İyshaya 57 bob
1 «A'dil adam o'lip ketip atır, Biraq hesh kim bunı ju'rekke jaqın almaydı. Sadıq adamlar joq bolıp ketip atır. Biraq onın' jawızlıq zardabınan o'lgenin, Hesh kim tu'sinbeydi.
2 Ol tınısh jerge kiredi. Tuwrı joldan ju'rgenler o'z qa'birinde tınıg'adı.
3 Sizler bolsan'ız, ha'y, palkerlerdin' balaları, Neke hadallıg'ın buzıwshı ha'm buzıqlardın' urpaqları Berman kelin'!
4 Sizler kimnin' u'stinen ku'lip tursız? Kimdi mazaqlap, Kimge tilin'izdi shıg'arıp tursız? Sizler qozg'alan'shılardın' balaları, Jalg'anshılardın' zu'ryadı emessiz be?
5 Sizler kiyeli terebinflerdin' arasında, Ha'r bir qoyıw sayalı terek astında, Qushtarlıq otında o'rtendin'iz. Saylarda ha'm jartastın' quwıslarında, Balaların'ızdı qurbanlıqqa usındın'ız.
6 Senin' payın' – da'ryanın' sıypaq tasları arasındag'ı butlar, Nesiyben' – solar boladı. Olarg'a ishimlik sadaqaların quydın', G'a'lle sadaqasın berdin'. Bulardan keyin de, seni jazasız qaldırayın ba?
7 Biyik ha'm ullı taw u'stine to'segin'di salıp, Qurbanlıq beriw ushın sol jerge shıqtın'.
8 Qapı ha'm jaqlawın'nın' arg'ı jag'ına, O'z butların'nın' mu'sinlerin qoydın'. Meni taslap ketip, jalan'ashlanıp, to'segin'e kirdin'. To'segin'di ken' jaydın'. Kim menen to'sekte jaqsı bolsa, Sonın' menen pitim du'zdin'.Olardın' jalan'ash denesine tigilip qaldın'.
9 Xosh iyisli may alıp, Moloxqa bardın', A'tirlerin'di ko'beyttin'. Elshilerin'di uzaqlarg'a jolladın', Ha'tte, o'liler ma'kanına jiberdin'.
10 Uzaq sapar seni talıqtırdı, Biraq sonda da u'mitin'di u'zbedin'. Ku'shin'di qayta tikledin', Sol sebepli haldan taymadın'.
11 Meni aldap, esin'nen shıg'aratug'ınday, Ju'regin'nen Mag'an orın bermeytug'ınday, Kimnen aybınıp, kimnen qorqtın'? Uzaq waqıt u'ndemegenim sebepli, Mennen qorqpaysan' ba?
12 Jalg'an a'dilligin'di, islerin'di a'shkara qılaman, Bulardan sag'an payda bolmaydı.
13 Pa'riyad etkenin'de, Jıynap qoyg'an butların' qutqarsın! Olardı samal ushırıp alıp ketedi, U'plegen jel olardı ko'terip ketedi. Biraq Meni panalag'an adam jerdi iyeleydi, Menin' muxaddes tawımdı miyrasqa aladı».
14 Jaratqan İye bılay deydi: «Topıraqtı tegislep, jol salın', Xalqımnın' jolındag'ı bo'getlerdi alıp taslan'».
15 Biyik ha'm ba'lent Bolg'an, Ma'n'gi jasaytug'ın, Atı Muxaddes Bolg'an bılay deydi: «Men biyik, muxaddes jerde jasayman, Sonday bolsa da, ruwxı tu'skenlerdin' ruwxın ko'teriw, Ezilgenlerdin' ju'regin janlandırıw ushın, Ezilgenler ha'm ruwxı tu'skenler menen birgemen.
16 Men adamlardı ba'rqulla ayıplap, Ma'n'gige g'a'zeplenbeymen. Bolmasa, Men jaratqan insanlardın' ruwxı, Janı aldımda tura almas edi.
17 Gu'nalı sıqmarlıqları ushın g'a'zeplenip, Men olardı jazaladım, Qa'ha'rlenip, ju'zimdi jasırdım, Biraq olar qaytıwdan bas tartıp, Ju'regi qa'legen joldan ketti.
18 Men olardın' jolların ko'rdim, Degen menen, olarg'a shıpa beremen. Olardı jetelep, qayg'ırg'anlardı qayta jubataman.
19 Awızlarına alg'ıs-maqtaw so'zlerin salaman». Uzaqtag'ılarg'a da, jaqındag'ılarg'a da tınıshlıq bolsın! Men olardı shıpalayman! Bulardı Jaratqan İye aytadı.
20 «Biraq jawızlar tolqınlang'an ten'izge uqsaydı, Ol tınısh tura almaydı, Suwları ılay menen balshıqtı shıg'ara beredi,
21 Jawızlar ushın tınıshlıq joq», – deydi Qudayım.
