İyshaya 54 bob
1 «Shadlan, ha'y, bala ko'rmegen na'silsiz hayal! Tolg'atıp ko'rmegen, sen, shadlanıp baqır! Sebebi taslap ketilgen hayaldın' balaları, Ku'yewi bar hayaldikinen ko'p boladı, – deydi Jaratqan İye.
2 – Shatırın'nın' ornın ken'eyt, Ma'kan jayın'nın' perdelerin ayamay sozıp, Jiplerin uzın etip al, qazıqların bekkemle.
3 Sen on'g'a, solg'a jayılasan', Urpaqların' milletlerdin' jerlerin iyelep, Bos qalg'an qalalarg'a ornalasıp aladı.
4 Qorqpa, uyatqa qalmaysan', Ruwxın' tu'spesin, masqara bolmaysan'. Sen jaslıg'ın'dag'ı shermendelikti umıtasan', Jesirlik ha'siretin'di artıq eske almaysan'.
5 Sebebi senin' ku'yewin' – senin' Jaratıwshın', Onın' atı – A'lemnin' Jaratqan İyesi. İzraildın' Muxaddesi – A'mengerin', Ol pu'tkil du'nyanın' Qudayı dep ataladı.
6 Sen ku'yewi taslap ketip, Qa'lbi jaraqatlang'an hayalg'a uqsaysan'. Biraq Jaratqan İye seni shaqıradı, deydi Qudayın'.
7 – Men seni bir ma'writ ta'rk ettim, Biraq ullı mehir menen seni jıynayman.
8 Qa'ha'rlengenimde, sennen bir ma'writ ju'zimdi jasırg'an edim, Biraq ma'n'gilik su'yispenshiligim menen, Sag'an rehim etemen, – deydi A'mengerin' Jaratqan İye.
9 – Bul Men ushın Nuxtın' da'wirine uqsaydı. Nuxtın' da'wirinde topan suwı, Jer ju'zinde endi qaytalanbaydı dep ant ishkenim sıyaqlı, Sag'an da endi qa'ha'rlenip, jazalamayman dep ant ishtim.
10 Tawlar ornınan qozg'alıp, to'beler shayqalsa da, Menin' sag'an degen su'yispenshiligim terbelmeydi, Tınıshlıq kelisimim de qozg'almas, – deydi sag'an rehim etken Jaratqan İye.
11 – Azap shegip, dawıl du'bep, jubanısh tappag'an qala! Seni periwzadan qurıp, Tiykarın'dı lazuritten qoyaman.
12 Minaraların'dı rubinnen, Da'rwazaların'dı ga'whardan, Diywalların'dı qımbatbaha taslardan isleymen.
13 Balaların'nın' ha'mmesi Jaratqan İyeden ta'lim aladı, Olar ullı tınıshlıqqa bo'lenediSen a'dalatlıq penen negiz qurasan', Eziliwden awlaq bolasan', qorqpassan'. Qa'wip-qa'terden jıraq bolasan', ol sag'an jaqınlamas..
14 Sen a'dalatlıq penen negiz qurasan', Eziliwden awlaq bolasan', qorqpassan'.
15 Eger birew sag'an topılsa, Bul Mennen emes, Sag'an hu'jim qılg'annın' ha'r biri sag'an bas iyer.
16 Qara, ko'mir shog'ın u'plep, O'z maqseti ushın qural-jaraq soqqan temirshini, Men jarattım. Wayran qılsın dep, basqınshını da Men jarattım.
17 Sag'an qarsı qollanıw ushın jaratılg'an, Hesh qanday qural-jaraq tabısqa erispes, Hu'kimde seni ayıplamaqshı bolg'an ha'r bir tildi, Sen ayıplarsan'. Jaratqan İyenin' qullarının' miyrası – usı, Men olardı aqlayman, – deydi Jaratqan İye».
