İoel 3 bob
1 «Mine, sol ku'nlerde, Men Yahuda ha'm Erusalimdi, Qaytadan abadanshılıqqa eristirgenimde,
2 Barlıq milletlerdi jıynap, Ehoshafat oypatlıg'ına alıp baraman. Mu'lkim bolg'an İzrail xalqın, Milletler arasına tarqatıp, jerimdi bo'lisip alg'anı ushın, Sol jerde olardı hu'kim qılaman.
3 Olar qul saylaw ushın shek tasladı xalqım ushın, O'zleri buzıqshılıq qılıw ushın, er balalardı sattı, İshken sharabı ushın qızlardı to'lem ornına berdi.
4 Ha'y, Tir, Sidon ha'm barlıq filist u'lkeleri, Sizlerge Mennen ne kerek? Mennen o'sh alıwdı qa'leysizler me? Eger Mennen o'sh almaqshı bolsan'ız, Sol waqıttın' o'zinde o'z qılmısın'ızdı, Qaytarıp o'z basın'ızg'a salaman.
5 Sizler tonap aldın'ız gu'mis ha'm altınımdı, Alıp kettin'iz o'z ibadatxanaların'ızg'a qımbat bahalı zatlarımdı.
6 Yahuda ha'm Erusalim xalqın greklerge satıp, Olardı o'z watanınan uzaqlastırdın'ız.
7 Ko'resizler, Yahuda ha'm Erusalim xalqın, Alıp shıg'aman sizler satqan jerlerden. Qılmısın'ızdı o'z basın'ızg'a salaman.
8 Endi ul ha'm qızların'ızdı Yahuda xalqına tapsıraman, Olardı uzaq bir jurtqa – shebalılarg'a satadı. Bulardı Jaratqan İye bolg'an Men ayttım».
9 Milletler arasında bılay dep ja'riyalan': «Sawashqa tayarlanıp, batırların'ızdı shaqırın'. Barlıq a'skerlerin'iz atlanıp, hu'jimge shıqsın!
10 Paznan'ızdan qılıshlar, Orag'ın'ızdan nayzalar sog'ın'. Ha'lsizler: „Jawıngermen“, – desin.
11 Ha'y, do'gerektegi barlıq milletler, asıg'ın', Ha'mmen'iz jıldam kelin'». Jaratqan İyeden O'z batırların sol jerge a'keliwin soran'.
12 Jaratqan İye bılay deydi: «Milletler ayaqqa tursın, Ehoshafat oypatlıg'ına toplansın. Sebebi do'gerektegi barlıq milletlerdi, Hu'kim etiw ushın sol jerde bolaman.
13 Qa'ne, oraq salın'lar, eginler pisti, Kelin'ler, ju'zim iskenjeleri tolıp ketti, Basıp ju'zimlerdi sıg'ın'lar. O'ytkeni olardın' jawızlıqları tolıp ketti».
14 Hu'kim oypatlıg'ına, Sansız alaman jıynaldı, Hu'kim oypatlıg'ına, Jaqınlastı Jaratqan İyenin' ku'ni.
15 Quyash ha'm ay qaran'g'ılasqan, Juldızlardın' nurı so'nip qalg'an.
16 Jaratqan İye Sionda turıp baqıradı, Erusalimnen gu'rkiregen dawıs shıg'aradı. Aspan ha'm jer shayqaladı. Biraq Jaratqan İye O'z xalqın panasına aladı, İzrail xalqının' qorg'anı boladı.
17 Jaratqan İye ja'ne bılay deydi: «Sol waqıtta sizler biletug'ın bolasız, Muxaddes tawım bolg'an Siondı ma'kan etken, Qudayın'ız Jaratqan İye – Men ekenimdi. Erusalim muxaddes qala, Basqa xalıqlar onı endi hasla basıp almaydı.
18 Sol ku'ni mazalı ju'zim sharabı ag'ar tawlardan, Su't ag'ıp turar to'beshiklerden, Yahudadag'ı ha'mme suwsız o'zekler suwg'a toladı, Jaratqan İyenin' u'yinen bir bulaq shıg'adı, Shittim oypatlıg'ın suwg'aradı.
19 Biraq Mısır wayran boladı, Edom izsiz sho'lge aylanadı, Sebebi olar yahudalılardın' jerine hu'jim qılıp, Ayıpsız adamlardın' qanın to'kti.
20 Al Yahuda adamnın' ma'n'gi ma'kanlaytug'ın jeri boladı, Erusalim a'wladtan-a'wladqa turadı.
21 To'gilgen qanlar ushın jaza bermegen edim, Endi olardın' qanının' o'shin alaman. Jaratqan İyen'iz bolg'an Men Siondı ma'kanlayman».
