Eremiya 48 bob
1 İzraildın' Qudayı A'lemnin' Jaratqan İyesi Moab tuwralı bılay deydi: – Nebonın' sorı qurıp, qarabaqanag'a aylanadı. Kiryatayım masqara bolıp, basıp alınadı. Shermende bolıp, qorg'anı wayran etiledi.
2 Moabtın' dan'qı so'nedi. Xeshbonda dushpanları og'an qarsı joba du'zedi, «Kelin', bul milletti qurtayıq», – desedi. Madmen qalası, senin' sestin' o'shedi, Qılısh seni quwalaydı.
3 Xoronayımnan dad-pa'riyad esitiledi: «Ullı qırg'ınshılıq ha'm wayranshılıq».
4 Moab quladı, Balaları shın'g'ırıp jılamaqta.
5 O'kirip jılawı menen, Luxit biyikligine ko'teriledi, Xoronayımg'a tu'setug'ın jolda, Qırg'ınnın' zarlı dawısın esitedi.
6 Qashın'lar, bas sawg'alan'lar! Sho'ldegi jın'g'ıl putasınday jan saqlan'lar.
7 Moab, sen islegen islerin' ushın, Baylıg'ın'a u'mit baylag'anın' ushın qolg'a alınasan'. Ruwxaniyleri ha'm ha'meldarları menen, Kemosh su'rgin etiledi.
8 Jaratqan İyenin' aytqanınday, Ha'r bir qalanı qırıp taslawshı keledi, Birde bir qala aman qalmaydı, Oypatlıq nabıt boladı, Tegislik jer menen jeksen boladı.
9 Moabqa qa'bir tasın qoyın', Onın' qalaları sho'lge aylanadı, Ol jerde hesh kim jasamaydı.
10 Jaratqan İyenin' tapsırg'an isin, Nemquraydı orınlag'ang'a, Onın' qılıshın qan to'giwden toqtatqang'a na'let jawsın!
11 Moab jaslıg'ınan biyqa'terlikte, Tındırılg'an sharaptay tınısh jasadı. Onı ıdıstan ıdısqa quymadı, Su'rginge alıp ketpedi. Sonlıqtan onın' da'mi saqlanıp qalg'an, Xosh iyisi o'zgermegen.
12 Biraq onı ıdıstan ıdısqa o'zgertetug'ın adamlardı jiberetug'ın ku'nler keledi, – deydi Jaratqan İye. – Onı to'gedi, ıdısların bosatadı ha'm gu'zelerin shıl-pa'rshe etedi.
13 İzraildın' o'zleri isengen Beyt-El sebepli uyatqa qalg'anınday, Moab ta Kemosh sebepli uyatqa qaladı.
14 Sizler qalayınsha: «Bizler ma'rt jawıngerlermiz, Sawashqa tayar batırlarmız», – deysiz.
15 Moab wayran qılınadı, Qalaları basıp alınadı, Saylandı jigitleri qırıp taslanadı, – deydi, Atı A'lemnin' Jaratqan İyesi bolg'an Patsha.
16 Moabqa qırg'ın jaqınlaspaqta, Apat og'an jeldey ushıp kelmekte.
17 Aynalasında jasaytug'ınlar ol ushın jılan'lar, Onın' atın biletug'ınlar joqlaw aytıp: «Wah, qu'diretli hasa, Dan'qlı tayaq qalay sındı?» – den'ler.
18 Qız Dibon turg'ınları! Saltanatlı ornın'ızdan tu'sip, Qurg'aq jerde otırın'. Moabtı qırg'ın qılg'an sizlerge kelip, Qorg'anların'ızdı wayran qıladı.
19 Aroer turg'ınları! Jol jag'asında turıp, na'zer salın', Qashqan erkekten ha'm qutılg'an hayaldan: «Ne boldı?» – dep soran'.
20 Moab masqara boldı, joq qılındı! Pa'riyad etin', o'kirip jılan'! Moabtın' wayran bolg'anın, Arnon sayında ja'riya etin'.
21 Tegisliktegi mına qalalar u'stinen hu'kim shıg'arıldı: Xolon, Yahasa, Mefaat,
22 Dibon, Nebo, Beyt-Diblatayım,
23 Kiryatayım, Beyt-Gamul, Beyt-Meon,
24 Keriyot, Bosra ha'm Moabtın' uzaq ha'm jaqın ha'r bir qalası.
25 Moabtın' shaqı sındı, qolı kesildi, – deydi Jaratqan İye.
26 – Onı ma's bolg'anınsha ishkizin', Sebebi ol Jaratqan İyege ko'kirek ko'terdi. Moab o'z qusıg'ına o'zi awnap jatsın, Adamlarg'a ku'lki bolsın.
27 Sen İzraildın' u'stinen ku'lmedin' be? Ol tuwralı so'z bolsa, bas shayqaytug'ınday, Ol ne urlıq u'stinde uslanıp pa edi?
28 Moab turg'ınları! Qalaların'ızdı taslap, Jartaslar arasında jasan'. Uyasın u'n'girdin' awzına salg'an, Kepterdey bolın'.
29 Bizler Moabtın' ta'kabbirligi, Onın' asa menmenligi, O'rko'kirekligi menen ba'lentpa'rwazlıg'ı, Maqtanshaqlıg'ı ha'm pan'pan'lıg'ı tuwralı esittik.
30 Men onın' surbetligin bilemen, – deydi Jaratqan İye, – Onın' maqtang'anları bos, isleri push.
31 Sol sebepli Moab ushın zarlap, Pu'tkil Moab ushın jılayman, Kir-Xeres xalqı ushın joqlaw aytaman.
32 Sibmanın' ju'zimzarları! Senin' ushın Yazer ushın jılag'anımnan da ko'birek jılayman. Senin' shaqaların' ten'izden asıp o'tip, Yazerge deyin sozıldı. Qırg'ın qılıwshı jazg'ı jemisin'e, Pisip turg'an ju'zimin'e hu'jim etti.
33 Moabtın' bag'-baqshalarınan, atızlarınan, Shadlıq ha'm quwanısh tartıp alındı. Ju'zim sıg'ılatug'ın shuqırlardan, Ag'atug'ın sharapqa shek qoydım. Onda endi qosıq aytıp ju'zim basqılanbaydı. Shawqım-su'ren bola beredi, Biraq ol quwanısh shawqımı emes.
34 Olardın' pa'riyad etip baqırg'an dawısı, Xeshbonnan Elale ha'm Yahasqa deyin, Soardan Xoronayımg'a ha'm Eglat-Shelishiyag'a deyin esitiledi. Ha'tteki, Nimrim suwları da qurıp qaldı.
35 Men Moabtag'ı sıyınıw orınlarında qurbanlıq bergendi, O'z qudaylarına tu'tetki tu'tetkendi, Joq qılaman, – deydi Jaratqan İye.
36 Sol sebepli ju'regim sırnay kibi, Moab ushın sızlaydı. Kir-Xeres xalqı ushın, Ju'regim sırnay kibi ın'ıranadı. Sebebi olar qolg'a kirgizgen baylıg'ınan jurday boldı.
37 Ha'r bir adam shashın aldırıp, saqalın qırqıp, Qolların tilip jaraqatlap, Aza kiyimin kiygen.
38 Moabtın' barlıq u'shekleri menen maydanlarında, G'alaba jılasqan dawıslar esitiledi. Sebebi Men Moabtı kereksiz ıdıstay sındırıp tasladım, – deydi Jaratqan İye.
39 Wah, Moab qanday shıl-pa'rshe boldı! Olar qattı baqırıp jılamaqta! Moab shermendelikten ju'zin jasırmaqta! Ol ku'lkige qalıp, A'tirapındag'ılar ushın qorqınıshqa aylandı.
40 Jaratqan İye bılay deydi: – Qaran', qanatların Moab u'stine jayıp, Dushpan bu'rkit kibi ushıp ju'r.
41 Keriyot qolg'a tu'sedi, Qorg'an qalalar basıp alınadı. Sol ku'ni Moab jawıngerlerinin' ju'regi, Tolg'atıp atırg'an hayaldikindey boladı.
42 Moab Jaratqan İyege qarsı bas ko'tergeni ushın, Xalıqlar arasınan joq qılınadı.
43 Moab turg'ınları! Seni qorqınısh, shuqır ha'm duzaq ku'tpekte, – deydi Jaratqan İye.
44 – Qorqınıshtan qashqan shuqırg'a, Shuqırdan shıqqan duzaqqa tu'sedi. O'ytkeni Menin' Moabtı, Jazalaytug'ın jılım keldi, – deydi Jaratqan İye.
45 5 – Haldan tayg'an qashqınlar, Xeshbonnın' sayasında toqtaydı. Biraq Xeshbon qalasınan ot, Sixon patshanın' qalasınan jalın shıg'ıp, Moab elin jandırıp, Qozg'alan'shı xalqın jalmaydı.
46 Moab, sorın' qurısın! Quday Kemoshtın' xalqı nabıt boldı, Ulların' su'rginge aydaldı, Qızların' tutqıng'a alındı.
47 Biraq aqırg'ı ku'nlerde Men Moabtın', Abadanshılıg'ın qaytarıp beremen, – deydi Jaratqan İye. Moabtın' jazası usı jerde juwmag'ına jetedi.
