İyshaya 42 bob
1 Mine, Men qollag'an qulım, Kewlime unag'an tan'lag'anım! Men Og'an O'z Ruwxımdı beremen, Ol milletlerge a'dalat alıp keledi.
2 Ol baqırmaydı, dawısın ko'termeydi, Ko'shelerde Onın' sesti esitilmeydi.
3 Ol mayısqan qamıstı sındırmas, Pısqıg'an pilikti de o'shirmes, Sadıqlıq penen a'dalattı iske asırar.
4 Jer betinde a'dalattı ornatpag'ansha, Ha'lsiremes, ruwxı da tu'spes. Atawlar Onın' ta'limine u'mit baylar.
5 Ko'klerdi jaratıp, onı jayg'an, Jerdi ha'm ondag'ılardı jayıp jibergen, Ondag'ı insanlarg'a dem bergen, Onda ju'rgenlerge jan bergen, Quday İye bılay deydi:
6 «Men, Jaratqan İye seni qutqarıwımdı ko'rsetiw ushın shaqırdım, Senin' qolın'nan uslap, qorg'ayman, Xalqım menen du'zgen kelisimimdi, Sen arqalı a'melge asıraman. Seni milletlerge nur qılaman.
7 Sen soqır ko'zlerdi ashıp, Tutqınlardı qamaqxanadan shıg'arıp, Qaran'g'ılıqtag'ını zindannan azat etesen'.
8 Men – Jaratqan İyemen. Menin' atım usı. Dan'qımdı basqag'a, alg'ısımdı butlarg'a bermeymen.
9 Mine, burın boljap aytılg'anlar a'melge astı. Men taza na'rselerdi ja'riyalayman, Olar ju'zege aspay turıp, Aldın ala sizlerge ayan etemen».
10 Ten'izde ju'zip ju'rgenler ha'm onı toltırıp turg'anlardın' ha'mmesi, Atawlar ha'm olarda jasawshılar, Jaratqan İyege arnap taza qosıq aytın', Jerdin' en' shetlerinen Og'an alg'ıs-maqtawlar aytın'!
11 Sho'l ha'm ondag'ı qalalar, Kedar xalqı jasaytug'ın awıllar dawısın ko'tersin! Sela turg'ınları quwanıshtan qosıq aytıp, Tawlardın' to'belerinen baqırsın!
12 Olar Jaratqan İyeni ullılasın, Atawlarda Og'an alg'ıs-maqtawlar aytsın!
13 Jaratqan İye bahadır jigittey bolıp, Batırday g'a'zebin shashar, A'skeriy uran salıp, baqırıp, Dushpanlardan u'stinligin ko'rseter.
14 «Men uzaq waqıt u'ndemedim, Sabırlılıq penen O'zimdi usladım. Endi tuwıp atırg'an hayalday qıshqıraman, Entigip dem alaman.
15 Men tawlardı ha'm to'beshiklerdi wayran etemen, Pu'tkil ot-sho'plerdi qırıp taslayman. Da'ryalardı atawlarg'a aylandırıp, Hawızlardı qurıtaman.
16 Soqırlardı bilmegen jollarınan alıp ju'remen, Olardı tanıs bolmag'an soqpaqlardan jeteleymen, Aldında qaran'g'ılıqtı jaqtılıqqa, Oylı-biyik jerlerdi tegis jerge aylandıraman. Men bulardı isleymen, Olardı ta'rk etpeymen».
17 Oyma butlarg'a isengenler, Quyma butlarg'a: «Sizler qudayımızsız», – deytug'ınlar, Shermende bolıp, olardan ju'z buradı.
18 «Ha'y, geren'ler, esitin'ler, Ha'y, soqırlar, qarap ko'rin'!
19 Menin' qulımday soqır bolg'an bar ma? Men jiberetug'ın xabarshıday, geren' bolg'an bar ma? Mag'an bag'ıshlang'an birewdey, soqır, Yamasa Menin', Jaratqan İyenin' qulınday, soqır bolg'an bar ma?
20 Sen ko'p na'rseni ko'rdin', biraq dıqqat awdarmadın', Qulaqların' ashıq edi, biraq esitpedin'».
21 O'z a'dalatı haqı, Nızamların dan'qqa bo'lep, ullı qılıw, Jaratqan İyege unadı.
22 Biraq bul xalıq talan-taraj qılıng'an, Ha'mmesi zindang'a taslanıp, qamaqxanag'a qamalg'an. Olar oljag'a aylandı, qutqaratug'ın hesh kim joq. Talandı, «Qaytarıp ber», deytug'ın hesh kim joq.
23 Aran'ızda bug'an qulaq tu'retug'ın, Dıqqat qoyıp, keleshek ushın tın'laytug'ın bar ma?
24 Yaqıptı talanshılarg'a, İzraildı qaraqshılarg'a bergen kim? Bul Jaratqan İye emes pe? Og'an qarsı gu'na islemedik pe? Olar Onın' jolınan ju'rmedi, Nızamına qulaq aspadı.
25 Sonlıqtan Ol lawlag'an g'a'zebin, G'ıjlag'an urıstı u'stine do'ndirdi. Do'geregin ot penen qaplasa da, tu'sinbedi, Ku'ydirse de, ju'rekke almadı.
