İyshaya 52 bob
1 Oyan Sion, oyan, ku'shke tol! Ha'y, Erusalim, muxaddes qala, a'jayıp kiyimlerin'di kiy! Endi su'nnetsizler ha'm haram adamlar sag'an kirmes hasla.
2 U'stin'degi topıraqtı qag'ıp taslap, Tur, Erusalim, taxtqa otır. Moynın'dag'ı shınjırdı u'zip tasla, Ha'y, tutqın qız Sion!
3 Jaratqan İye bılay deydi: «Sizler pulg'a satılmadın'ız, Pulsız azat etilesiz».
4 Quday İye bılay deydi: «Xalqım jasap turıw ushın, da'slep Mısırg'a bardı, Keyin assiriyalılar sebepsiz olardı ja'birledi».
5 «Bul ne awhal? – deydi Jaratqan İye. – Xalqım qurıdan-qurı basıp alındı, Hu'kimdarları pa'riyad etpekte, – deydi Jaratqan İye. – Ku'ni boyı atıma til tiymekte.
6 Biraq xalqım Menin' atımdı bilip aladı. Sol ku'ni olar Menin' so'ylegenimdi, „Mine, Men“ degennin' Men ekenin biledi».
7 Tawlar asıp kiyatırg'an, Xabarshını ko'riw qanday a'jayıp! Ol paraxatshılıqtı ja'riyalamaqta, Xosh xabar alıp kelmekte, Qutqarılıwdı ja'riya qılmaqta. Ol Siong'a: «Qudayın' hu'kimdarlıq qıladı!» demekte.
8 Tın'lan'! Gu'zetshilerin' dawısın ko'termekte, Birge olar quwanıp baqırmaqta. Jaratqan İyenin' Siong'a qaytıp kelgenin, Olar o'z ko'zleri menen ko'redi.
9 Ha'y, Erusalimnin' qarabaqanaları! Birgelikte shadlıq penen baqırın'. Jaratqan İye O'z xalqına ta'selle berdi, Erusalimdi azat etti.
10 Pu'tkil milletlerdin' ko'z aldında, Jaratqan İye muxaddes bilegin tu'rdi. Pu'tkil du'nya, Qudayımızdın' qutqarıwın ko'redi.
11 Ketin', ketin', ol jerden shıg'ın'! Haram na'rselerge qol tiygizben'! Sizler, Jaratqan İyenin' muxaddes zatların tasıwshılar! Ol jerden shıg'ıp, tazalanın',
12 Biraq asıg'ıs shıg'ıp ketpen', Qashıp ta ju'rmen'. Sebebi Jaratqan İye aldın'ızda ju'redi, İzraildın' Qudayı izin'izden qorg'ap baradı.
13 «Mine, qulım tabısqa erisedi, Ol ko'terilip, ullılanıp, en' biyikke shıg'arıladı.
14 Ko'pler og'an hayran qaldı. Onın' tu'r-tu'si adamg'a uqsamaytug'ın sıqılsız, Ko'rinisi de adam ulına uqsamaytug'ın edi.
15 Ol ko'p milletlerdi lal qaldıradı, Patshalar onın' aldında awzın jumadı. Sebebi olar aytılmag'an na'rselerdi ko'rip, Esitpegen na'rselerin tu'sinedi».
