Ezekiel 44 bob
1 Sol adam meni qaytadan Muxaddesxananın' shıg'ısındag'ı sırtqı da'rwaza janına alıp bardı. Da'rwaza jabıq edi.
2 Jaratqan İye mag'an bılay dedi: – Bul da'rwaza ba'rqulla jabıq tursın, ashılmasın, bunnan hesh kim kirmesin. Sebebi Men, Jaratqan İye bunnan kirdim, sonlıqtan ol jabıq halında qaladı.
3 Tek hu'kimdar g'ana Menin' aldımda qurbanlıq asınan jew ushın bul imaratqa kiredi. Ol aywan arqalı kirip, sol jol menen shıg'ıp ketedi.
4 ol adam meni arqadag'ı da'rwaza arqalı İbadatxanag'a alıp keldi. Men İbadatxananın' Jaratqan İyenin' saltanatına tolıp turg'anın ko'rdim ha'm et betimnen jerge jıg'ıldım.
5 Jaratqan İye mag'an bılay dedi: – İnsan ulı, ko'rgen ha'm esitkenlerin'e dıqqatlı bol. Men sag'an Jaratqan İyenin' U'yinin' qag'ıydaları ha'm nızamları tuwralı aytaman. İbadatxanag'a kimlerdin' kirip-shıg'ıwına bolatug'ınına dıqqatlı bol.
6 Qozg'alan'shı İzrail xalqına ayt: «Quday İye bılay deydi: İzrail xalqı, jeter endi, jerkenishli islerin'izdi toqtatın'!
7 Qurbanlıqtın' qanı menen mayın awqat sıpatında Mag'an usıng'anın'ızda, ju'regi ha'm denesi su'nnet etilmegen jat jerlilerdi Muxaddesxanama alıp kirip, onı haramladın'ız. Jerkenishli islerin'iz benen kelisimimdi buzdın'ız.
8 Muxaddes zatlarımdı qorg'awg'a baylanıslı talaplarımdı orınlamadın'ız. Bul zatlarg'a qaraw ushın o'zlerin'izdin' ornın'ızg'a jat jerlilerdi xızmetke qoydın'ız.
9 Quday İye bılay deydi: Ju'regi ha'm eti su'nnet etilmegen birde bir jat jerli, ha'tte, ol izraillılar arasında jasasa da Muxaddes ma'kanıma kirmewi kerek.
10 İzrail joldan azıp, butlarg'a tabınıp ketkende, olarg'a qosılıp Mennen ju'z burg'an lebiyliler o'z gu'nasının' jazasın tartadı.
11 Olar Muxaddes ma'kanımda xızmet ete beredi: da'rwazada qarawıl boladı, İbadatxanag'a baylanıslı xızmetlerdi atqaradı. Jandırılatug'ın qurbanlıqlardı ha'm basqa qurbanlıqlardı soyadı, xalıqqa xızmet etedi.
12 Biraq butlarg'a tabınıp ju'rgen İzrail xalqına xızmet etip, olardı gu'nag'a baslag'anı ushın ant ishemen, – deydi Quday İye, – olar o'z ayıbının' jazasın tartadı.
13 Olar ruwxaniy bolıp Mag'an jaqınlaspaydı, muxaddes zatlarıma ha'm en' muxaddes zatlarıma qol tiygizbeydi. İslegen jerkenishli isleri ushın isnat ju'gin arqalaydı.
14 Degen menen, İbadatxana menen baylanıslı xızmetti ha'm ol jerde islenetug'ın barlıq a'piwayı islerdi olarg'a ju'kleymen.
15 İzrail xalqı Mennen ju'z burıp ketkende, Muxaddesxananın' xızmetin sadıqlıq penen atqarg'an Sadoq na'silinen bolg'an lebiyli ruwxaniyler xızmet etiw ushın Mag'an jaqınlasadı. Qurbanlıqtın' mayın ha'm qanın usınıw ushın Menin' aldımda turadı, – deydi Quday İye.
16 – Tek olar g'ana Muxaddesxanama kirip, Mag'an xızmet etiw ha'm talaplarımdı orınlaw ushın dasturxanıma jaqınlasadı.
17 Ruwxaniyler ishki ha'wlinin' da'rwazasınan kirerde, zıg'ırdan tigilgen kiyim kiyip alsın. İshki ha'wlide yamasa İbadatxana ishinde xızmet qılg'anında u'stine ju'nli kiyim kiymesin.
18 Baslarına zıg'ır sa'lle orasın ha'm zıg'ır diz kiyim kiyip alsın. Terletetug'ın kiyim kiymesin.
19 Sırtqı ha'wlige, xalıqtın' aldına shıqpastan aldın xızmet waqtında kiygen kiyimlerin sheship, muxaddes bo'lmelerde qaldırıp, basqa kiyim kiysin. Xalıq olardın' muxaddes kiyimlerine tiyip ketpesin.
20 Ruwxaniyler shashların pa'ki menen aldırmawı ha'm uzın etip o'sirmewi kerek. Al shashların ba'rqulla keltertip tursın.
21 İshki ha'wlige kirgende birde bir ruwxaniy sharap ishpewi kerek.
22 Olar jesirge de, ajırasqan hayalg'a da u'ylenbewi kerek. Tek g'ana İzrail na'silinen bolg'an qızlarg'a ha'm ruwxaniyden qalg'an jesirge u'yleniwi mu'mkin.
23 Ruwxaniyler xalqıma muxaddes na'rse menen muxaddes emes na'rsenin', haram menen hadaldın' ayırmashılıg'ın u'yretsin.
24 Dawlı ma'selelerde qazılıq etip, Menin' nızamlarıma say qarar shıg'arsın. Men belgilegen bayramlarg'a baylanıslı ko'rsetpelerimdi ha'm qag'ıydalarımdı qadag'alasın. Shabbatımdı muxaddes saqlasın.
25 Olardan hesh biri o'li denege jaqınlap, o'zin haramlamasın. Tek ata-anası, ul-qızı, ag'a-inisi yamasa turmısqa shıqpag'an a'japa ha'm qarındası o'lse g'ana, ruwxaniy o'lige jaqınlap, o'zin haramlawı mu'mkin.
26 Ruwxaniy tazalanıw ra'siminen o'tkennen keyin, ja'ne jeti ku'n ku'tiwi kerek.
27 Ol muxaddes orında xızmet etiw ushın ishki ha'wlige kirgen ku'ni, o'zi ushın gu'na qurbanlıg'ın beriwi kerek, – deydi Quday İye.
28 – Ruwxaniylerge İzrail jerinen u'les berilmesin. Olardın' miyrası da, u'lesi de Men bolaman.
29 Olar g'a'lle sadaqalarınan, gu'na ha'm ayıp qurbanlıqlarınan jeydi. İzrailda tolıg'ı menen Mag'an bag'ıshlang'an ha'r bir na'rse olarg'a tiyisli boladı.
30 Qamırdın' birinshi zuwalasınan jabılg'an nanlar ha'm barlıq sıyların'ız ruwxaniylerdiki boladı. U'yin'izde bereket bolıwı ushın, biydaydın' da'slepki tartılg'an unın ruwxaniylerge berin'.
31 Haram o'lgen yaki jırtqısh haywan talag'an qustın' ha'm haywannın' go'shin jew ruwxaniylerge qadag'an etiledi».
