Ezekiel 20 bob
1 Su'rgin bolg'an waqtımızdın' jetinshi jılının' besinshi ayının' onınshı ku'ni İzrail aqsaqallarınan ayırımları Jaratqan İyeden ma'sla'ha't soraw ushın menin' aldıma keldi.
2 Mag'an Jaratqan İyeden so'z tu'sti:
3 – İnsan ulı! İzrail aqsaqalları menen so'ylesip, «Quday İye: Sizler Mennen ma'sla'ha't soraw ushın keldin'iz be? – deydi», – dep ayt. «Tiriligim haqı ant iship aytaman: sizlerge hesh qanday ma'sla'ha't bermeymen, – deydi Quday İye».
4 – Olardı hu'kim qıl! Olardı hu'kim qıl, insan ulı! Olarg'a atababalarının' jerkenishli islerin aytıp ber.
5 Olarg'a ayt: «Quday İye bılay deydi: Men İzraildı tan'lag'an ku'nim, Yaqıptın' urpaqlarına ant ishkenmen ha'm Mısırda O'zimdi tanıtqanman. Men olarg'a ant iship: „Men Qudayın'ız Jaratqan İye bolaman“, – degenmen.
6 Sol ku'ni Men olarg'a, o'zlerin Mısırdan shıg'arıp, olar ushın go'zlegen jer betindegi en' a'jayıp u'lkege, su't ha'm pal ag'ıp turg'an jerge alıp baratug'ınımdı aytıp ant bergen edim.
7 Olarg'a: „Ha'r bir adam o'zi kewil bergen jerkenishli mu'sinlerin ılaqtırıp taslasın, Mısır butları menen o'zlerin haramlamasın. Men Qudayın'ız Jaratqan İyemen“, – degen edim.
8 Biraq olar Mag'an qarsı bas ko'terdi ha'm Meni tın'lamadı. Kewil qoyg'an jerkenishli mu'sinlerin ılaqtırıp taslamadı ha'm Mısır butlarınan ju'z burmadı. Sonda Men Mısırda-aq qa'ha'rimdi to'gip, g'a'zebimdi tolıq shashpaqshı boldım.
9 Biraq olar arasında jasag'an milletler aldında atıma isnat keltirmew ushın, O'z atım hu'rmeti ushın ha'reket ettim. Men ol milletlerdin' ko'zinin' aldında izraillılardı Mısırdan alıp shıg'ıp, O'zimdi olarg'a tanıttım.
10 Men olardı Mısırdan shıg'arıp, sho'lge alıp keldim.
11 O'z qag'ıydalarımdı berdim ha'm nızamlarımdı ja'riyaladım. Olarg'a a'mel qılg'an ha'r bir adam olar arqalı jasaydı.
12 Ja'ne, o'zlerin muxaddes qılatug'ın Men, Jaratqan İye ekenimdi bilsin dep, O'zim ha'm olar arasındag'ı belgi retinde Shabbatımdı berdim.
13 Degen menen, İzrail xalqı sho'lde de Mag'an qarsı shıqtı. Menin' qag'ıydalarıma a'mel qılmadı, nızamlarımdı mensinbedi. Usılardı orınlag'an adam olar arqalı aman qalatug'ın edi. Olar Shabbatımdı da tolıq xorladı. Sonda Men olardın' u'stine g'a'zebimdi to'gip, sho'lde olardı qırıp jibermekshi boldım.
14 Biraq İzraildı Mısırdan alıp shıqqanımdı ko'rgen milletler aldında atıma isnat kelmesin dep, O'z atım hu'rmeti ushın ha'reket ettim.
15 Olardı o'zlerine bermekshi bolg'an jer betindegi en' a'jayıp u'lkege, su't ha'm pal ag'ıp turg'an jerge alıp barmaytug'ınımdı aytıp, sho'lde ant ishtim.Sebebi olar Menin' nızamlarımdı mensinbedi, qag'ıydalarıma a'mel qılmadı ha'm Shabbatımdı xorladı. Olardın' ju'regi butlarg'a berilgen edi.
16 Sebebi olar Menin' nızamlarımdı mensinbedi, qag'ıydalarıma a'mel qılmadı ha'm Shabbatımdı xorladı. Olardın' ju'regi butlarg'a berilgen edi.
17 Degen menen, olardı qırıp jiberiwge ko'zim qıymadı ha'm Men olardı sho'lde joq qılmadım.
18 Men sho'lde olardın' balalarına bılay dedim: „Ataların'ızdın' u'rpa'detleri boyınsha ju'rmen', olardın' butları menen o'zlerin'izdi haramlaman'.
19 Men sizlerdin' Qudayın'ız Jaratqan İyemen. Menin' qag'ıydalarıma a'mel qılın' ha'm nızamlarımdı muqıyatlı tu'rde orınlan'.
20 habbatımdı muxaddes tutın'. Qudayın'ız Jaratqan İye Men ekenimdi biliwin'iz ushın, olar bizlerdin' aramızda belgi boladı“.
21 Biraq balaları da Mag'an qarsı bas ko'terdi. Menin' qag'ıydalarıma a'mel qılmadı, nızamlarımdı orınlawg'a ha'reket etpedi. Adam olardı orınlawı arqalı aman qalatug'ın bolsa da, olardı orınlamadı, Shabbatımdı xorladı. Sonda Men sho'lde olarg'a g'a'zebimdi to'gip, qa'ha'rimdi tolıq shashpaqshı boldım.
22 Solay bolsa da, İzraildı Mısırdan alıp shıqqanımdı ko'rgen milletler aldında atıma isnat kelmesin dep, qolımdı tarttım ha'm O'z atım hu'rmeti ushın ha'reket ettim.
23 Ja'ne de, sho'lde olardı milletler arasına tarqatıp, el boylap shashıp jiberemen dep ant ishtim.
24 Sebebi olar Menin' nızamlarımdı orınlamadı, qag'ıydalarımdı mensinbedi, Shabbatımdı xorladı ha'm ata-babalarının' butlarına qushtarlana ko'z tikti.
25 Sonlıqtan Men olardı jaqsı bolmag'an qag'ıydalardın' ha'm adam orınlag'anı menen aman qalmaytug'ın nızamlardın' biyligine tapsırdım.
26 Olardı qorqıtıw ushın ha'm olar Menin' Quday İye ekenimdi biliwi ushın, o'zleri bergen sıylar, yag'nıy ha'r bir tun'g'ısh perzentin otta jag'ıp, qurbanlıq keltiriwi arqalı olardı haramladım».
27 – Solay eken, insan ulı, İzrail xalqı menen so'ylesip, olarg'a ayt: «Quday İye bılay deydi: Ata-babaların'ız ja'ne opasızlıq qıldı ha'm bul arqalı Mag'an til tiygizdi.
28 Men beremen dep ant ishken jerime olardı alıp barg'anımda, olar ko'rgen ha'r bir biyik to'beshikte ha'm ha'r bir qoyıw japıraqlı terektin' astında o'z qurbanlıqların shaldı. Ol jerde Menin' g'a'zebimdi keltiretug'ın sadaqalardı berdi, xosh iyisli tu'tetkilerdi tu'tetti ha'm ishimlik sadaqaların quydı.
29 Sonda Men olardan: „Sizler barıp atırg'an bul qanday sıyınıw ornı?“ – dep soradım». Sonlıqtan sonday orınlar bu'gingi ku'nge deyin «sıyınıw ornı» dep ataladı.
30 – Solay eken, İzrail xalqına Quday İye bılay deydi dep ayt: «Sizler de ata-babaların'ızg'a eliklep, o'zlerin'izdi haramlamaqshımısız? Olardın' jerkenishli mu'sinleri menen buzıqshılıq qılmaqshımısız?
31 Usı ku'nge deyin, sizler balaların'ızdı otta jag'ıp, qurbanlıq qılıp usınıw arqalı, pu'tkil butların'ız benen o'zlerin'izdi haramlap kiyatırsız. Solay isley otırıp, İzrail xalqı, Mennen ma'sla'ha't soramaqshımısız? Tiriligim haqı ant iship aytaman: sizlerge hesh qanday ma'sla'ha't bermeymen, – deydi Quday İye.
32 – Sizler: „Bizler de basqa milletler, basqa jerlerdegi qa'wimler sıyaqlı, ag'ash ha'm taslarg'a sıyınayıq“, – deysiz. Biraq oyın'ızg'a kelgen bul islerin'iz a'melge aspaydı.
33 Men, Quday İye tiriligim haqı ant iship aytaman: ku'shli bilegim, sozılg'an qolım ha'm lawlag'an g'a'zebim menen u'stin'izden patshalıq qılaman.
34 Ku'shli bilegim, sozılg'an qolım ha'm lawlag'an g'a'zebim menen sizlerdi xalıqlardın' arasınan shıg'arıp, tarqap ketken jerlerin'izden jıynap alaman.
35 Keyin sizlerdi xalıqlardın' sho'l dalasına alıp barıp, sol jerde ju'zbe-ju'z hu'kim shıg'araman.
36 Mısır jerindegi sho'lde ata-babaların'ızg'a qanday hu'kim shıg'arg'an bolsam, sizlerge de sonday hu'kim shıg'araman, – deydi Quday İye.
37 – Sizlerdi hasa tayag'ım menen barlap shıg'ıp, kelisimime boysınıwg'a ma'jbu'r etemen.
38 Qozg'alan'shılardı ha'm Mag'an boysınbaytug'ınlardı sizlerden ayıraman. Olardı su'rginde bolg'an elden alıp shıqqanım menen, olar İzrail jerine kirmeydi. Sonda Menin' Jaratqan İye ekenimdi bilip alasız.
39 Sizler tuwralı, İzrail xalqı, Quday İye bılay deydi: Eger Mag'an qulaq salmaytug'ın bolsan'ız, onda ha'r birin'iz o'z butların'ızg'a xızmet ete berin'ler. Biraq sıyların'ız ha'm butların'ız arqalı Menin' muxaddes atıma artıq isnat keltirmen'ler.
40 Endi Muxaddes tawımda, İzraildın' biyik tawında, – deydi Quday İye, – sol jerde qansha İzrail xalqı bolsa, ha'mmesi Mag'an xızmet etedi. Sol jerde Men olardı ırazılıq penen qabıl etemen. Barlıq muxaddes zatların'ız benen birge sadaqaların'ızdı ha'm o'nimin'izdin' birinshi bo'leklerin sol jerde talap etemen.
41 Sizlerdi xalıqlardın' arasınan alıp shıg'ıp, tarap ketken jerlerin'izden jıynap alg'anımda, sizlerdi xosh iyisli tu'tetki sıpatında qabıl etemen ha'm milletlerdin' ko'zlerinin' aldında O'z muxaddesligimdi ayan etemen.
42 Sizlerdi ata-babaların'ızg'a beremen dep ant ishken jerime, İzrail jerine alıp kelgenimde, Menin' Jaratqan İye ekenimdi bilip alasız.
43 Sol jerde o'zlerin'izdi haramlag'an jolların'ızdı, islegen jawız islerin'izdi esin'izge alasız ha'm islegen barlıq jawızlıqların'ız sebepli o'zin'izden o'zin'iz tiksinesiz.
44 İzrail xalqı, Men sizlerdin' tutqan jaman jolların'ızg'a ha'm jaramas islerin'izge qaray emes, al O'z atım hu'rmeti ushın ha'reket etkenimde, Sizler Menin' Jaratqan İye ekenimdi bilip alasız, – deydi Quday İye».
45 Mag'an Jaratqan İyeden so'z tu'sti:
46 – İnsan ulı, ju'zin'di qublag'a qaratıp, qublag'a waz ayt ha'm sol jerdegi tog'ayg'a qarsı payg'ambarshılıq qıl.
47 Qubladag'ı tog'ayg'a bılay dep ayt: «Jaratqan İyenin' so'zin tın'la! Quday İye bılay deydi: Men ishin'de ot tutandıraman, ol sendegi barlıq ag'ashlardı, jasılın da, quwrag'anın da joq qıladı. Lawlag'an ot o'shpeydi, qubladan arqag'a shekemgi barlıq jerler janıp ku'ydiriledi.
48 Pu'tkil insan ulı bul ottı Jaratqan İyenin', Menin' jaqqanımdı ko'redi, ot o'shpeydi».
49 Sonda men: – Ah, Quday İye! Bul adamlar men tuwralı: «Bul adam tımsal aytıp ju'rgen joq pa?» – dep aytpaqta, – dedim.
