Ezekiel 16 bob
1 Mag'an Jaratqan İyeden so'z tu'sti:
2 – İnsan ulı! Erusalimnin' barlıq jerkenishli islerin a'shkaralap,
3 Quday İye bılay deydi dep ayt: «Senin' ata tegin' ha'm senin' tuwılg'an jerin' Qanan, a'ken' amor xalqınan, anan' xet xalqınan.
4 Tuwılg'anın'da, senin' kindigin' kesilmedi, tazalap shomıldırılmadın', duzg'a salınbadın', jo'rgekke de oralmadın'.
5 Hesh kim ayap, sag'an bulardan birewin islemedi, miyrim ko'rsetpedi. Qaytama, du'nyag'a kelgen ku'ni-aq, seni jek ko'rip, dalag'a ılaqtırıp taslandın'.
6 Qaptalın'nan o'tip baratırıp, Men senin' qanın'a bılg'anıp jatırg'anın'dı ko'rip qaldım, sag'an: „Jasa“! – dedim. Men sag'an: „Jasa“! – dep ayttım.
7 Men seni daladag'ı o'simlik kibi o'sirdim. Sen o'sip ka'malg'a jettin', ayrıqsha go'zzallıqqa bo'lendin', ko'kiregin' tolısıp, shashların' o'sti. Biraq sen tırday jalan'ash edin'.
8 Men ja'ne qasın'nan o'ttim ha'm sag'an ser saldım, sen muhabbatqa tayar edin'. Etegimdi jalan'ash denen'e jawıp, onı qımtadım. Ant iship, senin' menen neke kelisimin du'zdim ha'm sen Meniki boldın', – deydi Quday İye.
9 – Seni shomıldırıp, qannan tazaladım ha'm denen'e za'ytu'n mayın jaqtım.
10 U'stin'e nag'ıslı ko'ylek, ayag'ın'a jumsaq teriden ayaq kiyim kiygizip, basın'a hasıl zıg'ır oraypek oradım ha'm jipekten kiyimler kiygizdim.
11 Seni bezendirdim, qolların'a bilezik, moynın'a monshaq taqtım.
12 Murnın'a a'rebek, qulaqların'a sırg'a tag'ıp, basın'a a'jayıp taj kiygizdim.
13 Sen altın ha'm gu'miske bo'lendin'. Hasıl zıg'ır ha'm jipekten tigilgen nag'ıslı kiyimler kiydin'. Sapalı biyday unınan jabılg'an nan, pal ha'm za'ytu'n mayı menen awqatlandın'. Sen asa sulıw bolıp, xansha da'rejesine jettin'.
14 Sulıwlıg'ın' milletler arasında dan'q tarattı, Menin' sag'an bergen ullılıg'ım sebepli, go'zzallıg'ın' minsiz edi, – deydi Quday İye.
15 – Sen bolsan', go'zzallıg'ın'a isendin', dan'qın'nan paydalanıp, buzıqshılıq isledin'. O'tken-ketkenge kewil qoyıp, go'zzallıg'ın'dı olarg'a berdin'.
16 Kiyimlerin'nen birazı menen sıyınıw orınların bezedin' ha'm sol jerde buzıqshılıq qıldın'. Bunday na'rse burın bolmag'an, endi de bolmaydı.
17 Men bergen altın ha'm gu'mis tag'ınshaqlardan erkek butlardın' mu'sinin islettin' ha'm olar menen buzıqshılıq qıldın'.
18 Nag'ıslı kiyimlerdi olardın' u'stine jawıp, Men bergen za'ytu'n mayın ha'm xosh iyisli tu'tetkini olardın' aldına qoydın'.
19 Menin' nanımdı, Men sag'an bergen sapalı biyday unın, za'ytu'n mayın ha'm paldı xosh iyisli sıy retinde olardın' aldına qoydın'. Awa, solay isledin', – deydi Quday İye.
20 – Ha'tte, Mag'an tuwıp bergen ulların'dı ha'm qızların'dı olarg'a jem qılıp, qurbanlıqqa berdin'. Buzıqshılıq qılg'anın' az bolg'anday,
21 sen Menin' balalarımdı soyıp, otta jag'ıp, olarg'a berdin'.
22 Usı jerkenishli islerdi ha'm buzıqshılıqlardı islegenin'de, o'zin'nin' tırday jalan'ash bolıp, qanın'a bılg'anıp jatırg'an ku'nin'di, jaslıg'ın'dı eslemedin'.
23 Sorın' qurısın, sorın' qurısın! – deydi Quday İye. – İslegen barlıq jawızlıqların'a qosa,
24 sen ha'r bir ashıq maydanda o'zin'e shatır ha'm sıyınıw ornın qurdın'.
25 Ha'r bir ko'shenin' basına sıyınıw ornın qurıp, go'zzallıg'ın'dı ayaq astı qıldın'. O'tken-ketkenge satanın'dı ashıp, buzıqshılıq u'stine buzıqshılıq qıldın'.
26 Jınısıy ag'zası iri bolg'an qon'sıların' mısırlılar menen buzıqshılıq isledin'. Buzıqshılıq u'stine buzıqshılıq qılıp, Menin' qa'ha'rimdi keltirdin'.
27 Mine, Men sag'an qarsı qolımdı ko'terip, ırısqın'dı kemeyttim. Seni dushpanın' filistli qızlardın' qolına berdim. Ha'tte, senin' uyatsız qılıqların'nan olardın' da ju'zi qızarg'an.
28 Sen assiriyalılar menen de buzıqshılıq isledin', toymadın'. Olar menen buzıqshılıq isledin', qanaatlanbadın'.
29 Sawdagerlerdin' jeri bolg'an kaldeylerdin' jerine deyin buzıqshılıg'ın'dı arttırdın', biraq bunın' menen de qanaatlanbadın'.
30 Ju'regin' qanday buzıq! – deydi Quday İye. – Bulardın' ha'mmesin, ju'wensiz jezo'kshedey ju'zege asırdın'.
31 Ha'r ko'shenin' basına shatır qurıp, ha'r bir maydang'a sıyınıw ornın salg'anın'da, sen jezo'ksheden parıq qıldın', sebebi to'lemnen ju'z burdın'.
32 Sen biyopa hayalsan'. O'z ku'yewin'nen go're, basqa erkeklerdi abzal ko'rdin'.
33 Ha'mme buzıqlar sıy aladı, al sen o'zin' oynasların'a sıylar berdin'. Ha'r jaqtan kelip, senin' menen jatıwı ushın, olardı satıp aldın'.
34 Sen basqa buzıqlardan o'zgeshesen'. Hesh kim seni buzıqshılıq qılıwg'a iytermelemegen, sag'an hesh kim haqı to'lemegen, sen o'zin' olarg'a haqı to'legensen'. Sonın' ushın sen basqalarg'a uqsamag'ansan'.
35 Sonlıqtan, jezo'kshe, Jaratqan İyenin' so'zin tın'la!
36 Quday İye bılay deydi: Senin' betsizligin' a'shkara boldı, oynasların' menen buzıqshılıq qılg'anın'da, jalan'ashlıg'ın' ashılıp qaldı, barlıq jerkenishli butların'a tabınıp, balaların'dı olarg'a qurbanlıqqa berdin'.
37 Bular ushın ka'ypi-sapa qurg'an barlıq oynasların'dı, barlıq su'yiklilerin'di, olar menen birge sen jerkengenlerdi ha'mme jaqtan bir jerge toplayman. Seni tırday jalan'ash qılıp, olardın' aldına shıg'arıp qoyaman. Olar senin' tolıq jalan'ash denen'di ko'redi.
38 Neke hadallıg'ın buzg'an ha'm qan to'kken hayallarg'a beriletug'ın jazanı sag'an beremen. G'a'zebim ha'm qızg'anıshım menen senin' qanın'dı ag'ızaman.
39 Seni oynasların'nın' qolına tapsıraman, olar senin' shatırın'dı jıg'ıp, sıyınıw orınların'dı buzıp taslaydı. U'stin'degi kiyimlerin'di ha'm tag'ınshaqların'dı tartıp alıp, seni tırday jalan'ash qaldıradı.
40 Olar sag'an qarsı alamandı toplaydı, seni tas boran qılıp o'ltirip, denen'di qılısh penen tilkimleydi.
41 U'yin'di o'rtep, ko'plegen hayallardın' ko'z aldında seni hu'kim qıladı. Solay etip, buzıqshılıg'ın'a shek qoyaman, artıq oynasların'a haqı to'lemeysen'.
42 Sonda sag'an degen g'a'zebimnen tu'sip, qa'ha'rden qaytaman. Tınıshlanaman ha'm basqa g'a'zeplenbeymen.
43 Sen jaslıq ku'nlerin'di eske almadın'. Qılmıs islep, Meni g'a'zeplendirgenin' ushın, usı qılmısların'a jarasa jaza beremen, – deydi Quday İye. – Barlıq jerkenishli islerin'nin' u'stine bul uyatsız qılıqlardı da qospadın' ba?
44 Naqıl menen so'yleytug'ınlar sen tuwralı: „Anası qanday bolsa, qızı da sonday“, – dep aytadı.
45 Sen ku'yewinen ha'm perzentinen waz keshken anan'a ju'da' uqsaysan'. Sen ku'yewinen ha'm perzentlerinen waz keshken apa-sin'lilerin'nin' o'zisen'. Senin' anan' xet xalqınan, a'ken' amor xalqınan.
46 A'japan' – qızları menen arqa ta'repin'de jasag'an Samariya, al sin'lin' – qızları menen senin' qubla ta'repin'de jasag'an Sodom.
47 Sen olardın' jollarınan ju'rip, jerkenishli islerine eliklep g'ana qoymay, o'z jolların'da olardan tez ozıp kettin'.
48 Men, Quday İye, tiriligim haqı ant iship aytaman: sin'lin' Sodom da o'z qızları menen sen ha'm senin' qızların' islegen jawızlıqların'dı islemedi.
49 Sin'lin' Sodomnın' ayıbı mınaw edi: ol ha'm onın' qızları menmen, toq, biypa'rwa edi. Olar ka'mbag'al ha'm jarlılarg'a ja'rdem bermedi.
50 Olar ta'kabbir edi ha'm Menin' aldımda jerkenishli islerdi isledi. Men bunı ko'rip, olardı joq qıldım.
51 Samariya da sen islegen gu'nalardın' yarımın da islegen joq. Sen jerkenishli islerdi islewde olardan asıp tu'stin'. Sen islegen islerge salıstırg'anda, apa-sin'lilerin' haq bolıp ko'rinedi.
52 Endi shermendeligin'di ko'ter. Sen apa-sin'lilerin'nin' jazasın jen'illestirdin'. Sen olardan da beter jerkenishli gu'nalardı islep, olardı o'zin'nen gu'nasızıraq qılıp ko'rsettin'. Uyattan qızarıp, shermendeligin'di ko'ter. Sebebi sen apa-sin'lilerin'di gu'nasız qılıp ko'rsettin'.
53 Biraq Sodomnın' ha'm onın' qızlarının', Samariyanın' ha'm onın' qızlarının', olar menen birge senin' de abadanshılıg'ın'dı qaytaraman.
54 Sonda sen islegen islerin' ushın uyatqa qalıp, shermende bolasan'. Bunı ko'rip apa-sin'lilerin' o'zlerinin' awhalına shu'kirlik qıladı.
55 Apasin'lilerin' Sodom ha'm Samariya o'z qızları menen burıng'ı awhalına qaytadı. Sen de o'z qızların' menen birge burıng'ı awhalın'a qaytasan'.
56 Ta'kabbir waqtın'da sin'lin' Sodomdı mazaq qılatug'ın edin'.
57 Endi bolsa, senin' jawızlıg'ın' ashılıp qaldı. Sen Aram qızları ha'm onın' barlıq qon'sılarına, filistli qızlarg'a ha'm a'tiraptag'ı seni jek ko'retug'ın barlıq xalıqlarg'a masqara bolasan'.
58 Uyatsız qılıqların' ha'm jerkenishli islerin' ushın jazan'dı tartıwın' sha'rt, – deydi Jaratqan İye.
59 Quday İye bılay deydi: Men sag'an ılayıqlı jazan'dı beremen. Sen Menin' kelisimimdi buzıp, antqa nemquraydı qaradın'.
60 Degen menen, jaslıq shag'ın'da senin' menen du'zgen kelisimimdi yadqa alıp, senin' menen ma'n'gilik kelisim du'zemen.
61 A'japan'dı ha'm sin'lin'di qabıl qılg'anın'da, o'z jolın'dı esin'e alıp, uyalasan'. Men olardı sag'an qız qılıp beremen. Biraq bul senin' menen du'zetug'ın kelisimime kirmeydi.
62 Men senin' menen kelisimimdi qayta tikleymen. Sonda sen Menin' Jaratqan İye ekenimdi bilip alasan'.
63 Men seni barlıq gu'naların'nan pa'klegenimde, sen olardı eske alatug'ın, uyalıp, awzın'dı da ashpaytug'ın bolasan', – deydi Quday İye».
