İyshaya 41 bob
1 Jaratqan İye bılay deydi: «Ha'y, atawlar, Menin' aldımda u'ndemey tın'lan'! Xalıqlar ku'sh toplap alsın, Olar jaqın kelip, so'ylesin. Kelin'ler, hu'kim ushın bir jerge jıynalayıq.
2 Shıg'ıstan azat etiwshini ha'reketke keltirgen kim? Onı O'zine xızmetke shaqırg'an kim? Milletlerdi onın' qolına bergen, Patshalardı ayaq astı qılg'an kim? Ol qılıshı menen olardı shan'g'a, Oq jayı menen suwırılg'an qawıqqa aylandırdı.
3 Ol olardı quwdalaydı, Ayaq basılmag'an joldan aman-esen ju'rip o'tedi.
4 Bulardı orınlap, ju'zege asıratug'ın kim? A'wel bastan a'wladlardı shaqırg'an kim? Men – Jaratqan İye, basıman, Aqırında da Men bolaman.
5 Atawlar bunı ko'rip, qorqadı, Jerdin' to'rt ta'repi qaltıraydı. Olar jaqınlap keledi.
6 Ha'mme bir-birine ja'rdem berip: „Ma'rt bol“, – deydi.
7 O'nerment zergerge, Urıp tegislewshi to's urıwshıg'a kepseri tuwralı: „Jaqsı qurastırıldı“, – dep jiger beredi. Keyin ornınan qozg'almawı ushın buttı shegeleydi.
8 Biraq sen, ha'y, qulım İzrail, Men tan'lag'an Yaqıp, Dostım İbrayımnın' urpag'ı!
9 Seni du'nyanın' to'rt ta'repinen jıynadım, Uzaq jerlerden shaqırıp: „Sen Menin' qulımsan', Seni tan'ladım, ta'rk etpedim“, – dedim.
10 Qorqpa, Men senin' menen birgemen. Qa'weterlenbe, Men senin' Qudayın'man. Sag'an ku'sh berip, ja'rdemlesemen. Azat etiwshi on' qolım menen su'yeymen.
11 Sag'an g'a'zeplengenlerdin' ha'mmesi, Masqara bolıp, uyatqa qalar, Sag'an qarsı shıqqanlar dımı qalmay joq bolar.
12 Dushpanların'dı izlesen' de tappassan', Senin' menen urısqanlar da hesh bolmag'anday joq bolıp keter.
13 Men, Qudayın' Jaratqan İye, On' qolın'nan uslap, su'yep: „Qorqpa, sag'an ja'rdem beremen“, – deymen.
14 „Ha'y, qurt sıyaqlı bolg'an Yaqıp, Ha'y, az sanlı İzrail, qorqpan'! Men sag'an ja'rdem beremen“, – deydi Jaratqan İye, Senin' A'mengerin', İzraildın' Muxaddesi.
15 Mine, Men seni taza, o'tkir tisli, Tu'yek aydaytug'ın taxta qılaman. Sen tawlardı bastırıp, talqanlap, To'beshiklerdi qawıqqa aylandırasan'.
16 Sen olardı suwırasan', Samal ushırıp, alıp keter, Du'beley aylandırıp, ushırıp keter. Sen Jaratqan İyede shadlanarsan', İzraildın' Muxaddesi menen maqtanarsan'.
17 Sen olardı suwırasan', Samal ushırıp, alıp keter, Du'beley aylandırıp, ushırıp keter. Sen Jaratqan İyede shadlanarsan', İzraildın' Muxaddesi menen maqtanarsan'.
18 Men taqır to'beshiklerden da'ryalar, Oypatlıqlardın' ortasınan bulaqlar ag'ızaman. Sho'ldi ko'lge, qurg'aq dalanı suwlı bulaqlarg'a aylandıraman.
19 Sho'lge kedr, akatsiya, mirta putaların ha'm za'ytu'n ag'ashların, Quw dalag'a sa'rwi, shınar ha'm qarag'ay ag'ashların birge otırg'ızaman.
20 Sonda adamlar bunı Jaratqan İyenin' islegenin, İzraildın' Muxaddesinin' jaratqanın, Ko'redi, biledi, aqıl juwırtıp, tu'sinedi».
21 «Dawan'ızdı aytın'», – deydi Jaratqan İye, «Da'lillerin'izdi keltirin'», – deydi Yaqıptın' patshası.
22 «Butların'ızdı alıp kelin', Olar ne bolatug'ının aytıp bersin. Oylanıp, aqıbetin tu'siniwimiz ushın, O'tmishte bolg'anlardın' ma'nisin ayan etsin, Yamasa keleshekte bolatug'ınlardı bizge bildirsin.
23 Sizlerdin' quday ekenin'izdi biliwimiz ushın, Bunnan keyin ne bolatug'ının bildirin'. Ko'rip, hayran qalıwımız ushın, Jaqsı yaki jaman bir na'rse qılın'.
24 Sizler de, islerin'iz de hesh na'rse emes. Sizlerdi tan'lag'anlar jerkenishli.
25 Men arqadan birewdi ha'reketke keltirdim, ol kiyatır. Menin' atımdı shaqırg'an shıg'ıstan kiyatır. Ol gu'lalshının' ılaydı basqılag'anı sıyaqlı, Hu'kimdarlardı ılayday qılıp basqılaydı.
26 Men arqadan birewdi ha'reketke keltirdim, ol kiyatır. Menin' atımdı shaqırg'an shıg'ıstan kiyatır. Ol gu'lalshının' ılaydı basqılag'anı sıyaqlı, Hu'kimdarlardı ılayday qılıp basqılaydı.
27 Men birinshi bolıp Siong'a: „Olar kiyatır“, – dep bildirdim, Erusalimge xabarshı jiberdim.
28 Ko'z salıp qarasam, arasında ken'es beretug'ın da, Men sorag'anda, juwap beretug'ın da birde birewi joq.
29 Mine, olardın' ha'mmesi jalg'an! İsleri hesh na'rsege turg'ısız, Mu'sinleri samal ha'm boslıqtan ibarat».
