Mixa 4 bob
1 Aqırg'ı ku'nler kelgende, Jaratqan İyenin' İbadatxanası qurılg'an taw, Barlıq tawlardan joqarı bolıp, Ha'mme to'beshiklerden ma'rtebeli bolar. Ig'ıp barar ol jerge xalıqlar
2 Ko'p milletler kelip, bılay deydi: «Kelin'ler, Jaratqan İyenin' tawına shıg'ayıq, Yaqıptın' Qudayının' U'yine kireyik. Ol bizlerge O'z jolların u'yretsin, Bizler Onın' jolınan ju'reyik». O'ytkeni nızam shıg'ar Sionnan, Jaratqan İyenin' so'zi keler Erusalimnen.
3 Ko'p xalıqlardı Jaratqan İye hu'kim qılar, Jaqın ha'm uzaqtag'ı ku'shli milletler arasındag'ı, Ja'njellerin sheship berer. Olar qılıshlardan paznalar sog'ar, Nayzalardan oraqlar isler. Bir-birine qılısh ko'termes xalıqlar, Sawash qılıwdı endi u'yrenbes olar.
4 Ha'r kim o'z ju'zimzarının', a'njir ag'ashının' astında tınısh jasaydı, Hesh kim olarg'a abay etpeydi. Bunı A'lemnin' Jaratqan İyesinin' O'zi aytadı.
5 Barlıq xalıqlar o'z qudaylarına erse de, Bizler Qudayımız Jaratqan İyenin' jolınan ma'n'gi-baqıy ju'remiz.
6 Jaratqan İye bılay deydi: «Sol aqırg'ı ku'nler kelgende, Jıynap alarman qırg'ıng'a ushırag'anlardı, Toplayman quwg'ın bolg'anlardı, Azapqa duwshar etkenlerimdi.
7 Qırg'ıng'a ushırag'anlardı aman saqlayman, Quwg'ın bolg'anlardan ku'shli xalıq do'retemen, Sol ku'nnen baslap, ma'n'gige Men, Jaratqan İyen'iz, Sion tawında olarg'a hu'kimdarlıq qılaman.
8 Ha'y, su'riwdin' gu'zetiw minarası, Qız Sionnın' qorg'anı, Hu'kimdarlıg'ın' o'zin'e qaytar, Ha'y, qız Erusalim, patshalıg'ın' qayta tiklener».
9 Erusalim, nege sen dad salıp, zarlaysan'? Patshan' bolmag'anı ushın ba? Tolg'aq tutqan hayalday nege azap shegesen'? Ma'sla'ha'tshin' o'lgeni ushın ba?
10 Ha'y, qız Sion, tuwıp atırg'an hayal sıyaqlı, Ah urıp, o'zin'di ha'r ta'repke tasla. Sebebi qaladan shıg'ıp, sho'l dalalarg'a barıp qonıslaysan', Keyin Babilong'a a'ketilip, su'rgin etilesen'. Biraq ol jerde sen azatlıq tabasan', Qutqaradı seni Jaratqan İye dushpan qolınan.
11 Degen menen, sag'an qarsı jıynaldı bir talay milletler, Sen haqqında bılay dep aytadı olar: «Kelin'ler, Siondı xorlayıq, Basına tu'skenlerin tamasha qılayıq».
12 Biraq bilmeydi olar Jaratqan İyenin' niyetin, Olardı qırmang'a aparılatug'ın da'n bawlarınday jıynap atır, Onın' usı jobasın olar tu'sinbeydi.
13 Jaratqan İye bılay deydi: «Ha'y, qız Sion, tur da, olardı basqılay basla! Sebebi temirden qılarman senin' shaqların'dı, Qoladan isleymen senin' tuyaqların'dı, Ezip, maydalap taslaysan' ko'p xalıqlardı. Bag'ıshlaysan' Mag'an alg'an oljaların'dı, Pu'tkil jer ju'zinin' İyesi bolg'an Jaratqan İyege».
