Mixa 5 bob
1 Ha'y, Erusalim, a'skerlerin'di topla! Dushpanlar bizdi qamal qıldı. Olar tayaq penen İzrail hu'kimdarının' betine urdı.
2 Jaratqan İye bılay deydi: «Ha'y, Efrata aymag'ındag'ı Beytlehem, Yahudadag'ı qalalardın' kishkenesi bolsan' da, İzraildı Menin' atımnan basqaratug'ın ko'sem sennen shıg'adı. Onın' na'sili zamannın' baslanıw da'wirine barıp taqaladı».
3 Sonın' ushın, ha'miledar hayal ko'z jarıp, ullı bolg'ang'a deyin, Jaratqan İye İzrail xalqın dushpanlarg'a ta'slim qıladı. Keyin sol su'rgindegi qalg'an tuwısqanları qaytıp, İzrail xalqına qayta qosıladı.
4 Ol kelip, Jaratqan İyeden alg'an ku'shi menen, Qudayı Jaratqan İyenin' atının' ullılıg'ı menen, Su'riwin bag'adı. Pu'tkil du'nya onın' ullılıg'ın ta'n aladı.
5 Tınıshlıq ornatıwshı ol boladı.Assiriyalılar elimizge hu'jim etip, Qorg'anlarımızdı jarıp o'tkende, Olarg'a qarsı jeti jetekshi ha'm segiz basshı tayınlaymız.
6 Olar Assiriya jerlerine qılısh penen, Nimrod jerlerine qanjar menen hu'kimdarlıq etedi. Assiriyalılar elimizge hu'jim etip, shegaramızg'a kirip kelse, Bizlerdi usı ko'sem qutqaradı.
7 Ko'p xalıqlar arasında, Yaqıp xalqının' qalg'anları, Jaratqan İyenin' jibergen shıg'ınday, Maysa sho'plerdin' u'stine jawg'an jawınday boladı. Olar adamzatqa g'a'rezli bolmaydı, Hesh kimnen ja'rdem de ku'tpeydi.
8 Ko'p milletler ishinde, ko'p xalıqlar arasında, Yaqıp xalqının' qalg'anları, Tog'ay haywanları arasındag'ı arıslanday, Qoy su'riwi arasına kirip alg'an, Jas arıslanday boladı. Ju'rgen jollarında ha'mmege ku'tilmegende taslanadı. Olardın' qolınan hesh kim qutqara almaydı.
9 Ha'y, İzrail, dushpanların'dı jen'esen', Barlıq dushpanların' qırılıp ketedi.
10 Jaratqan İye bılay deydi: «Sol ku'ni atların'ızdı qırıp taslayman, Sawash arbaların'ızdı sındırıp taslayman.
11 Wayran qılaman elin'izdegi qalalardı, Jer menen jeksen qılaman barlıq qorg'anların'ızdı.
12 Sıyqırshılıqqa shek qoyaman, Aran'ızda birde bir palker qaldırmayman.
13 Joq qılaman but ha'm kiyeli tasların'ızdı, Artıq tabınbaysız qolların'ız benen islegen butların'ızg'a,
14 Aran'ızdag'ı kiyeli ag'ashlardı qoparıp taslayman, Qalaların'ızdı jer menen jeksen qılaman.
15 Mag'an boysınbag'an milletlerge, O'z qa'ha'r ha'm g'a'zebimdi to'gip, o'sh alaman».
