Ezekiel 47 bob
1 Keyin ol meni qaytadan İbadatxana qapısına alıp bardı. İbadatxana shıg'ısqa qarap turg'an edi. Men İbadatxana bosag'asının' astınan shıg'ısqa qaray suw ag'ıp turg'anın ko'rdim. Suw İbadatxananın' qubla ta'repinen shıg'ıp, qurbanlıq orınnın' qublası arqalı ag'ıp turg'an edi.
2 Adam meni arqa da'rwaza arqalı alıp shıqtı ha'm sırt jaq penen aylanıp, shıg'ısqa qarap turg'an sırtqı da'rwazag'a alıp bardı. Suw qubla ta'repten ag'ıp turg'an edi.
3 Adam qolındag'ı o'lshewish jibi menen shıg'ısqa qaray ju'rdi de, mın' shıg'anaq aralıqtı o'lshedi. Keyin meni suwg'a tu'sirdi. Suw tobıg'ıma kelip turdı.
4 Ol tag'ı mın' shıg'anaq aralıqtı o'lshep, meni armanıraq alıp bardı. Suw dizeme keldi. Ja'ne mın' shıg'anaq aralıqtı o'lshep, meni ja'ne de armanıraq alıp bardı. Endi suw belime deyin keldi.
5 Keyin ol ja'ne mın' shıg'anaq aralıqtı o'lshep aldı. Bul jerde suw men o'te almaytug'ın da'ryag'a aylandı. Suw ko'terilip, ju'zip o'tpese, keship o'te almaytug'ın da'ryag'a aylang'an edi.
6 Ol mennen: – İnsan ulı, mınanı ko'rip tursan' ba? – dep soradı. Keyin meni jag'ag'a alıp shıqtı.
7 Jag'ag'a shıqqanımda, men eki jag'ada da ko'p tereklerdin' o'sip turg'anın ko'rdim.
8 Ol mag'an bılay dedi: – Bul suw shıg'ısqa qaray ag'ıp, İordan tegisligi arqalı O'li ten'izge quyadı. Sonda ten'izdin' suwı dushshı boladı.
9 Da'rya ag'ıp barg'an ha'mme jerde tirishilik baslanadı, balıqlar tolıp tasadı. Sebebi da'rya suwı ashshı suwdı dushshı suwg'a aylandıradı. Bul suwlar ag'ıp o'tken jerlerdin' ha'mmesinde tirishilik boladı.
10 Da'rya boylarında balıqshılar turıp, EnGediyden En-Eglayımg'a shekemgi orınlarda awların keptiredi. Jer Orta ten'izindegidey balıqlardın' tu'ri ko'p boladı.
11 Biraq batpaqlıqlar menen shalshıq suwlardın' suwları tazalanbaydı. Olar duz ka'ni bolıp qala beredi.
12 Da'ryanın' eki ta'repinde ha'r tu'rli miywe ag'ashları o'sedi, japıraqları solımaydı, miyweleri tawısılmaydı, ha'r ayda miywe beredi. O'ytkeni Muxaddesxanadan shıqqan suw olardı suwg'aradı. Miyweleri azıq boladı, al japıraqları shıpalı boladı.
13 «Quday İye bılay deydi: Jerdi İzraildın' on eki urıwına bo'lip bergenin'izde, mınaday qılın': Yusupke eki pay berilsin.
14 Jerdi urıwlarg'a ten'dey bo'lip berin'ler. Men bul jerdi ata-babaların'ızg'a beremen dep ant ishtim. Bul jer sizlerdin' mu'lkin'iz boladı.
15 Eldin' shegarası mınaday: arqa shegaran'ız Jer orta ten'izinen baslanıp, Xetlon jolı arqalı Lebo-Xamattın' qası menen Sedad,
16 Berota qalalarına ha'm Damask penen Xamat aralıg'ında jaylasqan Sibrayım qalasına deyin barıp, Xawran shegarasındag'ı Xaser-Hattixong'a deyin sozıladı.
17 Solay etip, shegara Jer Orta ten'izinen Xasar-Enong'a shekem sozıladı. Arqada Damask ha'm Xamat iyelikleri bar. Bul arqa shegaran'ız.
18 Shıg'ıs shegara Xawran ha'm Damask aralıg'ınan baslanıp, İzrail ha'm Gilad jerleri arasınan ag'ıp o'tetug'ın İordan da'ryası arqalı shıg'ıstag'ı ten'izge barıp, sol jerden Tamar qalasına deyin jetip baradı. Bul shıg'ıs shegaran'ız.
19 Qubla shegaran'ız Tamar qalasınan Qadeshtegi Meriba suwlarına shekem, keyin Mısır shegarasındag'ı say boylap barıp, Jer Orta ten'izine kelip tireledi. Bul qubla shegaran'ız.
20 Batıs shegaran'ız Jer Orta ten'izin boylap barıp, Lebo-Xamatqa qarama-qarsı jaylasqan jerge deyin sozıladı. Bul batıs shegaran'ız boladı.
21 Bul jerlerdi İzrail urıwlarına bo'lip berin'ler.
22 Jerdi o'zlerin'izge ha'm aran'ızda jasap balalı bolg'an kelgindilerge bo'listirip berin'. Jat jerliler İzrail urpaqları arasında jergilikli turg'ınlar sıpatında qaralsın ha'm izraillılar menen ten'dey u'leske iye bolsın.
23 Jat jerli qaysı urıwdın' arasına qonıs basqan bolsa, og'an sol urıwdın' jerinen u'les berilsin, – deydi Quday İye».
