylıq aldamshıdur, Menmen adam tınım tappaydı, Ol o'liler ma'kanına uqsap, O'lim sıyaqlı hesh qashan toymaydı. Sonın' ushın, ellerdi basıp alıp, xalıqlardı tutqın qıladı.
6 Tutqıng'a tu'sken xalıqlar onın' u'stinen ku'lip, mazaqlap bılay deydi: „Ha'y, o'zine tiyisli bolmag'andı talap, bir u'yin qılg'an, Ha'siret shegesen', basqalardın' zatların tonap, qarızın'dı arttırg'an. Bul jag'day qashang'a deyin dawam eter edi?“
7 Qarızın'dı qaytarıwdı talap qılatug'ınlar tosattan payda boladı, Olar kelip, seni qorqınısh ishinde qaldıradı, Sonda sen olar ushın olja bolıp qalasan'.
8 Sen ko'p xalıqlardı tonap, qan to'ktin'. Ellerge, qalalarg'a ha'm ondag'ı xalıqlarg'a zorlıq-zombılıq qıldın', Sonın' ushın, olardan aman qalg'anları seni talaydı.
9 U'yin jawızlıq penen baylıqqa toltırg'an, Apattan qashıw ushın, u'yin biyikke qurg'an, ha'siret shegesen'!
10 Sen o'z hiylen' menen, O'z urpag'ın'a shermendelik alıp keldin', Ko'p xalıqlardı qıyratqanın' ushın, Apat alıp keldin' o'z basın'a.
11 Ha'tteki, u'yin'nin' diywal tasları seni ba'la'a'tleydi, O're ag'ashları da olarg'a qosılıp jan'g'ıradı.
12 Ha'y, qan to'gip qala qurg'an, ha'siret shegesen', Ha'y, a'dalatsızlıq penen qorg'an salg'an, ha'siret shegesen'!
13 Xalıqlardın' barlıq etken en'beklerinin' janıp ketiwi, Milletlerdin' sonshelli islegen miynetlerinin' bosqa shıg'ıwı, A'lemnin' Jaratqan İyesinin' isi emes pe?
14 O'ytkeni suwlar ten'izdi qanday etip toltırıp turg'an bolsa, Jer ju'zi Jaratqan İyenin' ullılıg'ının' bilimi menen toladı.
15 Ha'siret shegesen'! Ha'y, jalan'ash denelerin tamasha qılıw ushın, Qon'sı xalıqlarg'a ma's bolg'anınsha o'zin'nin' g'a'zep sharabın'nan ishtirgen.
16 Sen abıray ornına shermendelikke bo'lenesen', Endi gezek sag'an keldi, o'zin' de ish ha'm ko'rinsin su'nnetsiz jalan'ash denen'. Jaratqan İye sag'an ishtirer on' qolındag'ı jazag'a tolı kesesin, So'ytip abırayın'dı to'gip, shermende qılar.
17 Lebanon tog'aylarında qılg'an zorlıq-zombılıg'ın' o'z basın'a tu'sedi, Jabayı haywanlardı qırıp tasladın', Endi sol islegen jawızlıg'ın' o'zin'di qorqıwg'a saladı. Adamzattın' qanın to'ktin', Ellerge, qalalarg'a ha'm ondag'ı xalıqlarg'a zorlıq-zombılıq qıldın'.
18 Adamzattın' qoldan soqqan oyma ha'm quyma butları nege jaraydı? Olardın' ne paydası bar jalg'annan basqa? Adam o'zi soqqan butına isener, Biraq soqqan butı tilsiz bir u'nsiz zatdur.
19 Ag'ash butqa „Oyan!“ dep aytqan, Tilsiz tasqa „Tur!“ dep jalbarıng'an, ha'siret shegesen'! But sag'an tuwrı joldı ko'rsete alar ma edi? Olar altın ha'm gu'mis penen qaplang'andur, Biraq onın' ishinde o'mir joq.
20 Al Jaratqan İye – O'z muxaddes İbadatxanasında, U'nsiz tursın pu'tkil du'nya Onın' aldında».
