Ezekiel 25 bob
1 Mag'an Jaratqan İyeden so'z tu'sti:
2 – İnsan ulı, ju'zin'di ammonlarg'a qaratıp, olarg'a qarsı payg'ambarshılıq qıl.
3 Olarg'a ayt: «Quday İyenin' so'zin tın'lan'! Quday İye bılay deydi: Muxaddes ma'kanım haramlang'anda, İzrail jeri wayran qılıng'anda ha'm Yahuda xalqı tutqıng'a tu'skende, „Hay-hay“ dep olardın' u'stinen ku'lgenin'iz.
4 Sonlıqtan Men sizlerdi shıg'ıs xalıqlarının' iyeligine beremen. Olar elin'izge orda qurıp, shatırların tigedi, o'nimlerin'izdi jep, su'tin'izdi ishedi.
5 Rabba qalasın tu'yelerdin' o'risine, Ammon elin qoylardın' qorasına aylandıraman. Sonda sizler Menin' Jaratqan İye ekenimdi bilip alasız.
6 Quday İye bılay deydi: Sen qol shappatlap, ayaq tapırlatıp, İzrail jerin jek ko'rip, baxıtsızlıg'ına shın ju'rekten quwandın'.
7 Sonlıqtan Men de sag'an qarsı qol ko'terip, seni xalıqlarg'a olja qılıp beremen. Seni xalıqlar arasınan joq qılaman, eller arasınan qurtıp, tuqımqurt qılaman. Sonda sen Menin' Jaratqan İye ekenimdi bilip alasan'.
8 Quday İye bılay deydi: Moab penen Seir: „Yahuda xalqının' basqa xalıqlardan artıqmashlıg'ı joq“, – dep ayttı.
9 Sonlıqtan Moabtın' qaptalın eldin' maqtanıshı bolg'an Beyt-Eshimot, Baal-Meon ha'm Kiryatayım qalalarınan baslap ashıp taslayman.
10 Moabtı ammon xalqı menen birge shıg'ıs xalıqlarının' iyeligine beremen. Ammon xalqı milletler arasında eske alınbaytug'ın boladı.
11 Men Moab u'stinen hu'kim shıg'araman. Sonda olar Menin' Jaratqan İye ekenimdi bilip aladı.
12 Quday İye bılay deydi: Edom qaslıq penen Yahudadan o'sh alıp, awır gu'nag'a qol urdı.
13 Sonlıqtan Quday İye bılay deydi: Edomg'a qarsı qolımdı ko'teremen, ondag'ı adamlardı ha'm haywanlardı joq qılaman, al eldi sho'lge aylandıraman. Temannan Dedang'a shekemgi xalıq qılıshtan qırıladı.
14 Men xalqım İzraildın' qolı menen Edomnan o'sh alaman. Olar Edomda Menin' qa'ha'r-g'a'zebim menen ha'reket etedi. Sonda edom xalqı Menin' o'sh alıwımnın' qanday ekenin bilip aladı, – deydi Quday İye.
15 Quday İye bılay deydi: A'yyemnen dushpanlıg'ı bolg'an filistler yahudalılardan o'sh alıwg'a ha'reket etti, ju'regindegi jek ko'riwshilik sebepli olardı jer menen jeksen etip o'sh aldı.
16 Sol sebepli Quday İye bılay deydi: Mine, Men filistlerge qarsı qolımdı ko'terip, keretlerdi joq qılaman ha'm olardın' ten'iz jag'asında qalg'anların qırıp jiberemen.
17 G'a'zep penen jazalap, olardan qattı o'sh alaman. Sonda olar Menin' Jaratqan İye ekenimdi bilip aladı».
