İyshaya 32 bob
1 Mine, patsha a'dillik penen patshalıq etip, Hu'kimdarlar a'dalatlıq penen basqaradı.
2 Olardın' ha'r biri samaldan qorg'aytug'ın bastırmaday, Dawıldan bas sawg'alaytug'ın panaday boladı. Olar sho'ldegi ag'ın suwg'a, Kewip sho'llegen jerdegi u'lken jartastın' sayasına uqsaydı.
3 Endi ko'retug'ınlardın' ko'zleri jumılmaydı, Esitetug'ınlar qulaq qoyadı.
4 Oysızlar tu'siniwdi u'yrenedi, Saqawlar tutlıqpay, anıq so'yley aladı.
5 Bunnan bılay, aqmaq hasılzada, dep shaqırılmas, Hiyleker hu'rmetke ılayıqlı, dep aytılmas.
6 Aqmaq biya'deplik penen so'yleydi, Niyeti jamanlıq islewden ibarat. Ol zorlıq isleydi, Jaratqan İyege til tiygizedi, Ashlardı ash qaldırıp,Sho'llegenge suw beriwden bas tartadı.
7 Hiylekerdin' usılı jawız, Jarlının' dawası haq bolsa da, Onı jalg'an so'zler menen joq etiw ushın, Jawız jobalar du'zedi.
8 Al hasılzadalar hasıl jobalar du'zip, Hasıl isler ushın bekkem turadı.Ha'y, erkin jasap atırg'an hayallar, Ornın'ızdan turıp, dawısımdı esitin'! Ha'y, biyg'am qızlar, Menin' so'zime qulaq salın'!
9 Ha'y, erkin jasap atırg'an hayallar, Ornın'ızdan turıp, dawısımdı esitin'! Ha'y, biyg'am qızlar, Menin' so'zime qulaq salın'!
10 Ha'y, biyg'am hayallar, Biraz jıldan keyin titiresesiz, Sebebi ju'zim hasıl bermes, Miywe jıyın-terimi bolmas.
11 Ha'y, erkin jasap atırg'an hayallar, titiresersiz! 2 Ha'y, biyg'am qızlar, qaltırasasız! Kiyimlerin'izdi sheship taslap, Azalap, belin'izdi buwıp alın'.
12 O'nimdar atızlar ushın, Hasılı mol ju'zim shaqaları ushın, Ko'kiregin'izdi mushlap urıp, aza tutın'.
13 Tiken ha'm jantaqlar basıp ketetug'ın, Xalqımnın' jeri ushın, Quwanıshqa tolı u'yler, Shadlıqqa tolı qalalar ushın jılan'lar.
14 O'ytkeni saraylar taslap ketilip, Shawqımlı qala bos qaladı. Qorg'an ha'm minaralar ma'n'gige qıyralıp, Qulanlardın' quwanıshına, Mallardın' jaylawına aylanadı.
15 U'stimizge joqarıdan Ruwx to'gilgenshe, Sho'l o'nimdar atızg'a aylang'ansha, O'nimdar atız a'jayıp bag' dep sanalg'ansha usılay boladı.
16 Keyin sho'lde a'dalat ma'kan basıp, A'dillik o'nimdar atızda jasaydı.
17 A'dilliktin' miywesi tınıshlıq, Na'tiyjesi amanlıq ha'm ma'n'gilik qa'wipsizlik boladı.
18 Xalqım tınısh orınlarda, Qa'wipsiz u'ylerde, Ra'ha't bag'ıshlaytug'ın jerlerde jasaydı.
19 Tog'ay pu'tkilley joq bolsa da, Qala jer menen jeksen etilse de,
20 Ha'r bir da'rya jag'asında egin ekken, O'giz ha'm esheklerdi bos jibergen, Sizler baxıtlı bolasızlar!
