1 Jaratqan İye, ko'klerdi jarıp, to'menge tu'skenin'de edi! Aldın'da tawlar titireser edi!
2 Atın'dı dushpanlarg'a tanıt. Jalınnın' otındı jandırıp, suwdı qaynatqanınday, Milletlerdi aldın'da qaltırat!
3 Bizler ku'tpegen tan' qalarlıq islerdi islegenin'de, Jerge tu'stin', aldın'da tawlar titiredi!
4 O'zinen u'mit etkenler ushın, Sonday islerdi islegen jalg'ız Quday Sensen'. Sennen basqa qudaydı a'zelden qulaq ta esitpegen, ko'z de ko'rmegen.
5 Tuwrı islerdi shadlıq penen islep, Senin' jolların'dı yadında tutqanlardı qarsı alasan'. Biraq bizler gu'na isledik, Sen g'a'zeplendin'. Bizler a'zelden gu'nag'a batqanbız, Endi qalay bizler qutqarıla alamız?
6 Ha'mmemiz haram adamday boldıq, Tuwrı islerimiz de pataslang'an kiyimge uqsaydı. Ha'mmemiz japıraq kibi solıp atırmız, Gu'nalarımız bizdi samalday ushırıp a'ketip baratır.
7 Senin' atın'dı aytıp shaqırg'an, Sag'an o'zin tolıq bag'ıshlag'an hesh kim joq. Sonlıqtan Sen bizlerden ju'zin'di jasırıp, Bizlerdi gu'nalarımız hu'kimine tapsırdın'.
8 Sonda da, Jaratqan İye, Sen bizlerdin' A'kemizsen'-g'o! Bizler ılay, Sen – gu'lalshımızsan'. Ha'mmemiz Senin' qolın'nan shıqqanbız.
9 Jaratqan İye, bizge qattı g'a'zeplenbe, Qılmıslarımızdı ba'rqulla yadta saqlama. Bizge na'zer sala go'r, jalbarınaman, Ha'mmemiz Senin' xalqın'bız.
10 Muxaddes qalaların' sho'lge aylandı, Ha'tte, Sion da sho'lge aylandı, Erusalim qan'ırap bosap qaldı.
11 Muxaddes ha'm dan'qlı İbadatxanamız, Ata-babalarımız Sag'an maqtaw aytqan orın, O'rtep jiberildi. Biz qa'dirlegen na'rseler, Wayran boldı.
12 Jaratqan İye, sonda da, O'zin'di tutıp tura beresen' be? U'ndemey, bizlerge sheksiz azap bere beresen' be?
