Lebiyliler 26 bob
1 «O'zlerin'izge jalg'an qudaylardın' mu'sinlerin islemen'ler, kiyeli taslardı yamasa oyıp islengen taslardı ornatpan'lar. Sebebi Men – Qudayın'ız Jaratqan İyemen.
2 Menin' Shabbatıma a'mel qılıp, Muxaddes ma'kanıma hu'rmet ko'rsetin'. Men – Jaratqan İyemen.
3 Eger qag'ıydalarım boyınsha jasap, buyrıqlarımdı dıqqat penen orınlap ju'rsen'iz,
4 jawındı o'z waqtında jawdıraman. Jer o'z zu'ra'a'tin, miywe ag'ashlar o'z miywelerin beredi.
5 Zu'ra'a'tin'iz sonshelli mol bolg'anlıqtan, ju'zim jıynaytug'ın waqıtqa deyin qırman aydaysızlar, egis waqtına deyin ju'zim jıynaysızlar. Azıq-awqatın'ız ko'p boladı ha'm elin'izde qa'wipsiz jasaysızlar.
6 Elin'izde tınıshlıq saqlayman, tınısh jatıp-turasızlar, hesh kim sizlerdi qorqıta almaydı. Jırtqısh haywanlardı jerin'izden quwıp shıg'araman. Jerin'iz sawash sebepli wayran bolmaydı.
7 Dushpanların'ızdı quwasızlar, olar sizlerdin' qılıshların'ızdın' soqqısınan aldın'ızda jerge qulaydı.
8 Besewin'iz ju'z adamdı, ju'zin'iz on mın' adamdı quwatug'ın bolasızlar. Dushpanların'ızdı qılıshtan o'tkerip, jen'iske erisesizler.
9 Sizlerge O'z na'zerimdi salaman, sizlerdi o'sip-o'ndirip, ko'beytemen. Sizler menen du'zgen kelisimime sadıq qalaman.
10 Burıng'ı zu'ra'a'tin'izdi jep tawısa almaysızlar. Jan'adan alg'an zu'ra'a'tin'izge orın bosatıw ushın burıng'ı zu'ra'a'tin'izdi shıg'arıp taslaytug'ın bolasızlar.
11 Ma'kan jayımdı sizlerdin' aran'ızg'a quraman, sizlerden jerkenip, ju'z burmayman.
12 Sizlerdin' aran'ızda jasaytug'ın Qudayın'ız bolaman. Sizler de Menin' xalqım bolasızlar.
13 Men sizlerdi Mısır elindegi qullıqtan qutqarg'an Qudayın'ız Jaratqan İyemen. Moyıntırıg'ın'ızdı sındırıp tasladım ha'm basların'ızdı ko'terip ju'riwge mu'mkinshilik berdim».
14 «Biraq Mag'an qulaq aspay, pu'tkil buyrıqlarımdı orınlamasan'ız, jazalanasızlar.
15 Qag'ıydalarımnan ju'z burıp, nızamlarımnan jerkenip, buyrıqlarıma boysınbasan'ız ha'm kelisimimdi buzsan'ız,
16 onda sizlerge mınaday jaza jiberemen: u'stin'izge qorqınısh do'ndiremen. O'kpe keselligi ha'm ısıtpa ko'zlerin'izdin' nurın so'ndirip, janın'ızdı kemiredi. Tuqımdı bosqa egetug'ın bolasızlar, sebebi zu'ra'a'tin'izdi dushpanların'ız jeytug'ın boladı.
17 Sizlerge O'zim qarsı shıg'aman. Dushpanların'ız sizlerdin' u'stin'izden jen'iske erisedi. Sizlerdi jek ko'retug'ınlar sizlerge hu'kimdarlıq qıladı ha'm izin'izden hesh kim quwmasa da, qashatug'ın bolasızlar.
18 Eger bularg'a da qaramay, Mag'an qulaq salmasan'ız, gu'naların'ızdın' jazasın jeti ese arttıraman.
19 Qaysar menmenligin'izdi joq qılaman. Aspanın'ızdı temir sıyaqlı, jerin'izdi qola sıyaqlı qılaman.
20 Ku'shin'izdi bosqa sarplaysızlar, jerin'iz o'z zu'ra'a'tin, miywe ag'ashların'ız miywesin bermeytug'ın boladı.
21 Eger bunnan keyin de qarsı shıg'ıwdı dawam etsen'iz, Mag'an qulaq salıwdı qa'lemesen'iz, gu'naların'ızdın' jazasın jeti esege arttıraman.
22 Sizlerge qarsı jabayı haywanlardı jiberemen. Olar sizlerdi balaların'ızdan ayırıp, malların'ızdı qırıp taslaydı. Sonda sizlerdin' sanın'ız azayıp, jolların'ız bosap qaladı.
23 Bunın' menen de tuwrı jolg'a tu'spey, Mag'an qarsı shıg'ıwdı dawam etsen'iz,
24 Men de sizlerge qarsı shıg'ıp, gu'naların'ız ushın sizlerdi jeti ese jazalayman.
25 Kelisimimdi buzg'anın'ız ushın basın'ızg'a sawash do'ndirip, jazalayman. Qalaların'ızg'a sheginip, tıg'ılsan'ız, aran'ızg'a illet jiberemen ha'm sizlerdi dushpanın'ızg'a ta'slim qılaman.
26 Bir tislem nang'a zar qılaman. Sonda on hayal nanların bir tandırda jabatug'ın boladı. Nanın'ız az-azdan, o'lshep beriletug'ın boladı. Sizler bunı jegenin'iz benen de, bug'an toymaysızlar.
27 Bulardan keyin de Mag'an ja'ne qulaq salmay, Mag'an qarsı shıqsan'ız,
28 onda Men de g'a'zep penen sizlerge qarsı shıg'aman ha'm gu'naların'ızdın' jazasın jeti esege ko'beytemen.
29 Ashlıq sebepli ulqızların'ızdın' denesin jeytug'ın bolasızlar.
30 Tabınatug'ın orınların'ızdı qulatıp, tu'tetki tu'tetiletug'ın orınların'ızdı joq qılaman. O'liklerin'izdi jansız butların'ızg'a qosıp u'yemen, sizlerden jerkenetug'ın bolaman.
31 Qalaların'ızdı wayran qılıp, muxaddes orınların'ızdı buzıp taslayman. Mag'an usıng'an xosh iyisli sadaqaların'ızdı qabıl etpeymen.
32 Elin'izdi wayran qılaman, ol jerge jaylasatug'ın dushpanların'ız bul awhalg'a qattı tan' qalısatug'ın boladı.
33 Sizlerdi bolsa, basqa xalıqlardın' arasına tarqatıp jiberip, qılıshım menen sizlerdin' izin'izge tu'sip alaman. Elin'iz bosap qaladı, qalaların'ız wayran boladı.
34 Sizler dushpanların'ızdın' elinde jasap atırg'anın'ızda, jerin'iz bosap qaladı. Sol waqıtları Shabbat jıllarının' ornın toltırıp, dem aladı.
35 Jerin'iz wayran bolıp, bosap qalg'an waqıtta dem aladı. Sebebi sizler elin'izde jasap atırg'an waqtın'ızda, Shabbat jılları jerin'izge dem bermegen edin'iz.
36 Dushpanların'ızdın' jerlerinde aman qalg'anların'ızdın' ju'regine sonday bir qorqınısh salaman, ha'tteki, japıraqtın' sıtırlısınan da qılıshtan qashqanday bolıp qashasızlar. Sizlerdin' izin'izden hesh kim tu'spese de, qashıp, jıg'ılasızlar.
37 Sizlerdi hesh kim quwmasa da, qılıshtan qashqanday bolıp, bir-birin'izge su'rnigip jıg'ılasızlar. Dushpanların'ızg'a qarsı tura almaysızlar.
38 Solay etip, basqa xalıqlardın' arasında joq bolasızlar. Dushpanların'ızdın' jerleri sizlerdi jutıp jiberedi.
39 Aman qalg'anların'ız bolsa, dushpan jerlerinde o'zlerinin' ha'm ata-babalarının' gu'naları sebepli dimarın'ız qurıp, azap shegesizler.
40 Biraq sizler o'zlerin'izdin' ha'm ata-babaların'ızdın' gu'naların, Mag'an qıyanet etkenlerin'izdi ha'm Mag'an qarsı islegen islerin'izdi ta'n alasızlar.
41 Sebebi gu'naların'ız sebepli sizlerge qarsı shıg'ıp, dushpanların'ızdın' jerine alıp bardım. Endi tas ju'reklerin'izdi jumsartıp, ayıpların'ızdın' jazasın o'teysizler.
42 Sonda Men de Yaqıp, Isaq ha'm İbrayım menen du'zgen kelisimimdi ha'm sizlerge wa'de qılıp bergen jerdi esleymen.
43 El wayran bolıp, bosap qalg'an waqıtları Shabbat jıllarının' ornın toltırıp, dem aladı. Sizler islegen gu'naların'ızdın' jaza mu'ddetin o'teysizler, o'ytkeni sizler nızamlarımnan bas tartıp, qag'ıydalarımnan jerkendin'iz.
44 Bularg'a qaramay, Men dushpan jerlerinde bolg'an sizlerden bas tartpayman, sizlerden jerkenip, tolıg'ı menen qırıp taslamayman. Sizler menen du'zgen kelisimimdi buzbayman. Sebebi Men sizlerdin' Qudayın'ız Jaratqan İyemen.
45 Qudayın'ız bolıw ushın, basqa xalıqlardın' ko'z aldında Mısırdan alıp shıqqan ata-babaların'ız benen du'zgen kelisimimdi sizler ushın esleymen. Men – Jaratqan İyemen».
46 Jaratqan İyenin' Sinay tawında Muwsa arqalı İzrail xalqına bergen qag'ıydaları, nızamları ha'm ko'rsetpeleri usılardan ibarat edi.
