Daniel 1 bob
1 Yahuda patshası Ehoyakimnin' patshalıg'ının' u'shinshi jılında Babilon patshası Nabuxodonosor Erusalimge ju'ris qılıp, qalanı qamal qıldı,
2 Jaratqan İye Nabuxodonosordın' Yahuda patshası Ehoyakimdi tutqıng'a alıwına ha'm Qudaydın' İbadatxanasındag'ı bazı ıdıslardı alıp ketiwine jol qoydı. Nabuxodonosor ıdıslardı Babiloniyag'a alıp barıp, olardı o'z qudayının' ibadatxanasının' g'a'ziynexanasına jaylastırdı.
3 Babilon patshası sarayının' bas xızmetshisi Ashpenazg'a İzrail xalqınan alıp kelingen tutqınlardın' ishinen patshag'a ha'm aq su'yeklerdin' shan'arag'ına tiyisli bolg'an jas jigitlerdi alıp keliwdi buyırdı.
4 Bular minsiz, kelbetli, ha'r ta'repleme aqıl-parasatlı, bilimli, jaqsı tu'sinikke iye ha'm patsha sarayında xızmet etiwge ılayıqlı bolıwı kerek edi. Ja'ne de Ashpenaz olarg'a kaldeylerdin' tilin ha'm a'debiyatın u'yretiwi tiyis edi.
5 Patsha olar ushın o'z dasturxanınan awqat ha'm sharap ajıratıp qoydı. Sol jas jigitler u'sh jıl dawamında ta'lim alg'annan keyin, patshanın' aldında xızmetke tayın bolıwı kerek edi.
6 Tan'lang'an jaslardın' arasında Yahuda urıwınan bolg'an Daniel, Xananiya, Mishael ha'm Azariya bar edi.
7 Saraydın' bas xızmetshisi olardın' atların o'zgertip, Danieldi Belteshassar, Xananiyanı Shadrax, Mishaeldi Meshax, Azariyanı bolsa Abed-Nego dep atadı.
8 Daniel o'zin haramlamawdı sheshti ha'm ol saray bas xızmetshisinen patsha dasturxanınan beriletug'ın awqat ha'm sharaptan a'kelmewdi o'tinish qıldı.
9 Quday Danieldin' saray bas xızmetshisinin' kewlinen shıg'ıwına ha'm rehimine miyasar bolıwına jol qoydı.
10 Saraydın' bas xızmetshisi Danielge bılay dedi: «Yaq, sizlerge beriletug'ın awqat penen ishimliklerdi ullı ma'rtebeli patshamızdın' o'zi belgilep berdi. Onın' buyrıqlarınan bas tartıwdan qorqaman. Eger ol ju'zin'izdin' ko'rinisi basqa jas jigitlerdin' ju'zinen go're solg'ın ekenin ko'rse, onda janımdı qa'wip astına qoyg'an bolasız».
11 Daniel usı ma'sele boyınsha saray bas xızmetshisi tayınlag'an saqshı menen so'ylesti, sebebi bul saqshı Daniel, Xananiya, Mishael ha'm Azariya ushın juwapker adam edi. Ol saqshıg'a bılay dedi:
12 «İltimas, qulların'ızg'a on ku'n dawamında jewge palız o'nimlerin ha'm ishiwge suw berip, sınap ko'rin'.
13 Keyin bizlerdin' ko'rinisimizdi patsha dasturxanınan awqat jegen jigitlerdin' ko'rinisi menen salıstırıp ko'rin', usıdan keyin o'z bilgenin'izdi qılın'».
14 Solay etip, saqshı bug'an ırazı bolıp, olardı on ku'n dawamında sınap ko'rdi.
15 On ku'n o'tkennen keyin, olardın' qa'ddi-qa'wmetleri tolısıp, patsha dasturxanınan berilgen awqatlardı jegen jigitlerden a'dewir kelbetli ha'm tolıg'ıraq bolıp ko'rindi.
16 Solay etip, sol ku'nnen baslap saqshı patsha dasturxanınan olar ushın alıp kelingen awqatlar menen sharaplardı bılay qoyıp, olarg'a tek g'ana palız o'nimlerin beretug'ın boldı.
17 Quday bul to'rt jigitke ha'r ta'repleme bilim ha'm a'debiyat penen danalıqtı u'yreniwde uqıp bergen edi. Onnan qala berse, Daniel ha'r tu'rli ayan ha'm tu'slerdi jorıw qa'biletine iye edi.
18 Patsha belgilegen mu'ddet tamam bolg'anda, saray bas xızmetshisi barlıq jigitlerdi Nabuxodonosordın' aldına alıp bardı.
19 Patsha olar menen so'ylesti ha'm olardın' arasınan Daniel, Xananiya, Mishael ha'm Azariyag'a ten' keletug'ını tabılmadı. Sonın' ushın, olar patshanın' xızmetine tayınlandı.
20 Patsha qanday soraw bermesin, olardın' danalıg'ı, tu'sinigi pu'tkil patshalıqtag'ı palkerlerden ha'm porxanlardan on ese u'stin bolıp shıqtı.
21 Patsha Kirdin' patshalıg'ının' birinshi jılına deyin Daniel sarayda xızmet etti.
