İyshaya 43 bob
1 Biraq endi, Yaqıp seni jaratqan, İzrail, seni do'retken, Jaratqan İye bılay deydi: «Qorqpa, Men seni azat ettim, Senin' atın'dı aytıp shaqırdım, sen Menikisen'.
2 Suwlardan o'tkenin'de, senin' menen birge bolaman, Da'ryalardan o'tkenin'de, olar seni ıg'ızıp ketpeydi. Ot ishinen ju'rgenin'de janbaysan', Jalın seni jalmamaydı.
3 Men senin' Qudayın' Jaratqan İye, İzraildın' Muxaddesi, senin' Qutqarıwshın'man. Senin' to'lemin' sıpatında Mısırdı, Senin' ornın'a Kush penen Sebanı berdim.
4 Na'zerimde qımbatbaha ha'm qa'dirli bolıp, Seni su'ygenim ushın, Senin' ornın'a adamlardı, Senin' o'mirin' ushın xalıqlardı beremen.
5 Qorqpa, Men senin' menen birgemen, Urpaqların'dı shıg'ıstan alıp kelemen, O'zin'di batıstan jıynap alaman.
6 Arqag'a: „Olardı ber“, „Olardı uslama, Ullarımdı uzaqtan, Qızlarımdı jerdin' tu'pkirlerinen,
7 Mag'an tiyisli bolg'an ha'r bir adamdı, O'z dan'qım ushın jaratqanlarımdı, Pishim berip, do'retkenlerimdi qaytar“, – deymen».
8 Ko'zi bolsa da, ko'rmeytug'ın soqırlardı, Qulag'ı bolsa da, esitpeytug'ın geren'lerdi alıp shıg'ın'.
9 Pu'tkil milletler bir jerge jıynalsın, Xalıqlar toplansın. Olardın' arasında qaysısı bulardı ja'riyalap, O'tken waqıyalardı aldın ala bizlerge bildire aldı? Gu'walardı alıp kelip, o'zlerin aqlasın, Basqalar esitip: «Bul durıs», – desin.
10 Jaratqan İye bılay deydi: «Sizler Menin' gu'walarımsız. Meni bilip, Mag'an iseniwin'iz, Menin' kim ekenimdi tu'siniwin'iz ushın, Saylap alg'an qullarımsız. Mennen aldın, hesh qanday quday do'retilgen emes, Mennen keyin de bolmaydı.
11 Men, tek jalg'ız Men – Jaratqan İyemen. Mennen basqa Qutqarıwshı joq».
12 Men aldın ala bildirdim, qutqardım ha'm ja'riyaladım. Aran'ızda basqa quday joq. Sizler Menin' gu'walarımsız, – deydi Jaratqan İye. – Men Qudayman.
13 A'wel bastan beri, Men Solman. Men uslag'andı hesh kim jazdıra almaydı. Men qılg'andı kim biykarlay aladı?»
14 A'mengerin'iz, İzraildın' Muxaddesi, Jaratqan İye bılay deydi: «Sizler haqı Babilong'a birewdi atlanısqa jollayman. Kaldeylerdi dawırıg'ı ko'kke jetken kemelerine mingizip, Qashıwg'a ma'jbu'r etemen.
15 Sizlerdin' Muxaddesin'iz, İzraildın' Jaratıwshısı, Sizlerdin' Patshan'ız Jaratqan İye Men bolaman».
16 Ten'izden jol, Burqasınlag'an suwdan soqpaq ashqan Jaratqan İye,
17 Sawash arbaların, atlılardı, Ku'shli a'skerlerdi ordası menen alıp shıqqan Ol bılay deydi: «Olar jıg'ılıp, tura almas, O'shirildi, shıraday so'ndi.
18 O'tkenlerdi umıtın', Burıng'ılardı eske alman'.
19 Mine, Men jan'a na'rse qılaman! Ol baslandı, nege tu'sinbeysiz? Men sho'lde jol, sahrada da'ryalar salaman.
20 Jabayı haywanlar, sag'al ha'm u'kiler, Meni hu'rmet qıladı. Sebebi tan'lap alg'an xalqım ishiwi ushın, Sho'lde suw, sahrada da'ryalar ag'ızdım.
21 Mag'an alg'ıs-maqtaw aytıwı ushın, O'zim ushın jarattım bul xalıqtı.
22 Biraq sen, ha'y, Yaqıp, Meni shaqırmadın', Ha'y, İzrail, Mennen sharshadın'!
23 Jandırılatug'ın qurbanlıq ushın qoyların'dı alıp kelmedin', Qurbanlıqların' menen Meni sıylamadın'. Men sadaqalar talap etip, seni qıynamadım, Xosh iyisli tu'tetkiler talap etip, awırmanlıq salmadım.
24 Sen Mag'an arnap, xosh iyisli qamıs satıp almadın', Meni qurbanlıqtın' mayına toydırmadın'. Kerisinshe, gu'naların' menen Mag'an ju'k boldın', Qılmısların' menen Meni sharshattın'.
25 O'zim ushın qılmısların'dı o'shiretug'ın Menmen, Artıq gu'naların'dı eslemeymen.
26 Menin' yadıma sal, dawlasayıq, Aqlanıw ushın, da'lillerin'di keltir.
27 Tu'p atan' gu'na islegen edi, Da'ldalshıların' Mag'an qarsı bas ko'terdi.
28 onlıqtan İbadatxana basshılarının' abırayın to'ktim, Yaqıptı pu'tkilley joq qılıwg'a, İzraildı g'arg'ısqa hu'kim ettim».
