İoel 1 bob
1 Petuel ulı İoelge Jaratqan İyeden so'z tu'sti:
2 Ha'y, aqsaqallar, tın'lan'lar, Elde jasap atırg'an ha'r bir adam, qulaq salın'lar, Sizin' zamanın'ızda yamasa ata-babaların'ızdın' da'wirinde, Ju'z bergen be edi usınday apat?
3 Aytıp berin' bul haqqında balaların'ızg'a, Balaların'ız bayanlap bersin balalarına, Olardın' balaları jetkizsin keyingi a'wladına.
4 Sheksheklerden qalg'anın shegirtkeler jedi, Olardan awısqanın qon'ızlar jedi, Qon'ızlardan awısqanın qurtlar jedi.
5 Ha'y, ma'sku'nemler oyanın' ha'm jılan'! Ha'y, sharap ishiwshiler, sharabın'ız ushın dad salın'! O'ytkeni taza sharabın'ız awzın'ızdan tartıp alındı.
6 Bastırıp keldi jerime ku'shli ha'm sansız bir xalıq, Tisleri arıslan tislerine uqsar, Arıslanday gu'rek tisleri de bar.
7 Wayran qıldı ju'zim ag'ashlarımdı, Jalan'ashlap tasladı a'njir ag'ashlarımdı, Shaqalarının' qabıqların sılıp tasladı, Ha'mmesi appaq talday bolıp qaldı.
8 Ku'yewinen ayırılıp, aza kiyim kiygen, Jas kelinshektey dad salın'.
9 Jaratqan İyenin' u'yinde toqtadı g'a'lle ha'm ishimlik sadaqası, Jaratqan İyege xızmet etip atırg'an ruwxaniyler aza tutıp atır.
10 Egislik maydanlar bosap qaldı, dad salmaqta dalalar, O'ytkeni joq etildi biydaylar, Tawısıldı jan'a sharap, za'ytu'n mayı da aqpay, toqtap qaldı.
11 Biyday ha'm arpa ushın qayg'ırın', ha'y, diyxanlar! Dad salın', ha'y, bag'manlar, Sebebi atızın'ızdın' o'nimleri joq boldı.
12 Ju'zim shaqaları quwradı, a'njir ag'ashları solıdı, Anar, palma, alma ag'ashları, Barlıq miywe ag'ashları quwradı. Adamzattın' quwanıshı joq boldı.
13 Ruwxaniyler, aza kiyim kiyip, jas to'gin', Qurbanlıq orındag'ı xızmettegiler, dad salın', Ha'y, Qudayımnın' xızmetinde ju'rgenler, İbadatxanag'a kelip, tu'ndi aza kiyim menen o'tkerin'. O'ytkeni Qudayın'ızdın' İbadatxanası ushın, G'a'lle ha'm ishimlik sadaqası qalmadı.
14 Oraza ushın ku'n belgilen', Saltanatlı jıynalıs ja'riyalan'. Aqsaqallardı ha'm bul jerde jasaytug'ınlardın' ha'mmesin, Qudayın'ız Jaratqan İyenin' u'yine jıynan', Jaratqan İyege ha'mmen'iz jalbarının'!
15 Sol ku'n, yag'nıy Jaratqan İyenin' ku'ni jaqındur, Qu'direti ku'shli Qudaydın' jiberetug'ın apatı sıyaqlı keledi sol ku'n.
16 Azıq-awqatımız joq etildi ko'z aldımızda, Qudayımızdın' u'yinde quwanısh ha'm shadlıq tamam bolg'an joq pa?
17 Tuqımlar shirip ketti kesekler astında, G'a'lle o'nimleri quwrap qalg'anlıg'ı sebepli, G'a'llexanalar bosap, telekler buzıldı.
18 In'ırsıp atır mallar! Gezip ju'ripti padalar, O'ytkeni quwrap qalg'an jaylawdag'ı otlar, Qoy su'riwleri de qıynalıp qalg'an.
19 Jaratqan İye, Sag'an jalbarınaman. O'ytkeni jalın jalmadı jaylawlardı, Ot o'rtedi daladag'ı barlıq ag'ashlardı.
20 Ha'tteki, jabayı haywanlar da Sag'an jalbarınıp atır, Sebebi say ha'm bulaqlar qurıp qaldı, Ot jalmadı daladag'ı jaylawlardı.
