Ezekiel 19 bob
1 – Sen İzrail hu'kimdarları ushın joqlaw aytıp,
2 bılay de: «Senin' anan' qanday arıslan edi?! Ol arıslanlar arasına ornalastı, Jırtqısh arıslanlar arasında balaların o'sirdi.
3 Balalarınan biri ku'shli arıslan bolıp jetilisti, Ol aw qılıwdı u'yrendi, Adamlardı jey basladı.
4 Milletler ol tuwralı esitti, Arıslandı shuqırg'a tu'sirdi, Shınjırlap, Mısır jerine alıp bardı.
5 Anası ku'te-ku'te, u'mitin u'zdi, Balalarınan basqa birewin alıp, Onı ku'shli arıslan qılıp o'sirdi.
6 Ol ku'shli arıslang'a aylanıp, Arıslanlar arasında gezip ju'rdi, Aw qılıwdı u'yrendi, Adamlardı jey basladı.
7 Olardın' qorg'anların buzdı, Qalaların wayran qıldı. Jer ha'm onda jasawshılar, Onın' aqırıwınan titiredi.
8 Do'gerektegi wa'layatlardag'ı milletler, Og'an qarsı hu'jim qıldı. U'stine tor tasladı, Arıslan olardın' shuqırına tu'sti.
9 Shınjırlap, onı qa'peske saldı, Babiloniya patshasına alıp bardı, Onı qamaqqa tasladı. İzrail tawlarının' u'stinde, Qaytıp esitilmesin, dep onın' dawısı.
10 Senin' anan' suwlardın' boyına egilgen, Bag'dag'ı ju'zim ag'ashına uqsar edi. Suwlardın' molshılıg'ınan, Ol o'nimdar ha'm mol shaqalı edi.
11 Hu'kimdarg'a hasa bolg'anday, Ku'shli shaqaları bar edi. Qalın' japıraqlar arasında, Tik boyı ba'lent ko'terildi. Ba'lentligi ha'm mol shaqaları menen, Ko'zge taslanıp turar edi.
12 Biraq g'a'zep penen, Ol suwırılıp jerge urıldı. Shıg'ıs samalı miywelerin solıttı, Ku'shli shaqaları sınıp quwradı, Ha'mmesin ot jalmap tasladı.
13 Ol endi sho'lge, Qurg'aq ha'm suwsız jerge ko'shirildi.
14 Onın' tik shaqasınan jalın shıg'ıp, Solqımların ku'ydirip jiberdi. Hu'kimdarlıq hasası ushın bekkem shaqası qalmadı». Bul joqlaw qosıg'ı bolıp, joqlaw ushın qollanıladı.
