Naxum 1 bob
1 Bul Nineviya qalası haqqında payg'ambarshılıq so'zi. Elqoshlı Naxumg'a berilgen ayan mınaday:
2 Jaratqan İye – qızg'anshaq, o'sh alıwshı Qudaydur, Ol o'sh aladı ha'm g'a'zepke tolıdur. Qarsı shıqqanlardan o'sh alar, Dushpanlarına qarsı g'a'zeplenip ju'rer.
3 Jaratqan İye sabır-taqatlı, Biraq Ol ku'shli, qu'diretlidur. Ayıplının' ayıbın so'zsiz jazalaydı, Ju'rgen jolı quyın menen dawıl boladı, Ayaq astınan shan'day qoyıw bultlar ko'teriledi.
4 Ol bir buyrıq penen qurg'atar ten'izdi, Keptirip taslar pu'tkil da'ryalardı. Quwrap qalar Bashannın' ha'm Karmel tawının' jasıl sho'pleri, Solıp qalar Lebanonnın' gu'lleri.
5 Jaratqan İyenin' aldında tawlar titirer, Da'rgayında to'beshikler erip keter. Ol ko'ringende, jer silkiner, Pu'tkil jer ju'zi ha'm ondag'ı barlıq qaltırap keter.
6 Kim qarsı tura alar Onın' qa'ha'rine? Kim shıday alar Onın' otlı g'a'zebine? G'a'zebi ottay lawlap jayılar, Jartaslar shıl-pa'rshe bolıp keter.
7 Jaratqan İye jaqsıdur, Qıynalg'an waqıtta qorg'andur, Qorg'aydı Ol O'zinen pana tapqanlardı.
8 Biraq ku'shli suw tasqını menen joq eter Nineviyanı, Dushpanlarının' izine tu'sip, qaran'g'ılıqqa aydaydı.
9 Jaratqan İyege qarsı hesh qanday joba du'zbe! O'ytkeni Ol seni joq qıladı. Ekinshi ma'rte Og'an qarsı tura almaysan'.
10 Shırmalg'an tikendey, ma's bolıp batırday bolg'an sizler, Qurg'aq sabanday jandırılıp joq bolasızlar.
11 Ha'y, Nineviya, Jaratqan İyege qarsı joba du'zetug'ın, Jawız ma'sla'ha't beretug'ın sennen shıqtı.
12 Jaratqan İye Yahuda xalqına bılay deydi: «Assiriyalılar ku'shli ha'm sansız bolg'anı menen de, Olar qırılıp, joq bolıp ketedi. Ha'y xalqım, senin' basın'dı azapqa salg'an edim, Endi bunnan bulay azapqa duwshar etpeymen,
13 Moyıntırıg'ın'dı sındırıp, Assiriyanın' qolınan azat qılaman».
14 Assiriya haqqında Jaratqan İye bılay dep ja'riyaladı: «Atın'ızdı dawam etiwshi zu'ryadın'ız bolmasın, Joq qılaman qudayların'nın' u'yindegi but mu'sinlerdi, Jag'ımsız xalıq bolg'anın' ushın, tayarlayman qa'birin'di».
15 Mine, xosh xabar alıp keliwshi, Tınıshlıq xabarı menen tawlardan asıp keler. Ha'y, Yahuda xalqı, belgile bayramların'dı, Orınla Qudayg'a bergen wa'delerin'di. Endi dushpanların' bastırıp kelmes elin'e, O'ytkeni tolıg'ı menen joq etildi olar.
