Eremiya 37 bob
1 Babiloniya patshası Nabuxodonosor Exoniyanın' ulı Ehoyakimnin' ornına İoshiya ulı Sedekiyanı Yahuda eline patsha etip qoydı.
2 Biraq patsha da, onın' wa'zirleri de, u'lke xalqı da Jaratqan İyenin' Eremiya payg'ambar arqalı aytqan so'zlerine qulaq salmadı.
3 Degen menen, patsha Sedekiya Shelemiya ulı Ehuxal menen Maaseya ulı ruwxaniy Sefaniyanı: «O'tinemen, bizler ushın Qudayımız Jaratqan İyege duwa et», – dep aytıw ushın Eremiyag'a jiberdi.
4 Eremiya sol waqıtta xalıq arasında biyg'am jasap atırg'an bolıp, ele zindang'a taslanbag'an edi.
5 Sol arada faraonnın' la'shkerleri Mısırdan shıqtı. Erusalimdi qamal qılıp turg'an kaldeyler bul xabardı esitkende, Erusalimnen shegindi.
6 Sonda Eremiya payg'ambarg'a Jaratqan İyeden so'z tu'sti:
7 – İzraildın' Qudayı Jaratqan İye bılay deydi: Mennen soraw ushın sizlerdi Mag'an jibergen Yahuda patshasına bılay dep aytın'lar: «Sizlerge ja'rdemge kiyatırg'an faraonnın' la'shkerleri o'z eline, Mısırg'a qaytıp ketedi.
8 Al kaldeyler qaytıp kelip hu'jim etedi, qalanı qolg'a alıp, o'rtep jiberedi.
9 Jaratqan İye bılay deydi: „Kaldeyler so'zsiz bizlerden sheginedi“, – dep o'zlerin'izdi aldaman'lar. Olar sheginbeydi.
10 Eger sizler o'zlerin'izge qarsı urısqa shıqqan kaldeylerdin' pu'tkil la'shkerlerin qırıp taslasan'ız da, olarda tek jaradarlar qalg'an bolsa da, olar shatırlarınan shıg'ıp kelip, bul qalanı o'rtegen bolar edi».
11 Faraonnın' la'shkerleri sebepli, kaldeylerdin' la'shkerleri artqa shegingen waqıtta,
12 Eremiya Benyamin jerine barıp, xalıq arasındag'ı o'zinin' payına tu'sken jer u'lesin alıw ushın Erusalimnen ketpekshi boldı.
13 Ol Benyamin da'rwazasına jetkende, gu'zetshiler baslıg'ı Xananiyanın' aqlıg'ı Shelemiya ulı İriya Eremiyanı uslap alıp: – Sen ne, kaldeylerge qashıp ketpekshimisen'? – dedi.
14 Eremiya og'an: – Jalg'an, men kaldeylerge qashıp ketpekshi emespen, – dedi. Biraq İriya onı tın'lamadı ha'm Eremiyanı uslap, wa'zirlerdin' aldına alıp keldi.
15 Wa'zirler Eremiyag'a ashıwlanıp, onı sabadı, keyin xatker İonatannın' u'yine qurılg'an zindang'a tasladı.
16 Eremiya zindang'a taslanıp, ol jerde ko'p ku'nlerdi o'tkerdi.
17 Bir ku'ni patsha Sedekiya adam jollap, Eremiyanı sarayına aldırdı. Patsha o'z sarayında jasırın tu'rde onnan: – Jaratqan İyeden qanday da bir so'z bar ma? – dep soradı. Eremiya og'an: – Bar, siz Babiloniya patshasının' qolına tu'sesiz, – dep juwap berdi.
18 Keyin Eremiya Sedekiya patshag'a bılay dedi: – Meni zindang'a taslag'anday, men sizge, xızmetkerlerin'izge yaki bul xalıqqa ne qıldım?
19 «Babiloniya patshası sizge, bul xalıqqa hu'jim qılmaydı», – dep payg'ambarshılıq etken payg'ambarların'ız qayaqta?
20 Endi meni tın'lan', taqsırım, o'tinish qılıwg'a ruxsat berin'. Meni xatker İonatannın' u'yine qaytarıp jibermen', bolmasa, men sol jerde o'lip ketemen.
21 Patsha Sedekiya Eremiyanı saqshılar ha'wlisine qamap qoyıwdı ha'm qalada nan pu'tkilley tawısılg'ansha, ha'r ku'ni og'an nanbayxanadan bir sho'rek alıp berip turıwdı buyırdı. Solay etip, Eremiya saqshılar ha'wlisinde qaldı.
