Eremiya 1 bob
1 Bular Benyamin jerindegi Anatot qalasında jasaytug'ın ruwxaniylerdin' biri Xilkiya ulı Eremiyanın' so'zleri.
2 Yahuda patshası Amon ulı İoshiyanın' hu'kimdarlıg'ının' on u'shinshi jılında Eremiyag'a Jaratqan İyeden so'z tu'sti.
3 Eremiyag'a Jaratqan İyenin' so'zinin' tu'siwi Yahuda patshası İoshiyanın' ulı Ehoyakinnin' da'wirinen, Yahuda patshası İoshiya ulı Sedekiyanın' patshalıg'ının' on birinshi jılının' besinshi ayına deyin, yag'nıy Erusalim xalqının' su'rgin etip alıp ketiliwine deyin dawam etti.
4 Mag'an Jaratqan İyeden mınaday so'z tu'sti:
5 – Men seni jatırda payda etpesimnen aldın tanıdım, Qursaqtan shıqpasın'nan aldın seni tan'ladım. Seni milletler ushın payg'ambar etip tayınladım.
6 Sonda men: – Haw, Quday İye! Men qalay so'ylewdi bilmeymen, ju'da' jaspan, – dedim.
7 Biraq Jaratqan İye mag'an bılay dedi: – «Men jaspan», – deme. Seni kimge jibersem, ha'mmesine barasan', ne buyırsam, sonı aytasan'.
8 Olardan qorqpa, senin' menen birge bolıp, seni qutqaraman, – dedi Jaratqan İye.
9 Keyin Jaratqan İye qolın sozıp, awzıma tiygizdi de mag'an bılay dedi: – Mine, so'zlerimdi awzın'a saldım.
10 Qara, suwırıp taslaw, qırıw, joq qılıw, jer menen jeksen qılıw ushın, sonday-aq qurıw, bekkemlew ushın, bu'gin Men seni milletler ha'm patshalıqlar u'stinen qoydım.
11 Mag'an Jaratqan İyeden so'z tu'sti. Ol: – Eremiya, sen neni ko'rip tursan'? – dedi. – Badam ag'ashının' shaqasın ko'rip turman, – dep juwap berdim men.
12 – Tuwrı ko'rdin', – dedi Jaratqan İye mag'an. – Sebebi Men ha'r bir so'zimnin' orınlanıwın baqlap turg'an edim.
13 Mag'an ja'ne Jaratqan İyeden so'z tu'sti. Ol: – Neni ko'rip tursan'? – dedi. – Arqa ta'repten ju'zi bir ta'repke qıysayıp qaynap turg'an qazandı ko'rip turman, – dep juwap berdim men.
14 Sonda Jaratqan İye mag'an bılay dedi: – Bul jerdin' barlıq turg'ınlarına arqa ta'repten apatshılıq keledi.
15 Men arqadag'ı patshalıqlardın' barlıq qa'wimlerin shaqıraman, – dedi Jaratqan İye. – Olardın' patshaları kelip, O'z taxtların Erusalim da'rwazalarının' kirer awzına, Onı qorshap turg'an diywallardın', Yahudanın' pu'tkil qalalarının' aldına qoyadı.
16 Xalqımnın' Mennen ju'z burıp, İslegen barlıq jawızlıqları ushın, Basqa qudaylarg'a tu'tetki tu'tetip, O'z qolları menen islegen na'rselerine tabıng'anı ushın, Men olarg'a qarsı O'z hu'kimimdi ja'riyalayman.
17 Sen bolsan', belin'di bekkem buw. Barıp, Menin' sag'an buyırg'anlarımnın' ha'mmesin olarg'a ayt. Olardan qorqpa, bolmasa Men seni olardın' aldında qorqıwg'a salaman.
18 Bu'gin Men seni pu'tkil elge – Yahuda patshalarına, onın' xızmetkerlerine, ruwxaniylerine ha'm sol jerdin' xalqına qarsı bekkem qala, temir su'tin ha'm qola diywal qıldım.
19 Olar sag'an qarsı urısadı, biraq jen'e almaydı. Sebebi seni qutqarıw ushın Men senin' menen birgemen, – dedi Jaratqan İye.
