Eremiya 8 bob
1 «Sol waqıtta, – deydi Jaratqan İye, – Yahuda patshalarının', basshılarının', ruwxaniylerinin', payg'ambarlarının' su'yekleri, Erusalim turg'ınlarının' su'yekleri qa'birlerinen shıg'arıp taslanadı.
2 Bul su'yekler o'zleri su'ygen, xızmet etken, izine ergen, ma'sla'ha't sorag'an ha'm tabıng'an zatlarının', yag'nıy quyashtın', aydın' ha'm aspan denelerinin' astına shashıp taslanadı. Olar jıynap alınbaydı, jerlenbeydi, topıraqta tezek sıyaqlı shashılıp jatadı.
3 Bul jaman xalıqtan aman qalg'anların qay jerge su'rgin qılsam da, olar o'mirden o'limdi abzal ko'redi, – deydi A'lemnin' Jaratqan İyesi».
4 – Sen olarg'a ayt: «Jaratqan İye bılay deydi: Jıg'ılg'an adam qayta turmay ma? Joldan adasqan izge qaytpay ma?
5 Ne ushın bul xalıq joldan shıqtı? Ne ushın Erusalim Mennen u'zliksiz ju'z buradı? Olar jalg'ang'a qattı jabısıp alıp, Mag'an qaytıwdan bas tartpaqta.
6 Men dıqqat penen tın'ladım, Olar hesh tuwrı so'ylemeydi. Hesh biri: „Ne qılıp qoydım“, – dep, Qılmısına pushayman bolmaydı. Olar sawashqa umtılg'an at kibi, Ha'r biri o'z jolına jortadı.
7 Ha'tte, aspandag'ı la'ylek te, O'zinin' qaytıw ma'wsimin biledi. Qumırı, qarlıg'ash ha'm tırna da, Ko'shiw waqtın biledi. Biraq xalqım Menin' ko'rsetpelerimdi bilmeydi.
8 Qalayınsha sizler: „Bizler aqıllımız, Jaratqan İyenin' Nızamı bizlerde“, – dep ayta alasız. Negizinde, xatkerlerdin' jalg'an qa'lemi, Bul Nızamdı jalg'ang'a aylandırg'an joq pa?
9 Danalar uyatqa qaldı, Albırap, duzaqqa tu'sti. Olar Jaratqan İyenin' so'zinen ju'z burdı. Sonda olardın' danalıg'ı qayda?
10 Kishkenesinen u'lkenine shekem, Haram du'nya tabıwg'a ha'wes. Payg'ambarlarınan ruwxaniylerine shekem, Ha'mmesi hiyle menen ku'n ko'redi. Sonlıqtan olardın' hayalların basqalarg'a, Atızların basqınshılarg'a beremen.
11 Tap awır jara emestey, Xalqımnın' jarasın ju'zeki emleydi. Tınıshlıq bolmasa da: „Tınıshlıq, tınıshlıq“, – deydi.
12 İslegen jerkenishli isleri ushın olar uyaldı ma? Yaq, hesh te uyalmadı, Qızarıw ne ekenin de bilmedi. Sonlıqtan, olar da qulag'anlar menen qulaydı, Jazalag'anımda, jer menen jeksen boladı, – deydi Jaratqan İye.
13 Olardın' zu'ra'a'tin joq qılaman, – deydi Jaratqan İye. – Shaqalarda ju'zim qalmaydı, A'njir ag'ashı da miywe bermeydi, Ha'tte, japıraqları da quwrap qaladı. Olarg'a ne bergen bolsam, Ha'mmesinen juda boladı».
14 Adamlar bılay desti: – Nege ele bul jerde otırmız? Jıynalıp, qorg'anlı qalag'a barayıq, Sol jerde jan ta'slim qılayıq. Qudayımız Jaratqan İyege qarsı gu'na islegenimiz ushın, Ol bizlerge za'ha'rli suw ishkizip, O'lim jazasın berdi.
15 Bizler tınıshlıq ku'ttik, Biraq jaqsılıq kelmedi, Shıpa waqtın ku'ttik, Biraq tosattan qorqınıshqa duwshar boldıq.
16 Dushpan atlarının' pısqırıg'ı, Dannan esitilip tur. Ayg'ırlarının' kisnegeninen, Pu'tkil jer ju'zi titirep atır. Olar bul jerdi ha'm ishindegi ha'mme na'rseni, Qalanı ha'm onda jasaytug'ınlardın' ha'mmesin, Joq qılıw ushın keldi+.
17 – Men aran'ızg'a jılanlardı, Aldap-arbawg'a ko'nbeytug'ın uwlı jılanlardı jiberemen. Olar sizlerdi shag'adı, – deydi Jaratqan İye.
18 – Da'rtime shıpa joq, Ju'regim jaralı.
19 Tın'lan', xalqımnın' zarlag'an dawısı, Jerdin' alıs tu'pkirinen esitilip tur: «Jaratqan İye Sionda emes pe? Onın' Patshası da endi ol jerde bolmay ma?» – Ne ushın olar o'zlerinin' butları, Jaramsız qudayları menen Menin' qa'ha'rimdi keltirdi?
20 «Ba'ha'r de o'tti, jaz da tamam boldı, Bizler ele qutqarılmadıq», – deydi xalıq.
21 – Xalqımnın' azabı zardabınan men de azaplandım, Aza tuttım, meni qorqınısh biylep aldı.
22 Giladta ma'lha'm joq pa? Ol jerde shıpaker joq pa? Xalqımnın' jaraqatı nege jazılmay qoydı?
