Joqlaw 1 bob
1 A'ttegene-ay! Bir waqıtları adamg'a tolı qala, Qalayınsha endi jalg'ızlanıp qaldı! Milletler arasında ullı sanalg'an, Jesir hayalg'a uqsap qaldı. Wa'layatlardın' xanımı bolg'an, Endi ku'n'ge aylandı.
2 Tu'n boyı ol zar jılaydı, Ko'z jasları shekelerinen ag'adı. Barlıq oynasları arasında, Onı jubatatug'ını joq. Barlıq dosları satqınlıq etti, Onın' dushpanlarına aylandı.
3 Yahuda apatshılıq ha'm awır qullıq astında, Su'rgin qılıp alıp ketildi. Ol basqa milletler arasında jasap, Hesh tınıshlıq tappadı. Ol qısqıg'a ushırag'anda, Quwg'ın qılıwshılardın' qolına tu'sti.
4 Siong'a baratug'ın jollar aza tutpaqta, Sebebi belgilengen bayramlarg'a keletug'ın hesh kim joq. Barlıq da'rwazaları hu'wlep qaldı, Ruwxaniyleri awır gu'rsinbekte. Bul qalanın' qızları qayg'ı-azap shekpekte, Qalanın' o'zi de g'amg'a batqan.
5 Dushpanları basshı bolıp alg'an, Jawları bereket tappaqta. Qılmısının' awırlıg'ı sebepli, Jaratqan İye bul azaptı Siong'a jawdırdı. Balaları dushpannın' aldına salınıp, Tutqın qılıp alıp ketildi.
6 Qız Sion o'z sawlatın joyttı. Basshıları jaylaw tappag'an suwın yan'lı, An'shıdan qashıwg'a ma'darı qalmadı.
7 Azap ha'm sergizdanlıq ku'nlerinde, Erusalim burın iyelegen barlıq g'a'ziynelerin eske aladı. Xalqı jaw qolına tu'skende, Og'an ja'rdem bergen bolmadı. Onın' qulag'anın tamashalap, Dushpanlar u'stinen ku'ldi.
8 Erusalim awır gu'na isledi, Sol sebepli haram boldı. Onı hu'rmet etkenler jalan'ashlıg'ın ko'rip, Og'an jek ko'riwshilik penen qaradı. Endi bolsa ol gu'rsinip, Ha'mmeden ju'zin jasırmaqta.
9 Onın' jazıg'ı awır edi, Biraq aqıbetin oylamadı. Ol jan tu'rshigerli ta'rizde quladı, Og'an ta'selle beriwshi bolmadı. «O, Jaratqan İye, awır awhalıma bir na'zer sal, Sebebi dushpan mennen u'stin shıqtı!»
10 Dushpan onın' en' qımbatlı zatlarına qol saldı, Basqa milletlerge O'z jıyının'a kiriwdi qadag'an qılg'an bolsan' da, Erusalim olardın' Muxaddes ma'kang'a kirgenin ko'rdi.
11 Qalanın' pu'tkil xalqı nan izlep ah urmaqta, Ju'rek jalg'aw ushın, bar baylıg'ın bermekte. «O, Jaratqan İye, na'zer salıp, Qanday xorlang'anımdı ko'r!
12 Ha'y, joldan o'tip baratırg'anlar! Sizlerge ba'ri bir me? Awhalıma bir qarap ko'rin', Men jolıqqan da'rttey da'rt bar ma? Jaratqan İye g'a'zebi lawlag'an ku'ni, Bul da'rtti basıma to'kti.
13 Ol joqarıdan ot jiberip, Su'yeklerimdi ku'ydirdi. Ayaqlarıma tor taslap, Meni artqa qaytardı. Meni wayran etip, Ku'n boyı haldan taydırdı.
14 Gu'nalarımnan mag'an moyıntırıq isledi, İye olardı O'z qolları menen biriktirip baylap, Onı menin' moynıma asıp qoydı, Onın' menen ku'shimdi ha'lsiretti. Meni o'zim qarsı tura almaytug'ın, Dushpanlarımnın' qolına berdi.
15 İye mendegi barlıq batırlarımdı jerge urdı, Jigitlerimdi qırıw ushın mag'an qarsı la'shker topladı. İye pa'k qız Yahudanı, Ju'zim sıqqanday etip jenishti.
16 Bular ushın en'ireymen, Ko'zimnen jas sel bolıp ag'adı. Qasımda meni jubatıp, Janımdı jay taptırar hesh kim joq. Balalarım wayran boldı, Sebebi dushpan u'stin keldi».
17 Sion qolların sozadı, Biraq og'an ta'selle beretug'ın joq. Yaqıpqa dushpan bolıwdı, Jaratqan İye buyırdı qon'sı xalıqlarg'a. Erusalim olardın' arasında haram na'rsege aylandı.
18 «Awa, Jaratqan İye a'dil, Men Onın' buyrıg'ına qarsı shıqtım. Ha'y barlıq xalıqlar, mag'an qulaq salın', Menin' shegip atırg'an azabıma qaran'. Jas qızlar menen jigitlerim su'rgin qılındı.
19 Men oynaslarımdı shaqırdım, Biraq olar meni sattı. Ruwxaniylerim menen aqsaqallarım, Jan saqlaw ushın azıq izlep ju'rip, Qala ishinde jan tapsırdı.
20 Qara, Jaratqan İye, qanday azap shegip atırman, İshim janıp, ju'regim qaq ayırılmaqta, Sebebi Sag'an qarsı bas ko'terdim. Sırtta qılısh balalarımnan ayırmaqta, İshte o'lim hu'kim su'rmekte.
21 Adamlar ahıw-nalamdı esitti, Biraq mag'an ta'selle beriwshi joq. Barlıq dushpanlarım apatshılıg'ımnan xabar taptı, Mag'an islegenlerin'nen shad boldı. Sen ja'riyalag'an sol ku'ndi alıp kel, Olar da menin' awhalıma tu'ssin.
22 Pu'tkil jawızlıqları na'zerin'nen qashpasın, Barlıq qılmıslarım ushın mag'an ne qılg'an bolsan', Olarg'a da sonı isle. Ahıw-nalam ko'p, Ju'regimde ma'darım qalmadı».
