Ezekiel 1 bob
1 Otızınshı jıldın' to'rtinshi ayının' besinshi ku'ni edi. Men Kebar kanalının' boyında su'rgin etilgenlerdin' arasında turg'anımda, aspan ashıldı ha'm mag'an Qudaydan ayanlar ko'rine basladı.
2 Aydın' besinshi ku'ni, yag'nıy Exoniya patshanın' su'rgindegi waqtının' besinshi jılında,
3 3kaldeylerdin' jerindegi Kebar kanalı boyında mag'an, Buziy ulı ruwxaniy Ezekielge Qudaydan so'z tu'sti. Ol jerde Jaratqan İyenin' qolı menin' u'stimde edi.
4 Qarap, arqadan ku'shli quyınnın' kiyatırg'anın ko'rdim. Ol ot shashqan ha'm nur menen qaplang'an u'lken bult edi. Ottın' ortasında mıs sıyaqlı bir na'rse jaltırap turdı.
5 Ot ortasında ko'rinisi insang'a uqsag'an to'rt tiri janzattın' turg'anın ko'rdim.
6 Olardın' ha'r birinin' to'rt beta'lpeti ha'm to'rt qanatı bar edi.
7 Ayaqları du'ziw, al tabanları tananikine uqsag'an bolıp, jaltırag'an qoladay sa'wle shashıp turdı.
8 To'rt qaptalındag'ı qanatlarının' astında adamnın' qolları bar edi. Olardın' beta'lpeti ha'm qanatları to'rt qaptalında bolıp,
9 qanatları bir-birine tiyip turdı. Janzatlar ju'rgende, burılmay, tuwrı alg'a qaray ha'reketlendi.
10 Olardın' bet-a'lpetinin' ko'rinisi mınaday edi: to'rtewinin' de aldıng'ı bet-a'lpeti adamdiki, on' jag'ındag'ısı arıslandiki, shep jag'ındag'ısı bug'aniki ha'm artındag'ısı bu'rkittiki edi.
11 Olardın' bet-a'lpeti usınday edi. Qanatları bolsa, joqarıg'a qaray jayılıp turdı. Ha'r janzattın' qanatlarının' ekewi qasındag'ı janzatlardın' qanatlarına tiyip tursa, basqa eki qanatı o'z denesin jawıp turdı.
12 Olar tek aldıg'a qaray ha'reketlendi. Hesh jaqqa burılmay, ruwx qay jaqqa bag'darlasa, sol jaqqa qaray ju'rdi.
13 Janzatlardın' ko'rinisi janıp turg'an ko'mir shog'ına yamasa jalan'lag'an otqa megzer edi. Ot janzatlardın' ortasında tınımsız ha'reket eter edi. Ot jalın shashıp, onnan shaqmaq shag'ıp turdı.
14 Janzatlardın' o'zleri de jıldırımday tez ol jaqtan bul jaqqa barıp keler edi.
15 Men janzatlarg'a ser salg'anımda, jerde, ha'r birinin' janında, bir do'n'gelekten turg'anın ko'rdim.
16 To'rt do'n'gelektin' ko'rinisi menen du'zilisi birdey bolıp, sarı yaqıt kibi jaltırap turdı. Olardın' ko'rinisi ha'm du'zilisi do'n'gelektin' ishine kesesine do'n'gelek salıng'anday edi.
17 Janzatlar qay ta'repke bag'ıt alsa da, do'n'gelekler burılmay-aq to'rt ta'repke de jıljıy alatug'ın edi.
18 Do'n'geleklerdin' shen'berleri ba'lent ha'm qorqınıshlı edi. To'rtewinin' de shen'beri aylana ko'zler menen qaplang'an edi.
19 Janzatlar qozg'alg'anda, janlarındag'ı do'n'gelekler de ha'reketke keletug'ın edi. Jerden ko'terilgende, do'n'gelekler de ko'teriletug'ın edi.
20 Ruwx qayaqqa bag'ıt alsa, olar da sol jaqqa baratug'ın, do'n'gelekler de olar menen birge ko'teriletug'ın edi. Sebebi janzatlardın' ruwxı do'n'geleklerdi de ha'reketke keltiretug'ın edi.
21 Janzatlar qozg'alg'anda, do'n'gelekler de qozg'alatug'ın, janzatlar toqtag'anda, do'n'gelekler de toqtaytug'ın, janzatlar jer betinen ko'terilgende, do'n'gelekler de olar menen birge ko'teriletug'ın edi. O'ytkeni janzatlardın' ruwxı do'n'geleklerdi de ha'reketke keltirip turdı.
22 Janzatlardın' basının' u'stinde gu'mbezge uqsag'an, kristallday jaltırag'an ha'm qorqınıshlı bir na'rse jayılıp turg'an edi.
23 Janzatlardın' gu'mbez astında jayg'an qanatları bir-birine qaray sozılıp turdı. Olardın' ha'r birinin' denesin jawıp turg'an basqa eki qanatı da bar edi.
24 Janzatlar qozg'alg'anda, qanatlarının' shuwıldısın esittim. Ol ku'shli suwlardın' shuwıldısına, Qu'direti ku'shli Qudaydın' dawısına, sawash maydanındag'ı la'shkerlerdin' shawqımına uqsar edi. Janzatlar toqtag'anda, qanatların tu'sirip otırdı.
25 Olar toqtap, qanatların tu'sirip otırg'anda, gu'mbez ta'rizli ken'isliktin' joqarısınan bir dawıstı esittim.
26 Gu'mbezdin' u'stinde lazuritten islengen taxtqa uqsag'an bir na'rse bar edi. Onda insan ko'rinisinde birew otırg'an edi.
27 Onın' belinen joqarısının' ishi otqa tolıp, jaltıldag'an mıstay bolıp turg'anın ko'rdim. Belinen to'meninin' bolsa, otqa megzes ekenin ko'rdim. Onı jarqırag'an nur qaplap turg'an edi.
28 Onın' a'tirapındag'ı nur jawınlı ku'ni bultta payda bolatug'ın ayqulaqqa uqsar edi. Bul ko'rinis Jaratqan İyenin' saltanatının' ko'rinisi edi. Bunı ko'rgende, et betimnen jıg'ıldım ha'm birewdin' so'ylegen dawısın esittim.
