Amos 1 bob

İzrailg'a qon'sılas xalıqlardın' jazalanıwı (3-15).

¹ Teqoalı sharwashılardın' biri bolg'an Amostın' so'zleri. Yahuda patshası Uzziya, İzrail patshası Ehoash ulı Yarobam hu'kimdarlıq qılg'an waqıtlarda, jer silkiniwden eki jıl aldın, Amos İzrail haqqında ayanlar ko'rdi.

² Amos bılay dedi: «Jaratqan İye Sionnan dawıslap baqıradı, Erusalimnen gu'rkiregen dawıs shıg'aradı. Shopanlardın' jaylawları qayg'ıg'a batadı, Karmel tawının' joqarısındag'ı sho'pler quwrap qaladı».

³ Jaratqan İye bılay deydi: «Damask jınayat u'stine jınayat isledi, Men jazasız qaldırmayman olardı, Olar temir tisli mala menen Giladtı ezdi.

⁴ Sonın' ushın, Xazaeldin' u'yine ot jawdıraman, Ot jandırıp joq etedi Ben-Hadadtın' qorg'an qalaların.

⁵ Damask da'rwazalarının' ta'mbilerin sındıraman, Awen oypatlıg'ında taxtta otırg'andı joq qılaman, Beyt-Edende patshalıq hasasın uslag'andı o'ltiremen, Kir jurtına su'rgin boladı aram xalqı». Bular Jaratqan İyenin' so'zleri.

⁶ Jaratqan İye bılay deydi: «Gaza jınayat u'stine jınayat isledi, Men jazasız qaldırmayman olardı. Olar pu'tkil ja'miyetti su'rginge alıp ketip, Edomlılarg'a satıp jiberdi.

⁷ Sonın' ushın, Gaza diywallarına ot jawdıraman, Ot jandırıp joq etedi onın' qorg'an qalaların.

⁸ Ashdod qalasında taxtta otırg'andı joq qılaman, Ashkelonda patshalıq hasasın uslag'andı o'ltiremen. Ekrong'a qarsı qolımdı ko'teremen, Filistlerdin' aman qalg'anları joq boladı». Bular Quday İyenin' so'zleri.

⁹ Jaratqan İye bılay deydi: «Tir jınayat u'stine jınayat isledi, Men jazasız qaldırmayman olardı. Olar doslıq kelisimin umıtıp, Pu'tkil ja'miyetti tutqıng'a alıp, Edomlılarg'a satıp jiberdi.

¹⁰ Sonın' ushın, Tir qalasının' diywallarına ot jawdıraman, Ot jandırıp joq etedi onın' qorg'an qalaların».

¹¹ Jaratqan İye bılay deydi: «Edom jınayat u'stine jınayat isledi, Men jazasız qaldırmayman olardı. Olar qılısh penen quwdı tuwısqanların, Rehim qılmay, qa'ha'rin sheksiz shashtı, G'a'zebinen hesh qaytpadı.

¹² Sonın' ushın, Temang'a ot jawdıraman, Ot jandırıp, joq etedi Bosranın' qorg'anların».

¹³ Jaratqan İye bılay deydi: «Ammon jınayat u'stine jınayat isledi, Men jazasız qaldırmayman olardı. Olar jer shegarasın ken'eytiw ushın Giladqa hu'jim qılıp, Ol jerdegi ju'kli hayallardın' qarnın jardı.

¹⁴ Sonın' ushın, Rabba qalasının' diywallarına ot qoyaman, Ot jandırıp, joq qıladı onın' qorg'an qalaların, Sawash ku'nindegi qıshqırıqlar astında, Dawıllı ku'nnin' du'beleyi ishinde qaladı.

¹⁵ Ammon patshası xızmetshileri menen birge su'rgin etiledi». Bular Jaratqan İyenin' so'zleri.