İyshaya 5 bob
1 Jaratqan İyenin' İordan da'ryasının' suwların izraillılardın' aldında, olar o'tip bolaman degenshe, qalay qurg'atıp taslag'anın İordannın' batıs ta'repindegi amor patshaları ha'm Jer Orta ten'izi jag'asındag'ı kenaan patshaları esitkende, ruwxları tu'sti. İzraillılardan qorqqanınan, hesh kimde hal-da'rman qalmadı.
2 Sol waqıtta Jaratqan İye Eshuag'a: – Tastan pıshaqlar islep, izraillılardı burıng'ıday su'nnet et, – dedi.
3 Solay etip, Eshua tastan pıshaqlar islep, izraillılardı Aralot to'beshiginde su'nnet etti.
4 Bunı islegeninin' sebebi mınaw edi: Mısırdan shıqqanlardın' ha'mmesi, urısqa jaramlı bolg'an barlıq er adamlar Mısırdan shıqqannan son', sho'lde ju'rgende o'lip ketken edi.
5 Mısırdan shıqqan barlıq er adamlar su'nnet etilgen edi. Biraq Mısırdan shıqqannan keyin sho'lde ju'rgen waqıtta tuwılg'an er adamlardın' hesh biri su'nnet etilmegen edi.
6 Mısırdan shıqqanda urısqa jaramlı bolg'anlardın' ha'mmesi o'lip bolg'ansha, izraillılar sho'lde qırıq jıl gezip ju'rdi. Sebebi olar Jaratqan İyenin' so'zin tın'lamag'an edi. Jaratqan İye olarg'a: «Men atababaların'ızg'a wa'de etip, sizlerge beremen degen su't ha'm pal ag'ıp turg'an jerdi sizler ko'rmeysizler», – dep ant ishken edi.
7 Jaratqan İye olardın' ornına balalarına o'mir berdi. Su'nnet etilmegen bul balalardı Eshua su'nnet etti. O'ytkeni olar jolda su'nnet etilmegen edi.
8 Barlıq er adamlar su'nnet etilgennen son', ta'wir bolg'ansha, ordadag'ı o'z orınlarında qaldı.
9 Sonda Jaratqan İye Eshuag'a: – Mısırda sizlerde bolg'an masqarashılıqtı bu'gin alıp tasladım, – dedi. Sonlıqtan sol jer bu'gin de Gilgal dep ataladı.
10 Gilgalda Erixo tegisligine orda qurg'an İzrail xalqı aydın' on to'rtinshi ku'ni keshte Qutqarılıw bayramın* bayramladı.
11 Bir ku'n dawam etken bayramnan son', olar eldin' zu'ra'a'tinen ashıtqısız nan ha'm quwırmash jedi.
12 Olar sol eldin' zu'ra'a'tinen jey basladı ha'm erten'ine mannanın' jawıwı pu'tkilley toqtadı. İzraillılar sol jılı Kenaan elinin' zu'ra'a'ti menen azıqlandı.
13 Eshua Erixo qalasına jaqın jerde bolg'anda, basın ko'terip qarap, aldında qılısh uslap turg'an bir adamdı ko'rdi. Eshua og'an jaqınlasıp: – Sen bizler ta'reptin' adamımısan' yamasa dushpan ta'reptin' be? – dep soradı.
14 Sol adam og'an: – Hesh ta'reptin' de emes. Men Jaratqan İyenin' a'skerlerinin' sa'rka'rdasıman. Mine, Men keldim, – dedi. Sol waqıtta Eshua et-betinen jerge jıg'ılıp, og'an tabındı da: – Mırzam, qulın'ızg'a aytatug'ın qanday so'zin'iz bar? – dep soradı.
15 Jaratqan İyenin' a'skerlerinin' sa'rka'rdası Eshuag'a: – Ayaq kiyimin'di shesh. O'ytkeni sen turg'an jer – muxaddes, – dedi. Eshua aytılg'andı orınladı.
16 İzraillılar sebepli, Erixo qalasının' da'rwazaları tas qılıp jabılg'an edi. Ol arqalı hesh kim kirmedi de, shıqpadı da.
