Mixa 1 bob
1 Yahuda patshaları İotam, Axaz ha'm Xizkiya hu'kimdarlıq etken waqıtları moreshetli Mixa payg'ambarg'a Samariya ha'm Erusalim haqqında ayan bolıp, Jaratqan İyeden mınaday so'z tu'sti:
2 Ha'y, pu'tkil xalıqlar, qulaq salın'! Ha'y, jer ju'zi ha'm onda jasawshılar, tın'lan'! Quday İye O'z muxaddes İbadatxanasınan sizlerge qarsı gu'walıq beredi.
3 Mine, Jaratqan İye O'z ma'kanınan shıg'ıp keler, Jer ju'zine tu'sip, tawlar to'besi menen ju'rer.
4 Sonda mum otta erip ketkenindey, Tawlar Onın' ayag'ı astında erip keter. To'beshiklerden suw ag'ıp tu'skenindey, Olar oypatlıqqa qaray to'giler.
5 Bulardın' barlıg'ı Yaqıp urpag'ının' ko'terilisi, İzrail xalqının' gu'naları sebepli bolar. Yaqıp urpag'ının' ko'terilisine kim juwapker? Olardın' bas qalası Samariya emes pe? Yahudadag'ı to'beshiklerdegi butparazlıqqa kim juwapker? Bas qala Erusalim emes pe?
6 Sol sebepten Jaratqan İye bılay deydi: «Samariyanı qırdag'ı tas u'yinine, Ju'zim egiletug'ın jerge aylandıraman, Tasların oypatlıqqa to'gip, Qalanın' tiykarın jalan'ashlayman.
7 Samariyanın' barlıq butları bo'lek-bo'lek etip sındırılar, Tabınatug'ın orınlardag'ı buzıqshılıq penen jıynalg'an sawg'alar jandırılar. Butlardın' barlıg'ın joq etemen. Buzıqlıq jolı menen jıynalg'an sawg'alar, Basqa jurttag'ı buzıqlarg'a to'lem etip alıp ketiler».
8 Men, usı sebepli jılap, dad salaman, Jalan' ayaq ha'm jalan'ash ju'remen, Sag'alday uwıldap, qayg'ıraman, U'kidey bozlap, ah uraman.
9 Sebebi Samariyanın' jarasına shıpa joq, Bul jara Yahudag'a da juqtı, Jetip keldi ol xalqımnın' da'rwazasına, ha'tteki, Erusalimnin' o'zine.
10 Bul xabardı dushpanımız Gatqa esittirmen'! Olardın' aldında ko'z jasın'ızdı to'kpen'! Beyt-Lafrada qayg'ıdan topıraqqa awnan'!
11 Ha'y, Shafir xalqı, Jalan'ash ha'm shermende halında su'rginge ketesiz. Saanan turg'ınları qalalarınan shıqpaydı, Beyt-Esel turg'ınları joqlaw aytıp, jas to'gedi, Endi Beyt-Esel sizlerge ja'rdem bere almaydı.
12 Marot turg'ınları qutqarılıwdı, Sabırsızlıq penen ku'tken edi, Biraq Jaratqan İye jibergen apat, Erusalimnin' da'rwazasına jetip keldi.
13 Ha'y, Laxish turg'ınları, atların'ızdı sawash arbalarına qosın', Qız Siondı gu'nag'a baslag'an sizler bolasız. O'ytkeni sizler İzraildan o'rnek alıp, gu'na isledin'iz.
14 Solay eken, ha'y, Yahuda xalqı, Moreshet-Gatqa sawg'aların'ızdı berip, xoshlasa berin'. Ja'rdem ku'ter İzrail patshaları Axzib qalasınan, Biraq olar aldandı.
15 Ha'y, Maresha turg'ınları, Jaratqan İye qalan'ızdı basqınshılardın' qolına tapsıradı, İzraildın' ullı basshıları Adullamdag'ı u'n'girge jasırınadı.
16 Ha'y, Yahuda xalqı, su'yikli balaların'ız ushın, Qayg'ırıp, shashların'ızdı aldırın', Quzg'ınnın' basınday etip, tıqırlatıp taslan'. Sebebi su'rgin etiler balaların'ız.
