İyshaya 63 bob
1 – Edomnan kiyatırg'an, Qırmızı kiyim kiyip, Bosradan kiyatırg'an bul kim? Sa'nli kiyimler kiyip, Ullı ku'sh penen qa'dem basqan bul kim? – A'dillik penen so'yleytug'ın, Qutqarıwg'a ku'shim jetetug'ın bul Menmen.
2 – İskenjede ju'zim sıg'ıp atırg'an adamdiki kibi, Kiyimin' ne ushın qıpqızıl?
3 – Men jalg'ız o'zim iskenjede ju'zim sıqtım, Janımda xalıqlardan hesh biri bolmadı. Men olardı ashıw menen basqılap, G'a'zep penen jenishtim. Olardın' qanı kiyimlerime shashırap, Pu'tkil u'sti-basımdı ılasladı.
4 Men xalqımdı qutqaratug'ın jıl, Dushpanlarınan o'sh alatug'ın ku'nim keldi dep uyg'ardım.
5 Men na'zer saldım, ko'mekshi joq edi, Su'yenish bolatug'ın hesh kimnin' joqlıg'ına hayran qaldım. Sonda O'z qolım Mag'an jen'is sıyladı, O'z g'a'zebim Meni qolladı.
6 Qa'ha'rlenip, xalıqlardı ayaqqa bastım, G'a'zebim menen olardı ma's qılıp, Qanın jerge to'ktim.
7 Jaratqan İyenin' su'yispenshiligin, Onın' alg'ısqa ılayıqlı islerin, Bizlerge ko'rsetken barlıq jaqsılıqların, Ullı su'yispenshiligi ha'm miyrimsha'pa'a'ti menen, İzrail urpaqlarına ko'rsetken ullı miyrimin eske alaman.
8 Jaratqan İye: «Haslında, olar Menin' xalqım, Aldamaytug'ın balalarım», – dep, Olardın' Qutqarıwshısı boldı.
9 Olar azap shekkende, Ol qosılıp qıynaldı, Onnan kelgen perishte olardı azat etti.Olardı Ol su'yispenshiligi ha'm miyrimi menen qutqardı. A'zelden olardı qolına ko'terip keldi.
10 Biraq olar bas ko'terip, Onın' Muxaddes Ruwxın qapa qıldı. Keyin Ol olardın' dushpanına aylanıp, Olar menen O'zi urıstı.
11 Sonda Onın' xalqı a'yyemgi ku'nlerin, Onın' qulı Muwsanın' ku'nlerin esledi: «Olardı O'z su'riwinin' shopanları menen birge, Ten'izden o'tkergen qayda? Olarg'a Muxaddes Ruwxın bergen qayda?
12 Ullı qolın Muwsanın' on' qolına bergen, O'zinin' atın ma'n'gi dan'qqa eristiriw ushın, Olardın' aldındag'ı suwdı ekige ayırg'an qayda?
13 Xalqın ten'iz tu'binen alıp o'tken qayda?» Quw dalada shapqılag'an at kibi, Su'rnikpesten o'tken edi olar.
14 Otlı oypatlıqqa tu'sip atırg'an pada kibi, Olar Jaratqan İyenin' Ruwxınan ra'ha'tlendi. O'z atın'dı dan'qqa eristiriw ushın, O'z xalqın'dı usılay jeteklep ju'rdin'.
15 Jaratqan İye, ko'klerden qarap, O'zin'nin' muxaddes ha'm dan'qlı ornın'nan na'zer sal! Senin' qızg'anıshın' ha'm ku'shin' qayda? Janashırlıg'ın' ha'm miyrimin'di bizden jıraq tuttın'.
16 Sen bizlerdin' A'kemizsen' g'oy! İbrayım bizlerdi ta'n almasa da, İzrail bizlerdi qabıl almasa da, Jaratqan İye, Sen bizlerdin' A'kemizsen', A'zelden atın' «A'mengerimiz» boldı.
17 Jaratqan İye, ne ushın Sen bizlerdi O'z jolın'nan uzaqlastırıp, O'zin'nen qorqpawımız ushın, ju'reklerimizdi qatallastırdın'? O'z qulların' haqı, Miyrasın' bolg'an urpaqlar haqı izge qayta go'r!
18 Muxaddes xalqın' az waqıt muxaddes ornın'dı iyelik etti, Biraq dushpanlarımız İbadatxanan'dı ayaq astı qıldı.
19 Bizler Sen hesh qashan hu'kimdarlıq qılmag'an, Senin' atın' menen atalmag'an, Xalıqqa uqsap qaldıq.
