İyshaya 4 bob
1 Pu'tkil xalıq İordan da'ryasınan o'tip bolg'annan son', Jaratqan İye Eshuag'a bılay dedi:
2 – Xalıq ishinen on eki adamdı, yag'nıy ha'r urıwdan bir adamnan saylap alın' da,
3 olarg'a bılay dep buyırın'lar: «Bul jerden, İordan da'ryasının' ortasınan, anıq ruwxaniylerdin' ayaqları turg'an jerden on eki tas alın'lar. Bul taslardı o'zlerin'iz benen birge alıp, tu'neytug'ın jerin'izge aparıp qoyın'lar».
4 Solay etip, Eshua İzraildın' ha'r bir urıwınan o'zi saylap alg'an on eki adamdı shaqırıp alıp,
5 olarg'a bılay dep buyırdı: – Da'ryanın' ortasına, Qudayın'ız Jaratqan İyenin' sandıg'ının' aldı betine barıp, İzrail xalqının' urıw sanına qaray ha'r birin'iz iynin'izge bir tastan ko'terip alın'lar.
6 Olar sizler ushın belgi boladı. Balaların'ız keleshekte: «Bul taslar neni an'latadı?» – dep sorag'anda,
7 olarg'a: «İordan da'ryasının' suwları Jaratqan İyenin' Kelisim sandıg'ının' aldında aqpay qaldı. Kelisim sandıg'ı da'ryadan o'tip atırg'anda, ag'ıp turg'an suwlar toqtap qaldı. Bul taslar İzrail xalqı ushın sol waqıyadan ma'n'gige estelik boladı», – deysizler.
8 İzraillılar Eshuanın' buyrıg'ın orınladı. Jaratqan İyenin' Eshuag'a aytqanınday, İzrail urıwlarının' sanına qaray İordan da'ryasının' ortasınan alıng'an on eki tastı olar o'zleri tu'negen jerge alıp kelip, sol jerge qoydı.
9 Eshua İordan da'ryasının' ortasına, Kelisim sandıg'ın ko'tergen ruwxaniyler turg'an jerge basqa on eki tas ornattı. Bul taslar bu'gin de sol jerde tur.
10 Solay etip, Jaratqan İyenin' xalıqqa jetkiziw ushın Eshuag'a buyırg'an ha'r bir na'rsesi orınlanıwg'a deyin, sandıqtı ko'tergen ruwxaniyler İordan da'ryasının' ortasında turdı. Ha'r bir na'rse Muwsanın' Eshuag'a buyırg'anınday etip islendi. Xalıq da'ryadan asıg'ıslıq penen o'tti.
11 Pu'tkil xalıq da'ryadan o'tkennen keyin, Jaratqan İyenin' sandıg'ın ko'tergen ruwxaniyler de xalıqtın' ko'z aldında da'ryadan o'tti.
12 Ruben ha'm Gad urıwları menen Menashshe urıwının' yarımı Muwsanın' o'zlerine buyırg'anı sıyaqlı qural asınıp, İzrail xalqının' aldında da'ryadan kesip o'tti.
13 Usı ta'rizde qırıq mın'g'a shamalas qurallı adamlar urısıw ushın Jaratqan İyenin' aldında Erixo tegisligine o'tti.
14 Jaratqan İye sol ku'ni Eshuanı pu'tkil İzrail xalqının' ko'z aldında ma'rtebeli qıldı. Muwsag'a o'miri boyı qanday hu'rmet ko'rsetilgen bolsa, Eshuag'a da sonday hu'rmet ko'rsetile basladı.
15 Jaratqan İye Eshuag'a:
16 – Kelisim sandıg'ın ko'tergen ruwxaniylerge İordan da'ryasınan shıg'ıwdı buyır, – dedi.
17 Eshua ruwxaniylerge: – İordan da'ryasınan shıg'ın'lar, – dep buyırdı.
18 Jaratqan İyenin' Kelisim sandıg'ın ko'tergen ruwxaniyler İordan da'ryasının' ortasınan shıg'ıp, jag'ag'a ayaq basıwdan-aq, da'ryanın' suwları burıng'ıday jiyeklerinen tasıp ag'a basladı.
19 Xalıq birinshi aydın' onınshı ku'ni İordan da'ryasınan o'tip, Gilgalg'a, Erixonın' shıg'ıs shegarasına ornalastı.
20 Eshua İordannan alıng'an on eki tastı Gilgalg'a ornattı.
21 Son'ınan ol İzrail xalqına bılay dedi: – Keleshekte sizlerdin' urpaqların'ız o'z a'kelerinen: «Bul taslar neni an'latadı?» – dep sorasa,
22 olarg'a İzrail xalqının' İordan da'ryasının' qurg'ap qalg'an ultanı arqalı o'tkenin aytın'.
23 Qudayın'ız Jaratqan İye Qamıs ten'izin bizler o'tip bolaman degenshe, qalay qurg'atıp taslag'an bolsa, İordan da'ryasın da sizler o'tip bolaman degenshe, solay qurg'atıp taslag'anın tu'sindirin'.
24 Ol bulardı jer ju'zindegi barlıq xalıqlar Jaratqan İyenin' qanshelli qu'diretli ekenin biliwi ushın ha'm sizler de ba'rqulla Qudayın'ız Jaratqan İyeden qorqıwın'ız ushın isledi.
