Lebiyliler 25 bob
1 Jaratqan İye Sinay tawında Muwsag'a bılay dedi:
2 – İzrail xalqına bılay dep ayt: «Men sizlerge berip atırg'an elge kirgenin'izde, Jaratqan İyenin' hu'rmetine ha'r jetinshi jılı jerge egin ekpey, dem alıs berin'.
3 Altı jıl atızların'ızg'a egin egin'ler, ju'zimlerdin' shaqaların putap, o'nimlerin jıynan'lar.
4 Biraq jetinshi jılı jer ushın dem alıs jılı, yag'nıy Jaratqan İyege arnalg'an Shabbat jılı bolsın. Atızlarg'a egin ekpen'ler, ju'zimzarların'ızdı putaman'lar.
5 O'zliginen o'sip shıqqan hasıldı orıp, shaqaları putalanbag'an ju'zimlerdi saqlap qoyıw ushın, jıynap alman'lar. Jer tolıg'ı menen bir jıl dem alsın.
6 Dem alıs jılında o'zliginen o'sip shıqqan ha'r qanday jerdin' o'niminin' o'zi sizler ushın, qul ha'm shorıların'ız, jallanba xızmetshiler ha'm aran'ızda jasap atırg'an kelgindiler ushın awqat boladı.
7 Jerde o'sip shıqqan hasıllar malların'ızg'a da, jabayı haywanlarg'a da azıq boladı».
8 «Jeti jılda bir ma'rte belgilenetug'ın Shabbat jılının' jeti ma'rte o'tiwin baqlan'. Shabbat jılı jeti ma'rte o'tkende, barlıg'ı bolıp qırıq tog'ız jıl boladı,
9 Keyingi jıldın' jetinshi ayının' onınshı ku'ni, yag'nıy Gu'nadan pa'kleniw ku'ni pu'tkil el boylap qattı dawıslap ka'rnay shertilsin.
10 Usı eliwinshi jıldı muxaddes dep sanan'lar ha'm pu'tkil el xalqı ushın azatlıq ja'riyalan'lar. Usı jıl sizler ushın Qutlı jıl boladı. Ha'r bir adam o'zinin' jer mu'lkin qaytarıp alsın ha'm qul bolg'an ha'r bir adam azat bolıp, o'z tiyresine qaytsın.
11 Eliwinshi jıl sizler ushın Qutlı jıl bolsın. Usı jılı egin ekpen'ler, o'zi o'sip shıqqan eginlerdi orıp alıp, saqlaman'lar, shaqası putalanbag'an ju'zimlerdi jıynaman'lar.
12 O'ytkeni usı jıl Qutlı jıl ha'm bul sizler ushın muxaddes bolsın. Tek atızdan tuwrıdan-tuwrı alıng'an zu'ra'a'tti jen'ler.
13 Qutlı jılda ha'r bir adam o'zinin' jer mu'lkin qaytarıp alsın.
14 Eger bir adamg'a jer satatug'ın bolsan' yamasa onnan jer satıp alatug'ın bolsan', bir-birin'izge nahaqlıq qılman'.
15 Jerdin' bahası keyingi Qutlı jılg'a shekemgi jerdin' jetistiretug'ın zu'ra'a'ti boyınsha bahalansın.
16 Eger aldında ele ko'p jıl bolsa, bahası artsın, al azg'antay jıl qalg'an bolsa, onda bahası tu'sirilsin. Sebebi sag'an atızdı emes, al onın' zu'ra'a'tinin' mug'darın satadı.
17 Bir-birin'izge nahaqlıq qılman'lar, Qudayın'ızdan qorqın'lar. Men – Qudayın'ız Jaratqan İyemen.
18 Qag'ıydalarıma a'mel qılıp, nızamlarıma boysınsan'ız, sonda elin'izde tınıshlıq ishinde jasaysızlar.
19 Jer o'z zu'ra'a'tin berip, sizler toyasızlar ha'm ol jerde tınıshlıq ishinde jasaysızlar.
20 Sizler: „Jetinshi jılı jerimizge egin ekpesek, zu'ra'a'timizdi jıynamasaq, onda ne iship-jeymiz?“ – dep sorawın'ız mu'mkin.
21 Men altınshı jılı sizlerge sonday bereket jiberemen, jer sizler ushın u'sh jıllıq zu'ra'a't beretug'ın boladı.
22 Segizinshi jılı jerlerin'izge egin ekkenin'izde de, tog'ızınshı jılı zu'ra'a'tin'izdi jıynayman degenshe, sol altınshı jılı jıynag'an zu'ra'a'tin'izden jeysizler.
23 Jerin'iz pu'tkilley menshikke satılmasın. O'ytkeni olar Mag'an tiyisli. Al sizler bul jerge kelgindi ha'm jat jerlisizler.
24 Jerin satqan adamg'a o'zinin' jerin qaytarıp satıp alıwına jol qoyın'lar.
25 Eger tuwısqanların'ızdan biri gedeylenip, jerinin' bir bo'legin satıp jibergen bolsa, onın' en' jaqın a'mengeri kelip, jerdi qaytarıp satıp alsın.
26 Jerin satıp alatug'ın a'mengeri bolmasa, onda ol adam jag'dayı jaqsılanıp, jeterli pul jıynasa,
27 jerdi satqannan keyingi jıllardın' ha'm Qutlı jılg'a deyingi jıllardın' zu'ra'a'tinin' bahasın esaplap, jerdi satıp alg'an adamg'a to'lesin. Sonnan keyin, ol o'z jerine o'zi iyelik qılsın.
28 Al onın' jerin qaytarıp satıp alatug'ın pulı bolmasa, jer Qutlı jılg'a deyin satıp alg'an adamg'a tiyisli bolıp turadı. Sol jılı jer satıp alg'an adamnan alınıp, satqan adam o'z jerine qaytadan iyelik qılsın.
29 Eger kim de kim diywal menen qorshalg'an qala ishindegi u'yin satsa, satqan adam bir jılg'a deyin u'yin qaytarıp satıp alıw huqıqına iye boladı.
30 Eger ol u'yin bir jıl ishinde qaytarıp satıp ala almasa, onda u'y satıp alg'an adamnın' mu'lkine aylanıp, ol ha'm onın' na'sili u'ydin' ma'n'gi iyesi bolıp qaladı. Qutlı jılda da u'y jan'a iyesinin' qolınan qaytarıp alınbaydı.
31 Al diywal menen qorshalmag'an awıllardag'ı u'yler atızlar sıyaqlı esaplansın. Bunday u'ylerdi aldıng'ı iyesi qaytarıp satıp alıw huqıqına iye boladı, Qutlı jılda u'ydi satıp alg'an adam onı qaytarıp beriwi tiyis.
32 Al lebiyliler o'zlerine tiyisli qalalarda satqan u'ylerin ha'mme waqıtta qaytarıp satıp alıw huqıqına iye bolsın.
33 Lebiyliler qaytarıp satıp alatug'ın usınday mu'likler, yag'nıy lebiylilerge tiyisli bolg'an qalalardag'ı satılg'an ha'r bir u'yler Qutlı jılda o'z iyesine qaytarıp berilsin. Sebebi qalalardag'ı lebiylilerdin' u'yleri İzrail xalqının' arasındag'ı olardın' mu'lki bolıp esaplanadı.
34 Olardın' qalalarının' a'tirapındag'ı jaylawlar bolsa, ulıwma satılmasın. O'ytkeni bular olardın' ma'n'gilik mu'lki».
35 «Eger bir tuwısqanın'ız jarlılanıp, mu'ta'j awhalg'a tu'sip qalsa, og'an ja'rdem berin'. Ol sizlerdin' aran'ızda kelgindi yamasa jat jerli sıyaqlı jasasın.
36 Ol adamnan pul ha'm awqat ushın u'steme o'ndirip alman'. Qudaydan qorqın', tuwısqanın'ızdın' aran'ızda jasawına jol qoyın'.
37 Og'an u'steme berip, pul o'ndirmen' ha'm awqattı o'zin'izge kiris qılıw ushın bermen'ler.
38 Men Qanan elin sizlerge beriw ushın ha'm Qudayın'ız bolıw ushın, sizlerdi Mısırdan shıg'arıp alg'an Qudayın'ız Jaratqan İyemen.
39 Eger aran'ızda jasap atırg'an izraillı bir tuwısqanın'ız jarlılanıp qalsa ha'm ol qul sıpatında sag'an satılsa, onı qulday etip jumsaman'.
40 Og'an u'yin'izdegi jallanba jumısshı yamasa kelgindi sıyaqlı qatnasta bolın'. Ol sag'an Qutlı jılg'a deyin xızmet qılsın.
41 Qutlı jılda balaları menen birge azat bolsın. Olar o'z tiyresine, ata-babalarının' jer mu'lkine qaytsın.
42 Sebebi izraillılar Menin' Mısırdan shıg'arıp alg'an qullarım boladı. Sonlıqtan olar qul sıyaqlı satılmasın.
43 Og'an xojayınlıq qılıp, qatal qatnasta bolman'. Qudayın'ızdan qorqın'.
44 Qulların'ız ha'm shorıların'ız a'tirapın'ızdag'ı xalıqlardan bolsın. Qul ha'm shorını olardın' arasınan satıp alıwın'ızg'a boladı.
45 Ja'ne de, aran'ızda jasap atırg'an kelgindilerdin' balaların satıp alıp, olarg'a xojayın bola alasızlar.
46 Olardı miyras qılıp, balaların'ızg'a qaldırıp kete alasızlar. Olar o'mir boyı sizlerge qul boladı. Biraq izraillı tuwısqanların'ızdın' birine xojayınlıq qılıp, qatal qatnasta bolman'.
47 Aran'ızda jasap atırg'an kelgindi yamasa jat jerli bir adam bayıp ketip, gedeylengen bir izraillı tuwısqanın'ız og'an yamasa onın' urpaqlarınan birine qul sıpatında satılsa,
48 izraillı adam qunı to'lenip, azat bolıw huqıqına iye boladı. Onın' ag'ayin-tuwg'anlarının' biri onın' qunın to'lep, azat qılsın.
49 Sonday-aq a'kesinin' ag'ası, atalas tuwısqanı yamasa jaqın ag'ayinlerinin' biri onı qaytarıp satıp alıp, onı azat qılıwı mu'mkin. Yamasa o'zi jeterli pul toplasa, o'zinin' azatlıg'ın qaytarıp alıwına boldı.
50 Ol xojayını menen esaplasıwı kerek. O'zin satqan jıldan Qutlı jılg'a deyingi jıllardı esaplasın. Azatlıg'ının' qunı qalg'an jıllardın' sanı boyınsha bir jumısshının' ku'nlik is haqısının' esabı boyınsha to'lensin.
51 Eger de Qutlı jılg'a ko'p jıllar qalsa, onda azatlıq qunın o'zi satılg'an bahag'a tiykarlanıp to'lesin.
52 Eger Qutlı jılg'a azg'antay jıl qalsa, onda usı boyınsha esaplasıp, o'zinin' azatlıq qunın to'lesin.
53 Ol xojayınının' qasında bir jılg'a jallang'an jumısshı sıyaqlı bolıp jasawı kerek. Xojayınının' og'an qatal qatnasta bolıwına jol qoyma.
54 Eger satılg'an tuwısqanın'ız usı jollar menen azat bola almasa, Qutlı jılda balaları menen birge azat etilsin.
55 O'ytkeni izraillılar Menin' qullarım, Mısırdan O'zim shıg'arıp alg'an qullarım boladı. Men – Qudayın'ız Jaratqan İyemen».
