Ezekiel 48 bob
1 «Mınalar urıwlardın' atları. Dan urıwının' u'lesi arqada jaylasqan. Onın' shegarası Xetlon jolı boylap Lebo-Xamatqa deyin barıp, onnan Damask ha'm Xamat arasındag'ı arqa shegarada ornalasqan Xasar-Enang'a deyin sozıladı. Dan urıwına tiyisli aymaq İzrail elinin' shıg'ıs shegarasınan batıs shegarasına shekem sozıladı.
2 Asherdin' u'lesi Dannın' jeri menen shegaralasıp, shıg'ıstan batısqa deyin sozıladı.
3 Naftaliydin' u'lesi Asher jeri menen shegaralasıp, shıg'ıstan batısqa deyin sozıladı.
4 Menashshenin' u'lesi Naftaliydin' jeri menen shegaralasıp, shıg'ıstan batısqa deyin sozıladı.
5 Efrayımnın' u'lesi Menashshe jeri menen shegaralasıp, shıg'ıstan batısqa deyin sozıladı.
6 Rubennin' u'lesi Efrayım menen shegaralasıp, shıg'ıstan batısqa deyin sozıladı.
7 Yahudanın' u'lesi Rubennin' jeri menen shegaralasıp, shıg'ıstan batısqa deyin sozıladı.
8 Yahudanın' shegarasınan baslap, shıg'ıstan batısqa deyin sozılg'an jerdi ajıratıp qoyın'. Onın' eni jigirma bes mın' shıg'anaq, uzınlıg'ı shıg'ıstan batısqa sozılg'an, urıwlardın' payına tiygen jerdin' uzınlıg'ı menen ten' bolsın. Bul jerdin' ortasında Muxaddesxana boladı.
9 Jaratqan İyege arnalg'an jerdin' uzınlıg'ı jigirma bes mın' shıg'anaq, eni jigirma mın' shıg'anaq boladı.
10 Muxaddes aymaqtın' ruwxaniylerge tiyisli bo'leginin' arqadag'ı uzınlıg'ı jigirma bes mın' shıg'anaq, batıstag'ı eni on mın' shıg'anaq, shıg'ıstag'ı eni on mın' shıg'anaq, qubladag'ı uzınlıg'ı jigirma bes mın' shıg'anaq boladı. Onın' ortasında Jaratqan İyenin' Muxaddesxanası boladı.
11 Bul u'les Sadoq na'silinen shıqqan ha'm ruwxaniylikke tayınlang'an ruwxaniylerge tiyisli boladı. Olar Menin' talaplarımdı orınladı. İzrail xalqı menen birge lebiyliler de joldan azg'anda, olar Mag'an sadıq qaldı.
12 Muxaddes aymaqtın' ju'da' muxaddes bo'legi ruwxaniylerge tiyisli boladı. Ol jer lebiylilerdin' jerine shegaralas boladı.
13 Ruwxaniylerdin' jerinin' janınan lebiylilerge beriletug'ın jerdin' uzınlıg'ı jigirma bes mın' shıg'anaq, eni jigirma mın' shıg'anaq boladı. Bul bo'lektin' uzınlıg'ı barlıg'ı bolıp jigirma bes mın' shıg'anaq, eni jigirma mın' shıg'anaq boladı.
14 Bul bo'lekti satıwg'a da, almastırıwg'a da bolmaydı. Bul eldegi en' jaqsı u'les boladı. Onı basqa adamnın' qolına beriwge bolmaydı. Sebebi bul – Jaratqan İyenin' muxaddes jeri.
15 Qalg'an eni bes mın' shıg'anaq, uzınlıg'ı jigirma bes mın' shıg'anaq bolg'an a'piwayı jer qala u'yleri ha'm jaylawlar ushın beriledi. Qala sol jerdin' orayında jaylasadı.
16 Qalanın' o'lshemi mınaday: arqa ta'repi to'rt mın' bes ju'z, qubla ta'repi to'rt mın' bes ju'z, shıg'ıs ta'repi to'rt mın' bes ju'z ha'm batıs ta'repi to'rt mın' bes ju'z shıg'anaq.
17 Qala arqa, shıg'ıs, qubla ha'm batıs ta'replerden eni eki ju'z eliw shıg'anaq bolg'an jaylawlar menen qorshalg'an boladı.
18 Qaladan tısqarı bolg'an, muxaddes jer menen shegaralas turg'an jerdin' shıg'ıs ta'repi de, batıs ta'repi de on mın' shıg'anaq boladı. Bul jerde qalada islewshiler ushın azıq jetistiriledi.
19 İzraildın' ha'mme urıwlarınan qalada islewshiler bul atızlarg'a egin egiwi mu'mkin.
20 Ulıwma ajıratılg'an jerdin' uzınlıg'ı da, eni de jigirma bes mın' shıg'anaqtan boladı, al qalag'a ajıratılg'an u'les muxaddes aymaqtın' to'rtten birine ten' boladı.
21 Muxaddes aymaqtın' ha'm qalag'a qaraslı bo'lektin' eki ta'repindegi jerler hu'kimdarg'a tiyisli boladı. Onın' uzınlıg'ı jigirma bes shıg'anaq bolıp, shıg'ıs ta'repindegisi shıg'ıs shegarag'a, batıs ta'repindegisi batıs shegarag'a barıp taqaladı. Urıwlarg'a tiyisli u'leske shegaralas jaylasqan bul eki aymaq hu'kimdarg'a tiyisli boladı. Muxaddes İbadatxana turg'an muxaddes aymaq olardın' ortasında boladı.
22 Solay etip, lebiylilerdin' u'lesi ha'm qala mu'lki hu'kimdardın' iyeliginin' arasında jaylasadı. Hu'kimdardın' iyeligi Yahuda ha'm Benyamin jerlerinin' ortasında boladı.
23 Qalg'an urıwlarg'a kelsek, Benyaminnin' u'lesi shıg'ıstan batısqa deyin sozıladı.
24 Shimonnın' u'lesi Benyaminnin' u'lesi menen shegaralasıp, shıg'ıstan batısqa deyin sozıladı.
25 İssaxardın' u'lesi Shimonnın' u'lesi menen shegaralasıp, shıg'ıstan batısqa deyin sozıladı.
26 Zebulonnın' u'lesi İssaxardın' u'lesi menen shegaralasıp, shıg'ıstan batısqa deyin sozıladı.
27 Gadtın' u'lesi Zebulonnın' u'lesi menen shegaralasıp, shıg'ıstan batısqa deyin sozıladı.
28 Gadtın' u'lesinin' qubla shegarası Tamar qalasınan Qadeshtegi Meriba suwlarına shekem baradı, ol jerden Mısır shegarasındag'ı say boylap o'tip, Jer Orta ten'izine jetedi.
29 Solay etip, İzrail urıwlarına bo'lip beretug'ın u'les jerlerin'iz usılar, – deydi Quday İye».
30 «Qalanın' aynala do'geregi mınaday bolsın: uzınlıg'ı to'rt mın' bes ju'z shıg'anaq bolg'an arqa ta'repte
31 u'sh da'rwaza bolsın. Qala da'rwazaları İzrail urıwlarının' atları menen atalsın. Arqa ta'reptegi da'rwazalar Ruben, Yahuda ha'm Lebiy da'rwazaları dep atalsın.
32 Uzınlıg'ı to'rt mın' bes ju'z shıg'anaq bolg'an shıg'ıs ta'repte u'sh da'rwaza bolıp, olar Yusup, Benyamin ha'm Dan da'rwazaları dep atalsın.
33 Uzınlıg'ı to'rt mın' bes ju'z shıg'anaq bolg'an qubla ta'repte u'sh da'rwaza bolıp, olar Shimon, İssaxar ha'm Zebulon da'rwazaları dep atalsın.
34 Uzınlıg'ı to'rt mın' bes ju'z shıg'anaq bolg'an batıs ta'repte u'sh da'rwaza bolıp, olar Gad, Asher ha'm Naftaliy da'rwazaları dep atalsın.
35 Qalanın' aylanası barlıg'ı bolıp on segiz mın' shıg'anaq boladı. Qala sol ku'nnen baslap „Jaratqan İye sol jerde“ dep ataladı».
