Hoshea 1 bob
1 Yahuda patshaları Uzziya, İotam, Axaz, Xizkiya hu'kimdarlıq etken waqıtları ha'm İzrail patshaları Ehoash ulı Yarobam hu'kimdarlıq etken waqıtları Beeriy ulı Hosheag'a Jaratqan İyeden so'z tu'sti.
2 Jaratqan İye Hoshea arqalı so'yley baslap, og'an bılay dedi: «Bar, bir buzıq hayalg'a u'ylen, onın' buzıqshılıq penen tuwg'an balaları boladı. O'ytkeni bul el de Jaratqan İyeden bas tartıp, opasızlıq qıldı».
3 Solay etip, Hoshea Diblayımnın' qızı Gomerge u'ylendi. Gomer ha'miledar bolıp, Hosheag'a ul tuwıp berdi.
4 Jaratqan İye Hosheag'a bılay dedi: «Ulın'nın' atın İzreel dep qoy. Sebebi uzaq waqıt o'tpey, Men patsha Ehudın' shan'arag'ın İzreelde qan to'kkeni ushın jazalayman. İzrail patshalıg'ın joq qılaman.
5 Sol ku'ni Men İzreel oypatlıg'ında İzraildın' sadag'ın sındıraman».
6 Gomer ja'ne ha'miledar bolıp, qız tuwdı. Jaratqan İye Hosheag'a: «Qızdın' atın Lo-Ruxama dep qoy. O'ytkeni bunnan bılay Men İzrail xalqına rehim qılmayman, olardı keshirmeymen.
7 Biraq Yahuda xalqına rehim qılaman. Olardı sadaq, qılısh, sawash, at ha'm atlılar arqalı emes, al Jaratqan İye, olardın' Qudayı bolg'an Men O'z ku'shim menen qutqaraman», – dedi.
8 Gomer Lo-Ruxamanı emshekten shıg'arg'annan son', ja'ne ha'miledar bolıp, ul tuwdı.
9 Jaratqan İye bılay dedi: «Ulın'nın' atın Lo-Ammiy dep qoy. O'ytkeni endi sizler Menin' xalqım emessiz, Men de sizlerdin' Qudayın'ız emespen.
10 Degen menen, İzrail xalqı ten'izdegi qum sıyaqlı ko'p bolıp, olardı o'lshep te, sanap ta bolmaytug'ın waqıt keledi. Olarg'a: „Sizler xalqım emessiz“, – dep aytılg'an jerde: „Tiri Qudaydın' balalarısız“, – dep aytıladı.
11 Sonda Yahuda ha'm İzrail xalıqları qaytadan birlesip, o'zlerine bir basshı tan'laydı. Olar o'z elinde o'sip, gu'llep jasnaydı. Solay etip, İzreeldin' ku'ni ullı bir ku'n boladı».
