Lebiyliler 1 bob
1 Jaratqan İye Muwsanı shaqırıp alıp, Ushırasıw shatırınan og'an bılay dedi:
2 – Sen İzrail xalqına ja'riyalap mınalardı ayt: «Aran'ızdag'ı birin'iz Jaratqan İyege qurbanlıq bermekshi bolsa, ol iri yamasa mayda mal usınsın.
3 Eger iri maldan jandırılatug'ın qurbanlıq beretug'ın bolsa, onda ol minsiz ha'm erkek mal usınsın. Jaratqan İyenin' bul qurbanlıqtı qabıl etiwi ushın, qurbanlıqtı Ushırasıw shatırının' aldına alıp kelsin.
4 Sol adam qurbanlıq maldın' basına qolın qoysın. Sonda qurbanlıq adamnın' gu'nalarının' juwılıwı ushın qabıl etiledi.
5 Keyin ol bug'anı Jaratqan İyenin' aldında shalsın. Xaronnın' ulları bolg'an ruwxaniyler bug'anın' qanın alıp kelip, qandı Ushırasıw shatırının' kirer awzının' aldındag'ı qurbanlıq orınnın' to'rt qaptalına serpip jibersin.
6 Son'ınan qurbanlıq berip atırg'an adam jandırılatug'ın qurbanlıqtın' terisin sıyırıp alıp, onı jiliklep bo'lsin.
7 Al ruwxaniy Xaronnın' ulları qurbanlıq orında ot jag'ıp, u'stine otın qalasın.
8 Keyin maldın' jiliklerin, basın ha'm ish mayların sol ottın' u'stine jaylastırsın.
9 Maldın' ishek-qarnı ha'm tuyaqları suw menen juwılsın. Al ruwxaniy olardın' barlıg'ın qurbanlıq orınnın' u'stinde tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı.
10 Eger mayda maldan jandırılatug'ın qurbanlıq beretug'ın bolsa, onda ol minsiz bolg'an erkek toqlı yamasa teke usınsın.
11 Onı qurbanlıq orınnın' arqa ta'repinde, Jaratqan İyenin' aldında shalsın. Xaronnın' ulları bolg'an ruwxaniyler qandı qurbanlıq orınnın' to'rt qaptalına serpip jibersin.
12 Adam qurbanlıqtı jiliklep, basın ha'm ish mayların ayırıp alsın. Ruwxaniy olardı qurbanlıq orındag'ı janıp turg'an ottın' u'stine jaylastırsın.
13 Qurbanlıqtın' ishek-qarnı ha'm tuyaqları suw menen juwılsın. Al ruwxaniy olardın' barlıg'ın qurbanlıq orınnın' u'stinde tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı.
14 Eger kim de kim jandırılatug'ın qurbanlıq etip Jaratqan İyege qus bermekshi bolsa, onda ol qumırı yamasa jas kepter usınsın.
15 Ruwxaniy onı qurbanlıq orıng'a a'kelip, basın u'zip alsın ha'm basın qurbanlıq orınnın' u'stinde tu'tetip jandırsın. Al qustın' qanın qurbanlıq orınnın' qaptalına sıg'ıp, ag'ızsın.
16 Ruwxaniy qustın' jemsegin ishindegi na'rseleri menen birge shıg'arıp, qurbanlıq orınnın' shıg'ıs ta'repindegi ku'l to'giletug'ın jerge taslasın.
17 Son' qustın' qanatlarınan uslap, qustı qaq ayırsın, biraq onı ekige bo'lip taslamasın. Keyin qustı qurbanlıq orındag'ı janıp turg'an ottın' u'stine qoyıp tu'tetip jandırsın. Bul – jandırılatug'ın qurbanlıq, Jaratqan İyege xosh iyisli sıy boladı».
