Obadiya 1 bob
1 Bul Obadiyanın' ko'rgen ayanı. Quday İye Edom haqqında bul so'zlerdi ayttı. Jaratqan İyeden xabar esittik. Xalıqlarg'a jiberilgen xabarshı: «Kelin'ler, Edomg'a urıs ashayıq!» – dedi+.
2 «Ha'y, Edom, seni xalıqlar arasında ha'lsiz qılaman, Sen og'ada jerkenishli bolasan'.
3 Jartastın' quwıslarında jasap, U'ylerin'di biyiklerge qurdın', Ju'regin'degi menmenlik seni aldadı. O'zin'she: „Kim meni jerge tu'sire aladı?“ – dedin'.
4 Bu'rkittey joqarılasan' da, Uyan' juldızlar arasında bolsa da, Ol jerden to'menge tu'siremen seni», – dedi Jaratqan İye.
5 Jaratqan İye bılay deydi: «Urı ha'm qaraqshılar tu'nde kelse, Tek g'ana o'zlerine keregin almay ma? Ju'zim teretug'ınlar bag'ın'a kirse, Azg'antay bolsa da, ju'zim qaldırmay ma? Biraq sen tolıq nabıt bolasan'.
6 Esawdın' a'wladı – Edom, Senin' ha'mme na'rsen' talan-taraj qılınatug'ını sonshelli, Ha'tteki, jasırın g'a'ziynelerin' de tabılıp, tartıp alınadı.
7 Barlıq awqamlasların' sag'an qarsı shıg'ıp, Seni o'z jerin'nen quwıp shıg'aradı. Kelisim du'zgenlerin' seni aldap, jen'iliske ushıratadı, Nanın'dı jegenler sag'an duzaq quradı, Al sen bunı bilmey qalasan'».
8 Jaratqan İye bılay deydi: «Sol ku'ni Edomnın' dana adamların, Esaw tawlı u'lkelerindegi aqıllı adamlardı joq qılaman.
9 Ha'y, Teman, senin' jawıngerlerin' qorqınıshqa tu'sedi, Esaw tawlı u'lkelerindegi ha'r bir adam joq qılınadı.
10 Tuwısqanın'a, yag'nıy Yaqıpqa, İslegen jawızlıqların' ushın shermende bolıp, Ma'n'gige joq bolasan'.
11 Onın' mal-mu'lkin jat jerliler alıp ketken ku'ni, Sen uzaqtan qarap turdın'. Jat xalıqlar Erusalim da'rwazalarına kirip, Ol ushın shek taslag'anda, Sen de olar sıyaqlı is tuttın'.
12 Tuwısqanın'nın' basına tu'sken baxıtsızlıg'ı ushın, Qol qawsırıp, qarap turmawın' kerek edi. Yahuda xalqı qırg'ıng'a ushırag'anda, quwanbawın' kerek edi, Apat ku'nlerinde, maqtanbawın' kerek edi+.
13 Xalqım apatqa ushırag'an ku'ni, qala da'rwazalarına kirmewin' kerek edi. Sol ku'ni xalqım ushırag'an baxıtsızlıqqa quwanbawın' kerek edi. Olar azapqa duwshar bolg'anda, mal-mu'lkin olja qılmawın' kerek edi.
14 Qashıp baratırg'anlardı o'ltiriw ushın, Jol kesilispelerin tospawın' kerek edi. Sol apat ku'ninde aman qalg'anlardı, Dushpan qolına tapsırmawın' kerek edi».
15 «Menin', Jaratqan İyenin' barlıq xalıqlardı hu'kim qılatug'ın ku'nim jaqınlastı, Ha'y, Edom, sen ne islegen bolsan', sag'an da sol islenedi, İslegen qılmısların' o'z basın'a tu'sedi.
16 Sizler muxaddes tawımda g'a'zep sharabın iship alg'anın'ız sıyaqlı, Barlıq xalıqlar da sol sharaptan simiredi. İship-iship bul du'nyadan joq bolıp ketedi»+.
17 «Sion tawı aman qalg'anlarg'a pana boladı, Ol jer muxaddes boladı. Yaqıptın' urpaqları tartıp alıng'an mu'lkine qaytadan iyelik qıladı,
18 Yaqıptın' urpaqları ot, Yusuptin' xalqı jalın, Esawdın' xalqı saban bolıp qaladı. Olardı o'rtep, joq qıladı, Esawdın' a'wladınan aman qalg'anı bolmaydı». Bular Jaratqan İyenin' so'zleri.
19 Negebte jasaytug'ın Yahuda xalqı Esawdın' tawlı u'lkelerin iyeleydi. Al batıstag'ı taw eteklerinde jasaytug'ınlar Filist, Efrayım ha'm Samariya jerlerin iyeleydi. Benyaminliler Giladtı iyelep aladı.
20 Su'rgin etilgen izraillı jawıngerler Sarafatqa deyin sozılg'an Kenaan jerlerin iyeleydi. Erusalimnen su'rgin qılınıp Sefaradta jasap atırg'anlar Negebtegi qalalardı iyelep aladı.
21 Jen'impazlar Esawdın' tawları u'stinen hu'kimdarlıq qılıw ushın, Sion tawına shıg'adı. Bul patshalıq Jaratqan İyege tiyisli boladı.
- 1
